Dhuna në Zvërnec/ U hiqet licenca ‘Major’ e Myrto Security’, disa roje nuk ishin të regjistruar! Hita komandon tjetër drejtor në Vlorë: Të marrin mësim

Dy kompanitë private si sigurisë, punonjësit e të cilave dhunuan protestuesit në Zvërnec të shtunën nuk do ta ushtrojnë më aktivitetin e tyre. Policia e Shtetit njofton zyrtarisht se u ka hequr të dyja shoqërive licencat për shkelje të rënda.

“Rezultoi se të dyja subjektet janë konstatuar në shkelje. Për këto shkelje mora vendim për heqjen e licencave të të dyja subjekteve ShPSF”, tha Hita.

Më konkretisht “Major Security”, rojet private të cilës tërhoqën vëmendje për shkak të maskave dhe përdorimit të sprajit piper, i është hequr licenca për shkak të dhunës së ushtruar nga punonjësi i saj i licencuar, apo ndryshe pronari në hije i saj, tashmë i arrestuar, Gerald Biba, i cili goditi me grusht një protestues.

Kompania “Major Security” rezulton e regjistruar në pronësi të vjehrrës së tij, Shpresa Myzyri. Ajo është themeluar në nëntor 2016 në Durrës, dhe nga ky muaj e deri në nëntor 2021, emri i Gerald Bibës figuron vetëm si administrator.

Pas veprimit arbitrar të Bibës që qëllon me grusht, 2 punonjës të tjerë të kompanisë, në hetim në gjendje të lirë, tërhoqën zvarrë protestuesin, për të krijuar një prej pamjeve më skandaloze ndonjëherë në raste protestash, duke i shkaktuar dëme të konsiderueshme trupore.

Hetimi i Policisë së Shtetit zbuloi se të dy këta punonjës që paraqiteshin si të “Major Security”, në fakt rezultuan të paregjistruar dhe të palicencuar nga vetë kompania.

Veprimet e paprecedenta të Gerald Bibës dhe 2 të tjerëve, i kushtuan shumë rëndë edhe kompanisë tjetër të ruajtjes fizike, “Myrto Security 1.3A”. Nga verifikimi paraprak rezultoi se kjo kompani nuk zbatoi rregullat për regjimin e hyrjes dhe daljes së personave dhe mjeteve në objektin e rrethuar me tela me gjemba, dhe se nuk e administronte një listë emrash që lejoheshin brenda.

Ata lejuan hyrjen e 2 punonjësve që të kompanisë “Major” duke qenë të paregjistruar dhe pa licencuar. Po ashtu, rojet e kompanisë “Myrto Security”, nuk ndërhynë në asnjë moment kur protestuesi dhunohej nga Biba dhe tërhiqej zvarrë nga 2 persona të tjerë, që ishte në kantier të paligjshëm, përfshirë edhe hedhjen e gurëve ndaj protestuesve.

Drejtori i policisë Hita tha ndaj të dyja kompanive po zhvillohet paralelisht hetim administrativ dhe penal, ndërkohë që iu rikthye edhe një herë situatës në policinë e Vlorë, ku tashmë është komanduar Edvin Ndreu, pasi u njoftua përfundimisht shkarkimi i Elidon Çelës.

“Drejtori i Drejtorisë Vendore të Policisë Vlorë u shkarkua dy ditë më parë, për shkak të dështimit në menaxhimin e tubimit të datës 30 maj, në Zvërnec, por mbi të gjitha për informacionin e pavërtetë që u përçua publikisht, për një qytetar që u mor me forcë dhe u godit nga rojet e sigurisë private në kantier. Drejtoria Vendore e Policisë Vlorë ka nevojë të nxjerrë mësimet e duhura”, tha Hita.

Rendit zhvillimet sipas orarit:

Të Fundit Të Parat