VLORË- I shpallur në kërkim ndërkombëtar që prej muajit maj, merr fund arratia e bosit të mashtrimeve me call center, Granit Pepnikaj.

29-vjeçari që u kap nga policia e Vlorës dhe Forcat Operacionale teksa po qëndronte në një vilë luksoze në Dhërmi. Në pranga përfundoi edhe bashkëpunëtori i tij, 31-vjeçari Xhoni Hitaj, edhe ai i shpallur në kërkim.

Të dy u kapën në flagrancë pasi policia kishte rrethuar resortin, ndërsa mësohet se ata nuk bënë rezistencë.  

Gjatë këtij operacioni, për përkrahje të autorit të krimit, policia arrestoi edhe 28-vjeçarin nga Tirana, Redion Rexhmati.

Gjatë kontrolleve të ushtruara në vilën në Dhërmi, ku ata po pushonin u gjetën dhe sekuestruan një armë zjarri pistoletë dhe një sasi lënde narkotike të dyshuar Cannabis sativa.

Ndaj Pepnikajt dhe Hitajt, Gjykata e Tiranës kishte caktuar masën e arrestit në burg për veprën penale të mashtrimit kompjuterik. 

Arrestimi i 29-vjeçarit Pepnikaj shënon një zhvillim të rëndësishëm në një prej dosjeve më të mëdha të mashtrimit ndërkombëtar me call center.

Sipas hetimeve, dyshohet se ai organizonte rrjetin e call center-ave që mashtronte qytetarët e vendeve të Bashkimit Europian, duke i bindur të investonin në platforma të bursës. Dëmi ekonomik vlerësohet mbi 50 milionë euro.

Nga hetimet rezulton se Pepnikaj zotëronte 50% të aksioneve të shoqërisë "Gama Media Communication", themeluar në korrik 2021 me Jurgen Melën.

Operacioni për goditjen 3 e call center-ave mashtrues që ushtronin aktivitetin kriminal në 12 zyra në kryeqytet, u krye në prill të këtij viti pas një hetimi dyvjeçar të Prokurorisë së Tiranës në bashkëpunim me autoritetet austriake. Gjatë këtij aksioni, u sekuestruan 900 mijë euro cash dhe në pranga ranë 10 persona.

Kur u godit rrjeti i Call Center-ave mashtrues?

Operacioni për goditjen 3 e call center-ave mashtrues u krye në prill të këtij viti pas një hetimi dy vjeçar me të Prokurorisë së Tiranës në bashkëpunim me autoritetet austriake.Gjatë këtij aksioni, u sekuestruan 900 mijë euro cash dhe në pranga ranë 10 persona.

Qëllimi i mashtruesve në këto 3 call center, ishte të piketonin qytetarë europianë të cilët i kishin humbur paratë në skema të tilla. Operatorët premtonin se mund t’i rikuperonin paratë që ata kishin humbur. Veçse për ta bërë këtë, do duheshin pagesa, nga 1 mijë euro. Pra skema fillonte me 1 mijë euro për të rikuperuar 10 mijë euro të humbura, përshembull, por gjatë procesit mashtruesit kërkonin edhe shuma të tjera parash. Qëllimi: T’i merrnin personave të mashtruar një herë, edhe qindarkat e fundit që u kanë mbetur.

-------------------------------

Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë

Rendit zhvillimet sipas orarit:
Ora 17:04
Policia rrethon vilën luksoze në Dhërmi, momenti kur arrestohet bossi i Call Center, Granit Pepnikaj (VIDEO)

Granit Pepnikaj, i shpallur në kërkim ndërkombëtar u arrestua sot në një resort në Dhërmi. Në këto pamje mund të shihet momenti i operacionit nga Policia e Vlorës dhe Forca Operacionale, të cilat rrethojnë një vilë luksoze në Dhërmi në të cilën ndodhej Pepnikaj, i cili sipas burimeve nuk bëri rezistencë.

Pepnikaj kërkohej që prej majit 2026, pasi Gjykata e Tiranës i caktoi masën "arrest me burg" për mashtrim kompjuterik dhe pastrim parash.

Gjatë kontrollit të ushtruar në vilën ku qëndronin, shërbimet e Policisë gjetën dhe sekuestruan një armë zjarri pistoletë, si dhe një sasi lënde narkotike, e dyshuar cannabis sativa.

SI.E./Shqiptarja.com