Intervista e plotë/ Topalli: Basha lufton për interesa personale! LSI drejtohet nga Meta! Rama kundërshtari im prej vitesh! 'Lëvizja për Ndryshim' kundër të treve

Zonja Topalli, ju falënderoj që pranuat të na jepnit këtë intervistë për Report TV.

Është kënaqësi dhe ju falënderoj edhe juve.

Do të doja ta nisnim pikërisht me krijimin e kësaj lëvizjeje politike. Do të donit që ta kishit pasur më herët mundësinë që me një lëvizje të tillë të bënit opozitë ndaj qeverisë, por në njëfarë mënyre, edhe ndaj PD-së, e cila nuk po shkon ashtu siç Jozefina Topalli i mendon idealet e saj në politikë?

Në fakt ka diskutime të ndryshme, mund të ishte bërë më herët, shumë më herët. Unë besoj se është koha tani. Sigurisht që do të jenë shqiptarët ata që do të bëjnë vlerësimin në momentin e caktuar, në fund të prillit. Një ndër arsyet përse nuk është krijuar më parë një lëvizje politike, është sepse unë kam dashur, me të gjithë forcën e shpirtit tim, që reformat të ndodhnin brenda forcave politike. Për sa kohë që ne vuajmë një krizë politike përveç krizave të tjera ekonomike, sociale, shëndetësore, morale, të përfaqësimit etj., por krizat që janë derivate të asaj që kriza themelore fillon nga forcat politike, unë kam dëshiruar, kam bërë ftesë, kam shkruar për nevojën dëshpëruese që kanë të gjitha forcat politike në Shqipëri, për t’u çliruar nga pengmarrja, për të rikthyer demokracinë brenda vetes, për të rikthyer debatin brenda vetes, për të kthyer kartën morale brenda vetes. Në momentin ku ne jemi, që s’ka më kohë për të humbur, do të doja që edhe në këto momente që po flasim bashkë, të kishim drejtues politikë të rinj dhe të pakorruptuar të këtyre forcave politike. Por me sa duket, ata janë peng i shumë problemeve që kanë brenda vetes në këto kohë politike, që nuk lëvizin dhe nuk i lëshojnë karriget e tyre politike. Dhe pikërisht, kjo lëvizje që besoj se do të kthehet edhe në një lëvizje politike, ka për qëllim ose në qenien e saj është një lëvizje proteste. Është protestë kundër vjedhjes, është protestë kundër korrupsionit, është protestë kundër varfërisë së shqiptarëve, është protestë kundër mbylljes së vendeve të punës, është protestë kundër tradhtisë ë kryetarëve të partive që nuk kanë punuar për interesin publik, por e kanë zëvendësuar atë me interesin privat.

Zonja Topalli, në fjalimin tuaj për prezantimin e Lëvizjes për Ndryshim më bëri përshtypje ai momenti i fundit, kur po falënderonit të pranishmit. Ju thatë: “Faleminderit që jeni këtu edhe pas gjithë atyre presioneve që keni marrë”. Kanë shkuar këto presione edhe në kërcënime ndaj të pranishmëve që ishin?

