POP 5

Lajmet më të lexuara të 5 minutave të fundit

Ekonomi

Fullani thellon kritikat ndaj
Bodes, për borxhin dhe deficitin

Ka thelluar kritikat ndaj Ekzekutivit guvernatori i Bankës së Shqipërisë Ardian Fullani, tashmë që qeveria është në ditët e fundit të saj.
Fullani thellon kritikat ndaj<br />Bodes, për borxhin dhe deficitin
TIRANE - Ka thelluar kritikat ndaj Ekzekutivit guvernatori i Bankës së Shqipërisë Ardian Fullani, tashmë që qeveria është në ditët e fundit të saj. Raporti i politikës monetare në tremujorin e dytë 2013 ve në dukje zgjerimin me ritme mjaft të shpejta të defiçitit buxhetor, sidomos gjatë tremujorit të dytë, çka ka bërë që pjesa më e madhe e huamarrjes së brendshme të planifikuar për vitin 2013 (rreth 90.1%) të zhvendoset në gjysmën e parë të vitit.

Nga ana tjetër, sipas Bankës së Shqipërisë, të ardhurat buxhetore për këtë periudhë rezultuan 2.9% më të ulëta nga një vit më parë, duke reflektuar ecurinë e dobët të të ardhurave tatimore. Këto zhvillime janë materializuar në rritje të ndjeshme të defiçitit buxhetor, i cili ka rezultuar më shumë se dy herë më i lartë, në krahasim me një vit më parë. Totali i të ardhurave në gjysmën e parë të vitit 2013 u vlerësua në rreth 23.4% të PBB-së, ose 1.8 pikë përqindjeje nën mesataren e vlerësuar për gjashtëmujorin e parë gjatë 2010-2012, thekson raporti.

Të ardhurat tatimore për periudhën 6-mujore u reduktuan me rreth 3.9% nga e njëjta periudhë e një viti më parë, kryesisht në sajë të niveleve më të ulëta vjetore të të ardhurave nga TVSh-ja, akcizat, tatimi mbi fitimin dhe nga taksat kombëtare. Dinamika në rënie e të ardhurave tatimore vlerësohet të jetë kombinim i dobësisë së kërkesës së brendshme me tërësinë e masave fiskale të ndërmarra gjatë këtij viti buxhetor. Të ardhurat nga TVSh-ja mbartën kontributin më të lartë negativ në ndryshimin e të ardhurave tatimore (me rreth 2.8 pikë përqindjeje).

Dinamika në  rënie e të ardhurave nga TVSh-ja vlerësohet të jetë rezultat i importeve më të ulëta në terma vjetorë, i vijimësisë së një aktiviteti ekonomik të brendshëm të ngadaltë përgjatë kësaj periudhe, si edhe i rimbursimeve më të larta nga një vit më parë. Dinamika e deficitit buxhetor është reflektuar në rritjen e borxhit publik gjatë kësaj periudhe, theksojnë ekspertët e Bankës qendrore. NSipas tyre, në fund të tremujorit të parë, raporti i borxhit publik ndaj PBB-së vlerësohet në 63.3%.

Borxhi publik përbën një nga dobësitë më të mëdha të ekonomisë e të sistemit financiar shqiptar, shton BSH, duke vënë në dukje se, për këtë arsye, Banka e Shqipërisë sugjeron se marrja e masave të menjëhershme për kontrollin e këtij borxhi do të përbënte një kontribut të rëndësishëm për reduktimin e pasigurive dhe të primeve të rrezikut në ekonomi. “Gjejmë rastin të sugjerojmë edhe një herë vendosjen e një rregulli fiskal transparent e të besueshëm, si rruga më e mire për të disiplinuar politikën fiskale dhe për të ruajtur besimin e tregjeve financiare ndaj borxhit publik shqiptar, në afat të gjatë”, thuhet në raport.

Shkrimi u botua sot në gazetën Shqiptarja.com (print) 25.08.2013
 
Redaksi Online
(b.m/shqiptarja.com)

  • Sondazhi i ditës:
    27 Nëntor, 11:43

    Si e vlerësoni vendimin e GJKKO që liroi Berishën nga arresti shtëpiak?

Lajme të tjera



×

Lajmi i fundit

GJKKO i hoqi 'arrestin shtëpiak' Berishës, Kthupi në 'Repolitix': Praktikë gjyqësore, dosja ka shkuar për hetim, Berisha nuk prish më provat! Gazetari: Bien akuzat e PD për kapje të drejtësisë

GJKKO i hoqi 'arrestin shtëpiak' Berishës, Kthupi në 'Repolitix': Praktikë gjyqësore, dosja ka shkuar për hetim, Berisha nuk prish më provat! Gazetari: Bien akuzat e PD për kapje të drejtësisë

27 Nëntor, 21:39