Një hapësirë e re është vendosur në Drejtorinë e Arkivave ku takohen historia me teknologjinë. Në këtë ambient të quajtur ‘Tempulli i Dokumenteve’, vizitorët mund ‘të shfletojnë’ të shkuarën edhe përmes imazheve, zërit e ndërveprimit, bën me dije kryeministri Rama përmes një postimi në rrjetet sociale.

“Mirëmëngjes, dhe me ‘Tempullin e Dokumenteve’, Muzeun Arkivor pranë Drejtorisë së Përgjithshme të Arkivave, një hapësirë e re ku historia takohet me teknologjinë dhe vizitori e zbulon të shkuarën përmes dokumenteve, imazheve, zërit dhe ndërveprimit, ju uroj një ditë të mbarë.”

Kalendari historik, restaurimi virtual i dokumenteve, pyetësorët mbi figura e ngjarje historike dhe rubrika mbi pasurinë dialektore të shqipes e kthejnë vizitën në një përvojë edhe informuese, edhe argëtuese.

Muzeu sjell edhe një ekspozitë të përkohshme me kodikë bizantinë dhe pasbizantinë, pjesë e “Koleksionit të Kodikëve të Shqipërisë”.

Në hapësirat përreth janë vendosur edhe postulati i personaliteteve shqiptare, ndërsa projekti shtrihet përtej muzeut, me auditoriumin, kinemanë dhe teatrin veror me 140 vende, si dhe hapësirën e studimit në natyrë.