Protesta para Kryeministrisë, moment tensioni mes organizatorëve! Reagime për përdhosjen e flamurit izraelit: Ka grupe të infiltruara, distancohemi!

Një nga organizatorët e protestës së Zvërnecit, Arben Kola, tha se ka grupe të infiltruara që përpiqen të minojnë lëvizjen. Ai përmend ato greke e iraniane, duke rënë dakord me fjalët e kryeministrit Rama. Ai u shpreh edhe për incidentin e një nate më parë me përdhosjen e flamurit izraelit duke thënë se distancohen prej kësaj.

"SHIK-u e di, shteti i Izraelit e di, se mes nesh dje, apo ditë të tjera, ka grupe të infiltruara që heqin perden e priftit apo të hoxhës apo të imamit dhe bashkohen atje me megafona. Ne në ditët në vazhdim do i dalim me fytyra dhe emra që t’i demaskojmë. Ne i dimë kush janë grupet greke që operojnë në Shqipëri kundër Shqipërisë, ne i dimë grupet serbe që operojnë në Shqipëri që paguhen direkt nga Beogradi, që sponsorizohen nga grupet ekstremiste serbe pranë Vuçiçit të lidhur me Ramoviçin, ne i dimë edhe linjat fetare nga Turqia që mundohen t’i japin narrativë fetare protestës.  Të gjithë këta nuk do arrijnë ta zhbëjnë këtë vullnet sado të lodhen, sepse ky është vullnet i popullit shqiptar, i Zotit, dhe gjithë këta po nuk u arrestuan nga anti-terrori dhe SHIK-u, ta jap besën që do kapen në shkelma nga këta q137ndrestarët që i shikoni, ne do i nxjerrim me fytyra dhe do i kapim para. Ne nuk jemi kundër asnjë shteti, nuk jemi për dhunimin as të flamurit Izraelit, Serbisë, Greqisë,  Turqisë, Iranit, Arabisë, flamuri i askujt nuk duhet prekur.

Duke parë praninë e madhe të njerëzve, dhe ata që u ndaluan dje në autostradë, për llogari të dikujt, mbi 200 mijë shqiptarë që morën pjesë. Ramoviçi duke kontaktuar me Vuçiç se si i kanë shtypur protestat në Serbi, ka kërkuar ndihmën e Vuçiç, që ai i dërgon këta grupe ekstremiste, apo Greqia dhe shtete të tjera që tentojnë ta zhbëjnë këtë vullnet. Kjo është narrativë totalisht e Ramoviçit dhe qeverisë së tij. Pasi na akuzuan me lloj-lloj agjenturash nuk ia dolën, tani po përdorin vetë grupet e tyre ekstremiste të sponsorizuara nga armiqtë tanë shekullorë. Ka plot grupe që sponsorizohen nga shtetet tona armiqësore me pretendime territoriale, por i ftoj të gjithë shqiptarët të mos bien pre, nuk është dhuna zgjidhja e duhur", tha Kola.

Një moment tensioni është shënuar në protestën e 22-të në Tiranë. Duket se mes organizatorëve janë nxehur gjakrat. Njëri prej tyre thotë “mos prek me dorë”. Shkaku që ka nxitur këtë përplasje mbetet ende i paqartë.

Një protestueseje që i bëri thirrje administratës që të bashkohej në bulevard, iu ndërpre fjala në mes. Sapo mbaron thirrjen dhe nis të shtojë diçka, asaj duket se i thonë të lërë mikrofonin.

“I bëjmë thirrje administratës, të bashkohet me popullin! I bëjmë thirrje...”, tha vajza para se fjala t’i ndërpritej.

Pankartave të zakonshme në protestë iu bashkuan edhe tullumbacet e kuqe e të zeza. Protestuesit hodhën në ajër disa dhjetëra prej tyre. Më vonë, mes tubuesve u shfaqën edhe një grup flamingosh, simbolika e përdorur kundër resortit në Zvërnec.

Disa protestues ndezën edhe flakadanë.