Mua nuk më bëjnë përshtypje presionet, nuk kanë funksionuar as përpara 20 vitesh, kur jetonim në një Shqipëri të destabilizuar. Sigurisht që tani pas 20 viteve ato nuk kanë asnjë efekt. Sigurisht që kisha keqardhje për të rinjtë që ishin nën një presion të jashtëzakonshëm, por ata e kanë treguar veten që kanë integritet dhe janë njerëz të lirë dhe liria është gjëja më e bukur që brezi juaj, që ka lindur pas viteve ’90, e ka pjesë të shpirtit të tij dhe të ndërgjegjes së tij. Dhe nuk ka as kërcënim dhe as presion që t’i frikësojë apo t’i detyrojë të rrinë të heshtur e të tërhequr, në mënyrë të veçantë, në kushtet kritike të vendit tonë, kur jeta ekonomike, por edhe jeta në tërësi e çdo shqiptari dhe e çdo familjeje shqiptare është e dëmtuar në mënyrë kritike, në balancat e demokracisë dhe në balancat e ekonomisë. Unë e kam përsëritur, por dua që ta përsëris edhe sot, që një vend, ku 40% e popullsisë jeton me më pak se 45 dollarë në ditë, është një vend në buzë të greminës. Ka vetëm dy variante dhe dy mundësi. E para, që do të ishte edhe më e keqja, se e keqja s’ka fund, që të shkojë në destabilizim. Dhe e dyta, që është e mundshme dhe që mund të bëhet, por edhe që është edhe më e thjeshta, që do të jepte një kthesë të madhe për një fillim të ri, është ajo e rrëzimit të të tre kryetarëve, të cilët mbajnë peng jetën politike të Shqipërisë. Dhe ftesa ime dhe kjo lëvizje, që është një lëvizje proteste kundër këtyre tre kryetarëve, është një mundësi për shqiptarët që më 25 prill të votojnë kundër tre kryetarëve, të çlirohen nga pengmarrja e tyre, të çlirohen nga fakti ose nga realiteti ku ekonomia është e dominuar prej tyre, konsiderohet një ndërmarrje ekonomike e tyre dhe që jeta, bankat, mundësia, punësimet etj., të përcaktohen nga këta tre kryetarë. Kështu që në këtë aspekt, duke qenë një lëvizje proteste, unë besoj se përcjell protestën e çdo shqiptari që ndoshta s’ka mundësinë që të ketë hapësira publike dhe hapësira mediatike, por që thotë ato që ndien në shpirt, ankthin dhe stresin e tyre për jetën dhe për fëmijët e tyre.

Cili është target grupi që ju synoni në këto zgjedhje dhe mbi të gjitha duke marrë parasysh faktin se një lëvizje, e cila mund të shndërrohet në parti, e krijuar para zgjedhjeve mund të arrijë që të jetë një forcë përcaktuese për kabinetin e ardhshëm qeveritar? Kam përshtypjen se kjo më pas do të kishte një tjetër përgjegjësi për ju, se do të duhej të zgjidhnit midis njërit apo tjetrit, midis atyre të dyve që i sulmoni dhe u keni dalë kundër gjatë këtyre kohëve.

Po të ishte për të zgjedhur njërin apo tjetrin prej të treve, nuk do të isha këtu së bashku me ju, nuk do të isha e angazhuar në një protestë kundër të treve, por do t’ju thosha që ja ku i keni të tre dhe nëse doni të vazhdoni me këta të tre, vazhdoni. Për sa unë të kem frymë dhe mundësi, do të punoj dhe do të bëj betejën time dhe tashmë jam në fushëbetejë kundër të tre kryetarëve. Ndoshta sot nuk e imagjinojnë, por më 25 prill do të ndodhin gjëra shumë të çuditshme, ashtu siç kanë ndodhur në fakt edhe në vendet e tjera fqinje, por edhe më larg se ne, ku forcat kryesore tradicionale që kanë vendosur në Shqipëri kanë rënë dhe lëvizje të tjera kanë marrë konfirmimin e shqiptarëve.

Zonja Topalli, ndalemi pak te marrëdhënia me kryetarin e PD-së zotin Lulzim Basha. Sigurisht që ne tani jetojmë edhe në epokën e rrjeteve sociale dhe nuk mund t’i shmangin edhe ato komentet që bëhen nga ana  atyre që kanë edhe të drejtën e votës. Marrëdhënia juaj me zotin Basha apo më mirë të themi beteja, është personale që në momentin kur ai mori kryesimin e PD-së? Çfarëdo që të bënte zoti Basha, do të kontestohej nga ju dhe nga të pakënaqurit e tij në krye të kësaj force politike?

Ky është një diversion që ai përdor përmes veglave të tij, për të krijuar idenë se kjo është një çështje personale. Këtu nuk ka asgjë personale. Është e gjitha një çështje ideore, është një çështje mendësie, parimesh dhe vlerash. Unë ndahem me këdo, nëse dikush nuk pranon votën, nuk pranon debatin, kartën morale të pushtetit moral me të cilin duhet të funksionojë një opozitë, nuk pranon të bëjë betejën kundër qeverisë me të gjitha forcat por bie në nivelin e pazareve dhe të interesave private e familjare. Nuk pranoj as kur një politikan ndjek vetëm politika personale. Këtu gjërat janë shumë të thjeshta për mua, por edhe krejt distant me pjesën tjetër. Kështu që përpjekja për ta kthyer në personale është shumë infantile në fakt, por edhe djallëzore.

