Veteranët e UÇK-së kanë falenderuar kryeministrin Edi Rama, për fjalën e tij në Bordin e Paqes në Uashingon, ku ndër të tjera ngriti edhe çështjen e ish-udhëheqësve të luftës çlirimtare, të cilët po gjykohen në Hagë.

“Faleminderit, Kryeministër z.Edi Rama”, thuhet në postimin e veteranëve të UÇK-së në rrjetet sociale, krahas videos ku flet kreu i qeverisë shqiptare.

Kryeministri Edi Rama deklaroi gjatës fjalës së tij në Bordin e Paqes, se presidenti amerikan, Donald Trump, gjatë mandatit të tij të parë e afroi Kosovën dhe Serbinë më afër një marrëveshje paqeje.

Rama shtoi se ish-presidenti i Kosovës, Hashim Thaçi nuk u lejua të shkonte në Shtëpinë e Bardhë për të firmosur marrëveshjen, por u arrestua dhe ndodhet në burg që prej nëntorit 2020.

Kreu i qeverisë i tha Trump se Thaçi u arrestua nga i njëjti prokuror që do përndiqte më vonë presidentin. Rama i kërkoi ndihmë Trump që të ndërhyjë në mbrojtjë të ish-krerëve të UÇK-së para shpalljes së vendimit, që pritet të merret këto muaj. "

"Më lejoni shumë shkurtimisht t’ju tërheq vëmendjen te një tjetër konflikt i hapur më pranë vendit tim, ku udhëheqja e presidentit Trump gjatë mandatit të tij të parë e solli Kosovën dhe Serbinë më pranë se kurrë drejt një marrëveshjeje përfundimtare paqeje. Presidenti i Kosovës, që aso kohe, u ndalua të udhëtonte drejt Shtëpisë së Bardhë në mënyrë brutale për të nënshkruar atë marrëveshje në praninë e presidentit Trump, dhe në fakt kjo ishte ajo që u bë nga ai prokuror special që përndoqi edhe vetë presidentin Trump dhe për këtë u bë i famshëm botërisht.

Sot, presidenti i Kosovës ka kaluar gjashtë vjet në paraburgim nga një gjykatë e posaçme në Hagë, e sponsorizuar nga një sërë shtetesh demokratike, disa prej tyre të pranishme këtu, që duhet t’ju vijë turp nga ajo lloj drejtësie ndërkombëtare. Vetëm javën e kaluar, zoti president, një tjetër prokuror i financuar nga ky vend i madh dhe tatimpaguesit e tij kërkoi 45 vjet burgim për të, një kërkesë që shkaktoi një valë tronditëse poshtërimi në të gjithë tërësinë e një vendi paqedashës.

Dhe në këtë moment ka vetëm disa muaj që qëndrojnë midis një njeriu që u ngrit nga rezistenca ndaj spastrimit etnik për t’u bërë paqebërës dhe një rezultati shkatërrimtar në një gjykatë që deri më tani ka dështuar në çdo hap të vetin t’u përmbahet standardeve të drejtësisë demokratike. Për hir të Zotit, zoti president, le të bëjmë diçka përpara se, siç thoni ju, gjëra shumë të këqija të mund të ndodhin sërish.

Edhe njëherë, faleminderit shumë që përfshini Shqipërinë në këtë nismë fisnike, duke sjellë miq, duke qenë miq të afërt me Izraelin dhe me vendet arabe. Shpresojmë fort se jemi një vlerë e shtuar e vizionit tuaj të jashtëzakonshëm", tha Rama.