TIRANE- Gazeta “Shqiptarja.com” në fillim të muajit mars denoncoi dy vendime të Gjykatës së Apelit Vlorë, nëpërmjet të cilëve kishin fituar lirinë dy biznesmenët Arben Gropa dhe Gramos Murataj, tashmë ky i fundit i arratisur. Të dy këta emra, rezultonin me kartelë të “kuqe” dhe ishin shpallur në kërkim ndërkombetar, pasi ishin dënuar në Itali me 32 vite burg dhe 20 vite burg, për akuza të rënda si trafik droge, shfrytëzim prostitucioni dhe pjesëmarje në organizata kriminale.

Si pasojë e këtyre dënimeve policia ka kryer arrestimin e Arben Gropës, pronarit të lokalit të njohur në Fier “Taverna Pelikani”. Qëllimi i këtij arrestimi është bërë me qëllim ekstradimin e tij, ndërkohë vetëm pas disa ditësh Gjykata e Apelit Vlorë, ka vendosur të lirojë Arben Gropën. Ndaj këtij të fundit është duke u zhvilluar një proces gjyqësor në Fier, për miratimin ose jo të kërkesës së autoriteteve italiane për ekstradimin e Gropës.

Njëherësh Ministria e Drejtësisë, ka nisur inspektim në Vlorë, lidhur me vendimin për lirimin e tij. Ndërkohë biznesmeni tjetër që është liruar dhe për pasojë ka dështuar ekstradimi i tij, është biznesmeni i basteve sportive Gramos Murataj. Sot e kësaj dite, Gramos Murataj ndodhet në kërkim, ndërsa ndaj tij në Vlorë, po zhvillohet një process penal për largim të burgosurit nga vendi i qëndrimit.

Shkrimi u publikua sot (29.03.2014) në gazetën Shqiptarja.com (print)

Redaksia Online
(d.d/shqiptarja.com)