Jeni e zhgënjyer me kolegë të tjerë brenda PD-së, të cilët kanë poste të rëndësishme drejtuese dhe ndjekin linjën e kryetarit Basha? Apo lidershipi e ka përgjegjësinë kryesore?

Nuk merrem me të tjerët. Unë nisem nga qëndrimet politike sepse qëndrimet politike janë ato që përcjellin politikat e një force politike. Nëse unë nuk bie dakord me dezertimin nga beteja, nëse unë nuk bie dakord me dhurimin e mandateve të parlamentit kundërshtarit politik dhe qeverisë, nëse unë nuk bie dakord me dhurimin e bashkive kundërshtarit politik, këto janë gjëra themelore, janë bazale. Sigurisht që nuk bie dakord me ata që miratojnë gjëra të tilla. Por unë nuk e kam me pasuesit, me ata që janë pas. Unë e kam me atë që i detyron dhe i vë në vështirësi ata që dikur kanë qenë kolegët e mi. Por sigurisht unë jam e kthjellët që shumica e demokratëve janë të papërfaqësuar, janë të zhgënjyer, nuk ndihen në asnjë prej politikave të ndjekura deri tani nga opozita. Janë mbi 250 mijë demokratë që nuk kanë votuar dhe nuk pranojnë mënyrën e të bërit opozitë pa bërë betejë me kundërshtarin politik apo duke u kthyer në një shantazh thjesht për një agjendë ekonomike të një personi. Sigurisht që është një fokus i veçantë që unë kam ndaj tyre. Unë kam një jetë të tërë që kam bërë beteja me ta. Unë dhe ata, ne kemi dhembje. Ata që nuk kanë qenë në këtë forcë politike nuk e kuptojnë se sa preket njeriu shpirtërisht që ka besuar një jetë të tërë në parime dhe në vlera dhe i gjen ato të tradhtuara. Ndaj edhe nëse nuk bie dakord, nuk bie dakord sepse ai nuk ka bërë betejën me kundërshtarin politik, gjë që më çon në qëllimin për të bërë një betejë kundër të treve, kundër atij që është kundërshtari më i madh dhe kundër atij që ka tradhtuar pozicionin e tij të kundërshtarit të kundërshtarit.

Në daljet tuaja publike, ju keni folur shpesh për një marrëveshje midis kryetarit të PD-së Lulzim Basha dhe Kryeministrit të Shqipërisë Edi Rama. Vazhdon ajo dhe mund të ketë efekte pas 25 prillit, në kuptimin e një koalicioni të përbashkët mes dy forcave politike më të mëdha dhe kundërshtare ndaj njëra-tjetrës?

Probabilisht është një nga opsionet që nuk mund t’i përjashtosh asnjëherë, madje janë më të mundshmet. Sa për marrëveshje, ato kanë qenë permanente. Kur janë prishur për interesa ekonomike ka pasur shantazhe dhe kaq. Dhe në këtë kuptim, duhet rikthimi i pushtetit moral, rikthimi i kartës morale. Sepse nuk ka ndodhur kurrë në historinë 30-vjeçare, as nga e majta as nga e djathta, që të tradhtohet misioni i opozitarizmit siç ka ndodhur gjatë kësaj periudhe. Përndryshe ne do të kthehemi në 50 vitet e kohës së egër dhe të vjetër, në të cilën kishte vetëm një forcë politike. Madje është më e rrezikshme që të thuash se ka pluralizëm, por ky është i rremë, nuk është i vërtetë.

Ndërkohë, keni pasur në këtë ftesën që u bë fillimisht nga demokratët e Shkodrës për rikandidimin tuaj nën siglën e PD-së, përpjekje nga kryetari i PD-së lulzim Basha, pra nga ai vetë ose nga njerëz afër tij, që të keni një komunikim më personal dhe t’i sqaroni disa gjëra ose t’i diskutoni së bashku disa ide, përtej deklaratave publike?

