Eurodeputeti bullgar Andrey Kovatchev ka vlerësuar progresin e Shqipërisë në rrugën drejt Bashkimit Evropian, ndërsa ka komentuar edhe protestat që po zhvillohen në vend.

Kovatchev tha se javën e ardhshme Parlamenti Evropian pritet të miratojë në seancë plenare raportin vjetor të zgjerimit për Shqipërinë dhe se institucionet evropiane e mirëpresin përparimin e bërë nga vendi.

“Jemi shumë të kënaqur që ndodhemi përsëri në Shqipëri, së bashku me kolegët e mi nga Parlamenti Bullgar. Javën e ardhshme në Strasburg, ne do të miratojmë në seancë plenare raportin vjetor të zgjerimit për Shqipërinë. Ne e mirëpresim progresin e bërë nga Shqipëria dhe është shumë mirë që të gjitha partitë shqiptare janë aq të përkushtuara ndaj integrimit evropian. Ne shpresojmë në Parlamentin Evropian, por edhe kolegët e mi nga Parlamenti Bullgar të cilët gjithashtu mbështesin fuqishëm integrimin evropian të Shqipërisë që zgjerimi i radhës i Bashkimit Evropian të jetë me Shqipërinë dhe Malin e Zi.” tha ai.

I pyetur nëse protestat mund të ndikojnë në procesin e integrimit, eurodeputeti bullgar tha se zhvillimet po ndiqen nga afër, por theksoi se zgjidhja u takon institucioneve dhe politikës shqiptare.

“Ne po monitorojmë shumë nga afër çdo zhvillim. Kjo sigurisht i takon klasës politike në Shqipëri që ta zgjidhë dhe të ndjekë të gjitha standardet, veçanërisht ato ekologjike, me të gjitha investimet që duhen bërë. Ne nuk po ndërhyjmë në këtë pjesë, por sigurisht që do të ketë një tekst në raport-progresin që lidhet me përmbushjen e të gjitha ligjeve dhe standardeve që kanë të bëjnë me ekologjinë, por edhe me zhvillimin rajonal dhe turizmin”, u shpreh ai.

Kovatchev tha se protestat janë pjesë e demokracisë, për sa kohë ato zhvillohen në mënyrë paqësore.

“Ne jemi shumë të mësuar me këtë. Dua të thëm se është mirë të dëgjohet zëri i popullit, nëse gjithçka është e qetë dhe paqësore. Dhe kjo është gjithashtu thirrja jonë për të gjitha partitë në pushtet dhe ato të opozitës: të jenë të qeta, të dëgjojnë njëra-tjetrën dhe të gjejnë zgjidhjen më të mirë për qytetarët. Për qytetarët e Shqipërisë, më e mira është që të hyjnë sa më shpejt të jetë e mundur në Bashkimin Evropian dhe të gëzojnë së bashku familjen tonë evropiane, në këtë kohë shumë sfiduese për botën. Kemi shumë probleme gjeopolitike rreth nesh dhe Shqipëria është një aleate shumë e mirë në NATO, dhe tani, shumë shpejt, edhe në Bashkimin Evropian.”, deklaroi ai.

I pyetur se çfarë duhet të bëjnë autoritetet shqiptare përballë protestave, Kovatchev tha se duhet të dëgjojnë qytetarët dhe të respektojnë legjislacionin dhe standardet mjedisore, duke theksuar se Parlamenti Evropian nuk ndërhyn në politikën e brendshme të Shqipërisë.

“Të dëgjojë njerëzit dhe të ndjekë të gjithë legjislacionin dhe të gjitha standardet mjedisore – gjë që jam i sigurt se do të jetë edhe në tekstin e Parlamentit Evropian. Por, ne në Parlamentin Evropian nuk do të ndërhyjmë në politikën e brendshme të Shqipërisë dhe bëjmë thirrje për një bashkëpunim të mirë mes partisë në pushtet dhe partive opozitare.”, tha ai.