Është patologjike dhe e denjë për studim psikologjik sjellja e dhëndrit të Sali Berishës dhe bashkëshortit të Argita Berishës, i cili ripërsërit prej disa vitesh nëpër mediat e vjehrrit të tij se “Bolino i ka marrë tokën”. Ashtu siç janë patologjike deklaratat e tij raciste dhe vulgare. Pasi përfitoi dhe po gjykohet në aferën e Sport klub Partizanit, Dhëndrri është fiksuar se “fajin ja ka Bolino” dhe nuk lë gjë pa sajuar për t’u vetëkënaqur me fantazinë e tij. 

Deklaron përballë gazetarësh që i paguan familja e tij dhe ja përkëdhelin egon siç mund të bësh me budallain e lagjes të cilit vec mund t’i hapësh rrugë, se toka ku sot ngrihet Report TV është e tij dhe se ai ja ka falur Bashkisë. Asgjë e vërtetë. Toka të cilën Report TV e ka marrë me qira (dhe jo në pronësi) pas nje konkursi të hapur dhe ligjor është pronë shtetërore. Ai ka rimarrë me shumë të drejtë çdo m2 nga ato toka që kanë qenë të tijat dhe të fisit të tij, por jo vetëm nuk ka dhuruar asgjë, madje me siguri, ka dashur të gllabërojë edhe tokën shtetërore ku sot është me qira Report TV, për të ndërtuar pallate si konvikte dhe me kushte të tmerrshme jetese dhe ndërtimi.

Pasi Report Tv nënshkroi kontratën e qirasë duke i prishur pa e ditur planin e gllabërimit, vetë Dhëndrri ka organizuar një mini-protestë në lagje që ai e përmend sot si prova e “revoltës spontane mbarëpopullore”, ndërkohë që në të njëjtën periudhë, siç u zbulua nga bisedat e SkyEcc, u aktivizua rreth asaj toke edhe banda e bosit te krimit Rumi i Shijakut me një sinkronizmin shumë të dyshmitë me Dhëndrrin.

Siç janë mbuluar me myk pallatet e Kontakt që Dhëndrri ka ndërtuar përballë Report TV, ashtu i është mykyr koka nga fantazitë që mendon se do të ndikojnë drejtësinë e re për të shpëtuar atë nga afera korruptive dhe nga pasuritë të panumërta të bllokura në Shqipëri dhe jashtë saj.
Por në këtë hall të madh të tijin nuk e ndihmon dot as Bolino dhe as Report TV, të cilët, maksimumi, mund ta dëgjojnë dhe të qeshin, siç dëgjonin dhe qeshnin me një durrsak të viteve ’90, i cili vinte në redaksi dhe përbetohej se ishte djali natyral i këngëtares italiane Mina, edhe pse as ai, as babai i tij dhe askush nga fisi nuk kishin qenë një herë të vetme në Itali. Vetëm se durrsaku naiv nuk foli dot në televizione që të gjithë të talleshin me të, ndërsa Dhëndrri ka televizionet personale ku riperserit pa asnjë ndërprerje dhe oponencë delirin e tij.