Jo, nuk kam asnjë komunikim personal. Komunikimi është parimor dhe këtu jemi shumë larg njëri-tjetrit.

Ju ka ururar zoti Berisha për krijimin e forcës së re politike, lëvizjes së re në vend?

Unë kam një komunikim të vazhdueshëm me zotin Berisha, por jo për çështjen e iniciativave që janë në mendjen dhe në shpirtin tim prej kohësh.

Ka përgjegjësi zoti Berisha për atë se çfarë po ndodh sot në PD, duke qenë lideri historik i saj dhe në njëfarë mënyre, nuk është gjë e fshehtë nëse themi se zoti Basha ishte i preferuari i tij për të qenë në krye të asaj force politike?

Një njeri që ka dhënë dorëheqjen nga posti i kryetarit të partisë, nuk mund të mbajë përgjegjësinë e pasuesit.

Sa herë që është diskutuar një dorëheqje e mundshme e zotit Ilir Meta, apo edhe më herët, emri juaj është lakuar si Presidente e Shqipërisë. Përtej probabilitetit për të qenë diçka e realizuar apo jo, ju e keni si një dëshirë apo ambicie personale që të jeni kryetare e shtetit shqiptar?

 Asnjëherë s’e kam pasur. Dhe fakti që jemi këtu ku jemi sot, tregon edhe një herë sesa false dhe të pabazuara kanë qenë shpifjet gjatë kësaj periudhe.

Pra, nuk ka pasur asnjë komunikim disi zyrtar, p.sh. me përfaqësues të qeverisë?

Asnjëherë. Asnjëherë nuk kam dëshiruar, nuk kam menduar për një pozicion i cili nuk ka asnjë kompetencë. Mua më pëlqejnë betejat. Unë jam kjo që jam, në beteja. Nuk më pëlqejnë pozicionet komode. Edhe kësaj radhe unë ika nga pozicioni komod i të qenit afër familjes, mgjithëse ishte një dashuri e madhe ajo që kam kaluar gjatë kësaj periudhe sepse kam pasur mundësinë të rrija më shumë me familjen time, për t’u hedhur në një betejë që është e vështirë por që ia vlen ta bësh sepse në fund të fundit, unë jam optimiste për atë çfarë do të ndodhë më 25 prill.

PD-ja do të shkojë në zgjedhjet e 25 prillit 2021 në pesë forca të ndara. Zoti Patozi e ka bërë ftesën publike. Jeni duke e menduar seriozisht që të gjithë bashkë mund të bëheni ndoshta një koalicion i rëndësishëm, i cili mund të marrë shumë mandate, sepse janë figura të rëndësishme, është zonja Hajdari, zoti Patozi, Ju, zoti Murrizi, ndoshta edhe ish-presidenti Topi.

Së pari, unë dua të them që kam një keqardhje të madhe që e shoh, për shkak të politikave përçarëse, të zhdukur të djathtën shqiptare, jo vetëm nga skena politike, nga parlamenti, por edhe në përpjekje të pareshtura për ta asgjësuar atë. Dhe kjo është një tjetër arsye që unë sot kam dalë në fushëbetejë. Unë dua që e djathta shqiptare të përfaqësohet dhe për të arritur këtë nuk hezitoj që të bashkëpunoj me këdo që është kundër tre kryetarëve, që do të ndihej i përfaqësuar tek e djathta shqiptare, që do të përfaqësonte të gjithë ata demokratë të cilët janë përzënë nga shtëpia demokratike, por të përfaqësojë edhe të gjithë ata shqiptarë që ndoshta s’kanë qenë me asnjë parti ose edhe kanë qenë me parti të spektrit të ndryshëm, të cilët mund të jenë progresistë por janë të zhgënjyer nga politika e këtyre viteve të fundit. Prandaj them që kjo lëvizje është lëvizje proteste. Është protestë kundër mjerimit, kundër pasigurisë, kundër pabarazisë, kundër kapjes së shtetit, kundër vjedhjeve, është protestë kundër të treve.

Ka komunikime konkrete nga ana juaj me këta emra që përmendëm?

Është shumë herët për të folur për këtë meqenëse ende jemi në hapat e parë.

