/ATSH/.- Komandanti i KFOR-it, Gjeneralmajori Francesco Paolo Figliuolo, ka takuar shefin e Shtabit të Përgjithshëm të Forcave të Armatosura Serbe, Gjeneralin Lubisha Dikoviç, në Krushevc të Serbisë, të cilit i tha se NATO mbetet e përkushtuar ta ndihmojë lëvizjen e lirë dhe demokracinë në Kosovë.
Komandanti i KFOR-it theksoi përmirësimet në gjendjen e sigurisë në Kosovë dhe tha se këto arritje janë arritur si rezultat i punës së vazhdueshme dhe bashkëpunimit të të gjitha palëve të përfshira në procesin e normalizimit.
Ai gjithashtu konfirmoi përpjekjet e vazhdueshme dhe të paanshme të misionit të NATO-s në ofrimin e mjedisit të qetë dhe të sigurt, si dhe lirinë e lëvizjes me qëllim të krijimit të kushteve të nevojshme për të ndihmuar dhe mbështetur progresin, demokracinë dhe modernizimin në Kosovë.
Sipas një komunikate të KFOR-it, gjatë vizitës, ata shfrytëzuan mundësinë dhe vizituan Qendrën e trajnimit për mbrojtje kimike, biologjike, radiologjike dhe nukleare (CBRN-TC), që është një nga qendrat për trajnim të specializuar të komandës për trajnime operacionale të Forcave të Armatosura Serbe.
"Pjesëmarrja në kurset që ofrohen në CBRN-TC është e hapur për të gjitha vendet e rajonit, të NATO-së dhe atyre në Parnteritet për Paqe. Në përmbyllje të diskutimeve, të dy Gjeneralët konfirmuan se ky bashkëpunim produktiv dhe i përzemërt do të vazhdojë", thuhet në komunikatë.
Sipas KosovaPress, në pajtim me Marrëveshjen Tekniko-Ushtarake, Komandanti i KFOR-it mban takime të rregullta me Shefat e Mbrojtjes së shteteve që kufizohen me zonën e përgjegjësisë së KFOR-it, gjë që ofron mundësi efektive për shkëmbim të informatave dhe pikëpamjeve në lidhje me gjendjen e gjithëmbarshme të sigurisë në Ballkan. Gjatë muajve të kaluar, ai mbajti takime të këtij niveli në Podgoricë, Tiranë dhe Shkup./k.s/