Me përfundimin e fjalimeve para kryeministrisë, protestuesit kanë nisur marshimin në kryeqytet. Udhëzimi i tyre i parë ishte për të shkuar drejt bashkisë. Sot pjesë e protestës është edhe diaspora.

Gjithashtu u tha se cilido që dëshiron, mund të vijojë të qëndrojë përpara kryeministrisë.

Në protestën e radhës para kryeministrisë, tubuesit janë distancuar nga incidenti i një dite më parë me flamurin izraelit. Një protestues tha se ngjarja s’ka lidhje me protestën paqësore.

“Mbrëmë është tentuar që një incident i ndodhur në qytet, të lidhet me protestën! Është e pamundur! Kjo protestë ka qenë simbol dashurie për njëri-tjetrin! Ai incident nuk ka lidhje me protestën!”, tha protestuesi.

Një tufë ‘flamingosh’ u shfaqën edhe në ditën e 22-të të protestës para kryeministrisë. Disa protestues mbanin në duar flamingot simbolike duke bërë një paradë mes të tjerëve.

Një protestuese deklaroi se qytetarët janë lodhur nga padrejtësitë dhe se askush nuk e shet dot Shqipërinë. Më tej, shtoi se vetëm qytetarët janë ata që do ta heqin Ramën.

“Jam këtu si një qytetare, si një nënë. Jemi lodhur nga padrejtësitë, nga premtimet boshe, duam një shtet që respekton qytetarët. Kërkojmë drejtësi për fëmijët tanë. Shqipërinë tonë askush nuk e shet dot. Ramën ne e kemi vendosur dhe ne do e heqim”, tha protestuesja.

Në ditën e 22-të të protestës, kërkesat kryesore të tubuesve mbeten dorëheqja e kryeministrit, qeveria teknike dhe zgjedhjet. Një protestues siguroi se diaspora do të jetë aleati më i fortë.

“Për të realizuar proceset demokratike, diaspora do të jetë aleati më i fortë. Dorëheqja e Edi Ramës është hapi i parë, qeveria teknike hapi i dytë dhe proceset demokratike hapi i tretë”, tha protestuesi.

Një protestues propozoi që Shqipëria të ndjekë shembullin e Hungarisë që asnjë kryeministër mos të mbajë më shumë se 2 mandate.

“Propozoj të ndjekim shembullin e Hungarisë dhe asnjë kryeministër mos të ketë më shumë se 2 mandate. Autokracia s’do të ketë më vend në Shqipëri!”, tha ai.

Një protestues u kujtoi të pranishmëve para kryeministrisë ’21 janarin’, ngjarje për të cilën tha se ka qenë edhe vetë i pranishëm dhe se kërkojnë drejtësi.

“Këtu kam qenë më 21 janar 2011. Shokët e mi u vranë për të sjellë në pushtet zotërinë që është sot. Duam drejtësi, thërrasim SPAK! Kërkojmë drejtësi!”, tha protestuesi.

Një vajzë e vogël që u ngjit në podium para kryeministrisë bëri thirrje për një Shqipëri më të drejtë dhe dëgjimin e zërit të të vegjëlve.

“Ne duam një Shqipëri më të drejtë, më të sigurt dhe me më shumë mundësi për të gjithë! Zëri ynë duhet të dëgjohet sepse ne jemi e ardhmja e këtij vendi!”, tha vajza.

Paralelisht me protestën në Tiranë, edhe diaspora shqiptare në Frankfurt të Gjermanisë është ngritur në një tubim.

Me simbolet kombëtare, muzikë shqiptare në sfond e flamingo, ata janë grumbulluar në një shesh për të shprehur qëndrimin e tyre lidhur me investimin në Zvërnec.

Shqiptarët në Basel të Zvicrës kanë shprehur mbështetjen e tyre për protestën në Tiranë kundër investimeve në Zvërnec duke dalë edhe ata me pankarta.

“Diaspora është këtu”, flamuj kuqezi dhe flamingo, një grup protestuesish po ecin në rrugët e qytetit.