Pak muaj më parë u bë publik në të gjitha mediat një lajm se ju kishit pasur një takim me ambasadoren e SHBA-ve zonjën Juri Kim, në Tiranë. A është i vërtetë një informacion i tillë dhe nëse po, për çfarë diskutuat?

 Kemi diskutuar shumë gjatë për të gjitha zhvillimet politike, ekonomike, për të ardhmen e vendit tonë dhe për nevojën për të pasur një vend, i cili ka nevojë për një qeveri që del nga vota e lirë, ka nevojë për një opozitë që nuk tradhton misionin e saj, ka nevojë për të luftuar korrupsionin, ka nevojë për të pasur një administratë që t’u shërbejë qytetarëve, ka nevojë për t’u dhënë shpresë të rinjve.

Ishte ambasadorja Juri Kim një nga iniciueset apo mbështetëset e para që ju të ktheheni në politikë dhe të keni forcën tuaj politike?

Jo, nuk mund ta them këtë. Nuk qëndron një gjë e tillë. Biseda ka qenë e gjerë, parimore dhe për zhvillimet, por nuk ka lidhje as me iniciativat personale, as me rastin në fjalë.

Takimin e kërkuat ju apo zonja Kim?

Mendoj se është më korrekte po të mos jap përgjigje.

Flasim pak për PD-në e Shkodrës, një seli e rëndësishme e selisë blu në Tiranë, e cila gjatë këtyre kohëve ka pasur debate të brendshme dhe problematika të shumta. Si e sheh Jozefina Topalli atë çfarë është duke ndodhur në qytetin verior?

Ajo që po ndodh në çdo qytet të Shqipërisë, ku strukturat janë shkretuar nga vlerat, ku njerëzit ndihen të braktisur, ku demokratët ashtu si pjesa tjetër e Shqipërisë dinë që do të shkojnë për të votuar, por nuk kanë një alternativë të vërtetë, meqenëse nuk ndihen të përfaqësuar nga asnjë prej tre kryetarëve. Dhe kjo lëvizje që lind si lëvizje proteste, besoj dhe dua që të jetë një alternativë për të gjithë ata që deri në këtë moment nuk dinin se ku të çonin votën e tyre.

Mendoni se ka ardhur momenti që ndoshta të jepni edhe emra të tjerë të rëndësishëm të politikës shqiptare që mund t’i bashkohen Lëvizjes për Ndryshim? E bëj këtë pyetje nisur nga PD-ja e Shkodrës. P.sh. ju keni kontaktet atje me figura të pakënaqura me zotin Basha, siç rezultoi edhe me listën e kandidatëve, për t’u bashkuar me ju?

Unë nuk jam shkëputur kurrë prej demokratëve, as të Shkodrës, as të gjithë Shqipërisë. E përsëris që lidhja ime është e pazgjidhshme me demokratët. Edhe kur ata nuk kanë votuar më 2017, kanë qenë me një dhembje të madhe dhe unë i kam kuptuar. Kemi beteja për vite të tëra bashkë. Jeta e tyre është afër përpjekjeve tona të përbashkëta. Nuk i lidh asgjë me ata që u bënë demokratë më 2005, as me ata që abuzuan nga pushteti i pas këtij viti, duke qenë në pushtet. Janë njerëz idealistë, kanë rrezikuar jetën e tyre, kanë besuar në një ëndërr, kanë dashur një Shqipëri të mirë dhe sigurisht që unë do të dëshiroja shumë që t’i përfaqësoja ata, bashkë me ta.

Zonja Topalli, nëse mund të ndodhë që në zgjedhjet e vitit 2021 zoti Basha të humbë, ju e synoni një rikthim te PD-ja, pse jo edhe në postet më të larta drejtuese?

Unë jam pjesë e forcave demokratike.

Selisë blu?

