Historia përmes videos/ PS feston 29-vjetorin, Rama: Nëse doni ta provoni, çojini deri në fund! Festë edhe në PD, Basha bëhet 46-vjeç

Kryebashkaiku Erion Veliaj ka uruar Partinë Socialiste në këtë 29 vjetor të themelimit të saj. Përmes një postimi në twitter, Veliaj thekson se PS është forca që s’ka rreshtur për asnjë çast së punuari për të mirën e vendit, transformimin e Tiranës dhe gjithë Shqipërisë. “Gëzuar Ditëlindjen Partia Socialiste e Shqipërisë- forca që s’ka rreshtur për asnjë çast së punuari për të mirën e vendit, transformimin e Tiranës dhe gjithë Shqipërisë”, shkruan Veliaj.

Sekretari i Përgjithshëm i Partisë Socialiste dhe njëkohësisht Drejtues Politik i Qarkut Elbasan Taulant Balla mblodhi strukturat e Partisë Socialiste në Qarkun e Elbasanit në ditën e shënuar të 29 vjetorit të krijimit të kësaj partie. Kjo ditëlindje e gjen PS në një moment të rëndësishëm tha Balla, në rrugën e integrimit europian, teksa garantoi se në mandatin e tretë PS do të qeverisë vetëm në aleancë me njerëzit e thjeshtë të këtij vendi.

“Gëzuar ditëlindjen e 29 të PS çdo anëtari e simpatizanti të kësaj partie. Kjo ditëlindje e gjen PS në një moment shumë të rëndësishëm të rrugës europiane, një angazhim i kahershëm, prej ditës së parë të krijimit të kësaj partie, në funksion të atyre vlerave që kjo parti ka promovuar në rrugën e saj, si sundimi i shtetit të së drejtës, i sundimit të ligjit, e mbi të gjitha ndërtuar këto në parimet e solidaritetit social.

Unë, ashtu sikurse shumica e shqiptarëve, konstatoj se PS është partia që e ka pozicionuar veten në anën e duhur të historisë, pra duke forcuar rolin e shtetit në shërbim të qytetarëve, duke besuar tek respekti ndaj Kushtetutës dhe ndaj ligjit dhe duke i dhënë Shqipërisë, në qeverisje, një status dhe një pozicion të rëndësishëm, jo vetëm rajonal, por edhe në aspektin rajonal. Sot gjej rastin të falenderoj të gjithë ata që kanë kontribuuar në PS, në fuqinë kryesore të ndryshimeve pozitive në Shqipëri, që tek themeluesi i parë e deri tek anëtarët e thjeshtë. Ndërkohë duke ju referuar momentit në të cilin ndodhemi, unë besoj që nga PS, duke vijuar këtë orientin proeuropian dhe duke i qëndruar besnikë aleancës së vetme politike me njerëzit e thjeshtë e të zakonshëm të këtij vendi, duhet të them që unë kam besimin e plotë, që në prill apo maj të vitit 2021, kur të zhvillohen zgjedhjet e përgjithshme, në aleancën me njerëzit e thjeshtë e të zakonshëm, ne do të fitojmë besimin e shqiptarëve për një mandat të tretë”, deklaroi Balla.

Presidenti Ilir Meta uroi socialistët për 29-vjetorin e themelimit të PS-së. "Uroj të gjithë socialistët për këtë ditë të rëndësishme për ta, dhe ti vlerësoj për ato gjëra pozitive që kanë bërë në historinë e demokracisë, të zhvillimit dhe shpresoj që të jetë një ditë reflektimi edhe për ata që drejtojnë sot dhe të tjerët" tha ai.

Një urim Meta e kishte edhe për Lulzim Bashën, që po ditën e sotme mbush 46-vjeç, ndërsa zbuloi edhe dhuratën që i kishte nisur. "Padyshim që kam nisur një urim dhe një shishe verë dhe shpresoj që edhe ai ta kalojë gëzuar dhe dy palët të reflektojnë dhe marrëveshje të tjera që të ndihmojnë integrimin" tha ai.