Fluksi i fëmijëve në Pediatri, Manastirliu: Sot u hapën 3 qendra shëndetësore 24-orëshe

Ministria e Shëndetësisë ka vendosur hapjen e parakohëshme të 3 qendrave shëndetësore 24 orëshe për urgjencat pediatrike, bazuar në fluksin e lartë të ditëve të fundit në Urgjencën e Pediatrisë në Qendrën Spitalore Universitare “Nënë Tereza”,

Ministrja Manastirliu pa nga afër situatën në Pediatrinë e Tiranës, ku vlerësoi punën e stafit mjekësor në përballimin e situatës dhe lajmëroi hapjen e qendrave të reja për të shfryrë fluksin në QSUT.

“Nisur nga fluksi i lartë i rasteve gjatë tre ditëve të fundit, edhe pse është një periudhë e pazakontë e vitit, kemi vendosur të hapim tre qendra me shërbim 24 orë, në mënyrë që prindërit t’i çojnë fëmijët pranë qendrave shëndetësore për të marrë shërbimin e pediatrit, pa patur nevojë të presin me rradhë të gjata në QSUT”, tha Manastirliu.

Do të jenë Qendra Shëndetësore nr. 7 në Laprakë, Qendra Shëndetësore nr. 8 në zonën e ish-bllokut dhe Qendra Shëndetësore nr. 10 në zonën e Oxhakut.

Ministrja theksoi se janë marrë masa që të 3 qendrat shëndetësore të kenë mjediset ku do të kryhen vizitat dhe asistohen fëmijët e sëmurë edhe për serume dhe janë pajisur me barna apo materiale mjekësore, ku çdo qendër shëndetësore në Tiranë ofron shërbim edhe pasdite, deri në orën 20:10. Gjatë vizitës në Pediatri, Manastirliu bëri dhe një apel për prindërit.

“Gjatë bisedës me mjekët u informova se 70% e rasteve nuk janë raste urgjence, që fare mirë mund ta marrin shërbimin, pa pritur, pranë qendrave shëndetësore, ndaj do t’ju kërkoja që të përdorni qendrat shëndetësore, ku shërbimi ofrohet në kushte shumë të mira dhe nga ekipe mjekësh dhe infermierësh profesionistë”, tha Manastirliu.

Gjatë ditëve të fundit në shërbimin e Urgjencës Pediatrike janë paraqitur rreth 1200 pacientë, një fluks shumë i pazakontë, i përballuar me shërbim të përforcuar nga mjekët dhe infermierët e këtij shërbimi. Mjekët e Pediatrisë bënë apel për të gjithë prindërit, të mos e anashkalojnë mjekun e familjes, që të evitojnë pritjen dhe në urgjencë të trajtohen vërtet rastet që kanë nevojë për trajtim të specializuar.

/r.k./Shqiptarja.com

TAG:
• ogerta manastirliu
• tre spitale te reja
• urgjenca pediatrise