Unë nuk mund të jem kurrkund tjetër përveçse përfaqësuese e një shpirti demokratik, por unë nuk jam e rremë. Unë jam kjo që jam sepse nuk jam e rremë. Unë nuk shkoj pas dy germave apo pas një sigle. Unë shkoj pas atyre vlerave që kam besuar dhe për të cilat kam bërë një betejë të pandalshme, pa menduar asnjëherë as për rriskun, as për atë që mund të humbja. I kam filluar betejat kur kam qenë 30 vjeçe dhe kisha dy fëmijë të vegjël që i lija në shtëpi, dilja në orën 5 të mëngjesit dhe kthehesha pas mesnate. Kam udhëtuar në çdo kënd të Shqipërisë. Kështu që mua nuk më ndan asgjë nga parimet e mia.

Më e butë ndaj jush duket kryetarja e LSI-së zonja Monika Kryemadhi, e cila nuk ka pranuar asnjëherë të komentojë deklaratat e zotit Basha ndaj jush dhe duke thënë që LSI-ja është e hapur për koalicion dhe për bashkëpunim me çdokënd që është kundër Edi Ramës. Komenti juaj?

E përsëris edhe një herë, që unë jam shumë e qartë. Vendi ynë ka nevojë për t’u çliruar nga tre kryetarët dhe 25 prilli do të japë një përgjigje ndaj tre kryetarëve që mbajnë peng këtë vend.

Çfarë ka ndryshuar nga tre kryetarët që janë aktualisht me zotin Berisha, që për 8 vite ka qenë një kryetar që ishte drejtues i Shqipërisë? Pra në kuptimin, që atëherë nuk ishte Shqipëria e tre kryetarëve, por ishte e zotit Berisha, që pavarësisht termit, edhe ai ishte një kryetar. Pse tani ka nevojë për ndryshim që të mos jetë më në duart e një apo të një emri tjetër?

Sepse gjatë kësaj periudhe është vrarë vota dhe demokracia, si edhe vlerat e dozat e idealizmit brenda forcave politike.

Ndërkohë që do të flasim sigurisht edhe për emrat, por të rikthehemi tek emrat e rëndësishëm që mund të ketë Lëvizja për Ndryshim. Këmbëngul te kjo sepse përveç zonjës Topalli, është i madh kurioziteti për ata kandidatë, të cilët do të përfaqësojnë siglën tuaj, përveç të rinjve që sigurisht kanë zënë një hapësirë të rëndësishme.

Unë mendoj që ata që janë 35, 45 apo 50, por edhe më shumë, janë brezi më i përshtatshëm për të përfaqësuar shqiptarët. Ata në vetvete përcjellin një mesazh për t’u thënë të rinjve që të mos largohen nga Shqipëria por të punojmë bashkë, të mos lejojmë që të boshatiset vendi për të bërë një Shqipëri më të mirë këtu ku jemi, në shtëpinë tonë. Sot është herët për të thënë emra të tjerë, por unë besoj se gjatë rrugës kemi kohën e duhur për të folur përsëri dhe për ta zgjeruar bisedën tonë qoftë edhe me emra të tjerë.

Nuk mund t’i shmangemi situatës së zgjedhjeve në SHBA. Tashmë rezultatet e para bëjnë Biden kryesues të Shtëpisë së Bardhë. Ju jeni një njohëse e mirë e politikës së jashtme, por edhe e marrëdhënieve që ka Shqipëria me SHBA-të. Sipas jush, kush do të ishte më i përshtatshëm në krye të Shtëpisë së Bardhë?

Marrëdhëniet me SHBA-të nuk kanë ndryshuar kurrë në varësi të presidentit, pavarësisht se nga cila forcë politike vjen. Ne kemi një marrrëdhënie partneriteti të jashtëzakonhëm dhe kjo është gjëja më e rëndësishme për ne shqiptarët.

Pra, nuk ka rëndësi emri?

Marrëdhëniet me SHBA-të janë themeli i vokacionit Perëndimor, përveç Evropës.

Ka Jozefina Topalli një emër të preferuar mes dy kandidatëve?

Nuk preferoj të flas.

T’i rikthehemi shkurtimisht komisionit për vlerësimin e kandidatëve në PD. Përveç jush, që fillimisht mund të jeni pasur rezervat tuaja, edhe brenda PD-së ka pasur të pakënaqur, edhe emra të rëndësishëm. Pse ishte fyerje për ju kërkimi i një formulari dhe i një dokumenti për të shkuarën? Ky komision, duke lënë këta emra të rëndësishëm jashtë, a ka vërtetuar se është një komision i pavarur nga zoti Basha?

