Në 5 muaj vodhi dy banka, kapet grabitësi serial në Tiranë! Momenti kur futet i maskuar në bankë dhe kërcënon me armë stafin, mori 60 mijë euro! Pjesë e grupit që bëri 'kërdinë' në 28 banka në Greqi (VIDEO)

Më 2 qershor të kësaj vere, Robert Duka grabiti një armë të nivelit të dytë në Tiranë te kryqëzimi i Komunës së Parisit, duke marrë rreth 15 mijë euro. Fiks 5 muaj më pas, më 2 nëntor, ende pa rënë në sytë e policisë, ai kryen grabitjen e dytë në një tjetër bankë, sërish në zonën e Komunës së Parisit.

Blutë e quajtën operacionin “Gjuetari i Bankave” dhe arritën të zbulojnë nga hetimet e kryera, se pas të dyja rasteve, fshihej i njëjti person, i cili këtë fundjavë, u arrestua.

 “Pavarësisht angazhimit intensiv të strukturave të Policisë gjatë protestave, për garantimin e rendit dhe sigurisë publike, puna hetimore për zbardhjen e ngjarjeve kriminale ka vijuar pa ndërprerje. Identifikimi i tij u arrit falë punës profesionale hetimore, përdorimit të sistemeve teknologjike për identifikimin e personave pavarësisht maskimit, si dhe analizimit të veshjeve të përdorura gjatë vjedhjeve”, tha Oliger Torba, drejtues i Policisw së Tiranës.

LEXO EDHE:
Ministri Demo: Koha e qytetarëve ka vlerë! Masa të shtuara të Policisë Rrugore për lehtësimin e trafikut në Tiranë

Robert Duka alias Albert Duka i ka kryer të dyja grabitjet, nën kërcënimin e armës së zjarrit.  Te rasti më i fundit, më 2 nëntor, blutë publikuan pamje teksa ai vjen me monopatinë, hap derën e bankës i veshur me të zeza, me kokore motori në kokë dhe me armën në dorë. Kërcënon punonjësin e sigurisë dhe më tej del nga banka me rreth 60 mijë euro në valuta të ndryshme, duke u arratisur sërish me monopatinë.

Por bankat në Tiranë s'kanë qenë shënjestra e tij e vetme. Rezulton se Duka është akuzuar në Greqi si pjesë e një grupi të strukturuar kriminal përgjegjës për 28 vjedhje në banka. Ai prej ditësh mbahej nën vëzhgim nga agjentët e policisë, pasi dyshohej se po përgatitej të largohej sërish drejt Greqisë. Bashkëshortja e tij punon në një tjetër bankë të nivelit të dytë.

 50-vjeçari u lokalizua dhe u arrestua nga policia pranë rrugës së Kosovarëve në Tiranë.

Burime për Report Tv thonë se Robert Duka jetonte në Vlorë. Në Tiranë kishte marrë një shtëpi me qira, ku edhe fshihej. Pas arrestimit, blutë i sekuestruan rrobat e përdorura gjatë grabitjes, 2 celularë, dhe 8 200 euro.

Zbulimin e të dyshuarit për grabitjen e dy bankave në Tiranë, e vlerësoi edhe ministri i Brendshëm Ervin Demo, duke vënë në dukje rëndësinë e investimeve në teknologji dhe forcimit të kapaciteteve hetimore të Policisë së Shtetit.

 “Maska nuk të fsheh nga ligji! Qytetarët duhet të ndihen të sigurt në punë, në rrugë dhe në lagjet e tyre.  Forca e shtetit duhet të ndihet nga ata që shkelin ligjin”, shkroi ministri në një postim në rrjetet sociale.

Në një konferencë për mediat, drejtori i Policisë së Tiranës, Oliger torba, tha se gjatë fundjavës policia ka finalizuar edhe dy operacione të tjera të suksesshme, rasti i një greku Michail Prokovas 51 vjec i cili erdhi nga linja Athinë-Rinas me një valixhe me 24 kg e 500 gramë kanabis. Ai kishte ikur nga aeroporti menjëherë pas mbërritjes pa e pritur bagazhin dhe u arrestua në rrugën e Durrësit për trafikim të narkotikëve. Në një tjetër operacion,  3 persona të tjerë me masë sigurie “Arrest me burg” u ndaluan, Olti Kamberi 29 vjeç, Gerti Saliu 28 vjeç dhe Sead Hajdini 20 vjeç

-------------------------------
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë

TAG:
• Tirane
• robert duka
• grabitje
• banke