Nuk dua të gjykoj komisionin sepse unë shoh thelbin te mënyra e procedimit që s’ka lidhje me komisionin, qoftë me formularin që është fyes, qoftë edhe me formularin e dytë që kërkon që çfarëdo të ndodhë nga përzgjedhja apo nga eliminimi nga lista për kandidim, ti duhet të mbyllësh gojën dhe s’ke të drejtë të ankohesh dhe të thuash asnjë fjalë pakënaqësie. Ky është enverizëm. Përveç faktit që ka krijuar, në fillimet e veta, ky proces krijoi një luftë civile brenda forcës politike. Nuk e meriton PD-ja që ta fusësh në procese ku të votosh më të keqin. Nuk votohet më i keqi, as nuk votohet për inat. Votohet ai që ka emrin më të mirë, reputacionin më të mirë, ai që mbledh vota më shumë, jo ai që është servil më shumë apo ai që të propozon kunati. Kjo është e papranueshme. Ndaj edhe po them që di të bëj ndarje edhe shqetësimi edhe problemet e mëdha që ndodhin brenda asaj force politike.

Besoj se e keni ndjekur në njëfarë mënyre debatin me tone deri diku të buta, por jo edhe aq, midis zotit Berisha dhe Genc Rulit. Zoti Ruli thotë që në politikë mund të jesh i dobishëm edhe jashtë parlamentit, ndërsa zoti Berisha thotë që zoti Ruli është viktimë e mençurisë së tij. Sipas jush, a duhet të kandidojë edhe një herë zoti Berisha?

Nuk i hyj kësaj teme. Unë nuk hyj tek ata njerëz që gjykoj tjetrin nëse flet apo nuk duhet të flasë. Nuk është e drejta ime, nëse duhet të ndërmarrë një veprim apo jo. Ne prandaj jetojmë në liri, që të bëjmë zgjedhjet tona. Dhe unë repektoj çdo zgjedhje, të çdo njeriu. Unë di që influenca e zotit Berisha është shumë e madhe në opinionin publik dhe vazhdon të jetë e rëndësishme.

Ku do të kandidojë Jozefina Topalli në zgjedhjet e 25 prillit?

Kjo është gjëja më e parëndësishme, por unë betejën do ta bëj në Tiranë, por edhe në çdo qytet të vendit tonë. Dua të sqaroj një gjë, që në këtë betejë nuk hyj thjesht për të marrë një karrige parlamenti, sepse mund ta kisha siguruar edhe në variantin e mëparshëm që ju thatë. Unë e kam pasur këtë karrige për vite të tëra dhe nuk më jep, nuk më shton asgjë nga ajo që kam pasur. Unë i kam arritur të gjitha këto gjëra në jetën time politike. Beteja që po bëj nuk është për veten time. Në fakt është një sakrificë që kam ndërmarrë, por e bëj në emër të të gjithë atyre me të cilët kam punuar 20 vite rresht, edhe të atyre që ndoshta nuk i kam pasur përkrah por që janë të zhgënjyer nga të tre kryetarët në këtë moment që ne po flasim.

Besoj se e keni dëgjuar që me ndryshimet kushtetuese, ju jepet mundësia që të kandidoni në më shumë se një qark, si emër i parë duke qenë kryetare e kësaj force politike. Apo nuk do të jeni ju?

Me kohë do të flasim përsëri dhe do të diskutoj me ata me të cilët unë do të bashkëpunoj.

Dhe së fundi, marrëdhëniet me zotin Rama. Jo për t’iu përgjigjur komenteve që janë bërë sepse ndoshta kushdo ka të drejtën e tij për të dhënë koment, por në fakt a keni një komunikim personal institucional me Kryeministrin e Shqipërisë zotin Rama?

Kryeministri i Shqipërisë është kundërshtari im politik prej shumë vitesh. Dhe sot më kundërshtar se asnjëherë sepse është një kryeministër që po e lë vendin tonë me një popullsi që e ka në 40% varfërinë ekstreme. Do ta përsëris që është shifra më e frikshme në historinë e tri dekadave, e patolerueshme dhe që rrezikon që ta çojë vendin në destabilizim në qoftë se nuk merret një kthesë e rëndësishme kundër këtyre tre kryetarëve. Një kryeministër, betejën me të cilin e kam bërë në parlament, pa dezertuar, përballë, kur ai kishte futur figura të cilat kishin rekorde kriminale. Një kryeministër i cili do të ketë një njollë në historinë e politikës shqiptare për faktin se gjatë qeverisjes së tij, shqiptarët nuk e ndienë veten dhe ai nuk i krijoi mundësinë që ata të jetonin një jetë normale të mundshme brenda familjes së tyre, por u detyruan që të ikin. Sigurisht që këtu dua të jem edhe e drejtë. Ata kanë ikur sepse nuk kanë parë as perspektivën dhe as shpresën as te pala tjetër. Ndaj edhe them që ajo lëvizje do të jetë një lëvizje proteste kundër të treve. Të tre kanë përgjegjësi. Të gjithë ne jemi bashkëfajtorë në tolerimin që u kemi bërë, por përgjegjësit kryesorë janë tre persona që kanë emra dhe beteja kundër tyre mund të fitohet më 25 prill me një lëvizje të thjeshtë, me një votë kundër tyre dhe me një votë pro lëvizjes së protestës kundër tyre.

Një koment për presidentin Ilir Meta, ose për Ilir Metën si politikan në rolin e tij si president? Kemi pasur akuza shumë të ashpra edhe kundër Kryeministrit të Shqipërisë Edi Rama, edhe institucionalisht ka vazhduar një luftë e gjatë përplasjesh, aq sa sot nuk kemi një ministër të Jashtëm, por e kemi në detyrë zotin Cakaj sepse zoti Rama mban postin e ministrit për shkak se zoti Meta nuk e ka dekretuar.

Këta kanë shfrytëzuar mungesën e Gjykatës Kushtetuese, prandaj asgjë nuk shkon në vendin tonë, për të lëvizur, duke iu larguar disa herë Kushtetutës, që është shumë e rrezikshme për vendin tonë. Dhe jo më kot e përsërita që dëmtimet janë kritike në prishjen e ekuilibrave dhe të balancave ekonomike dhe demokratike në vendin tonë. Dhe për këtë janë fajtorë tre persona, tre kryetarët e partive, ndaj të cilëve ne kemi mundësi që t’i rrëzojmë më 25 prill.

Pse thoni tre kryetarët e partive, sepse te LSI-ja është zonja Kryemadhi drejtuese, jo zoti Meta?

Ne jetojmë në Shqipëri dhe e dimë se kush është realiteti.

         

B.K./xy/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Like: 10/05/2021 03:53

    Ik moj vejusha e zeze qe keni 30 vjet qe keni vjedhur dhe shkaterruar kete Shqiperi

    Përgjigju
  • PPSH=PD: 05/11/2020 15:40

    Je "xhakete e re" po model i vjeter. Nuk te beson njeri, ti dhe sala qe ne 90 e deri 2020 keni devizen " enverizem". Shteti, mireqenia, ekonomia,qetesia e popullit,meritokracia e njerezve qe i degdiset me lloj lloj menyrash nga vendi i tyre per 30 vjet, i vrate,i plackitet shqiptaret tre breza, femijet ua rrembeu emigracioni pa adresa, kurse prinderit e tyre pas, me pension qesharak qe s'marrin dot as ilacet. Pse t'ju besojne juve, kush ju financon, a perfituat privilegje ju si politikane ( pamvaresisht partise)ne keta 30 vjet? Partia jote i kthen shqiptaret 30 vite pas. Shko neper bote sigurou shqiptareve " cekun e bardhe" dhe s'ke nevoje te besh propagande. Partise ndryshoi emrin,quaje partia e mireqenies.

    Përgjigju
  • Sondazhi i ditës:

    Mendoni se komisionet hetimore për Shëndetësinë e TIMS do kenë rezultat?



×

Lajmi i fundit

GJKKO firmos masë të dytë sigurie për Taulant Tushen

GJKKO firmos masë të dytë sigurie për Taulant Tushen