Ish-këshilltari izraelit për Sigurinë në Report Tv: Raketat e Hamasit, dorë e Iranit për të penguar paqen me vendet arabe! Me Shqipërinë na bashkon historia

Ish-këshilltari izraelit për Sigurinë në Ministrinë e Shtetit, Davidi Hermelin, në një intervistë ekskluzive për Report Tv ka shpjeguar atë që po ndodh në Rripin e Gazës pas 67 ditëve luftë mes Izraelit dhe Hamasit.

Në emisionin 'Studio Live' me gazetarin Arbër Hitaj, Hermelin tha se sulmin e Hamasit mëngjesin e 7 Tetorit e urdhëroi Irani, kjo si një përpjekje për të ndalur pëpjekjet për marrëveshje mes Izraelit dhe vendeve të botës arabe. Hermelin thotë se Irani është financuesi i Hamasit në Gaza, Hezbollahut në Liban dhe Huthit në Jemen, të treja organizata terroriste që duan të zhdukin Izraelin.  

Davidi Hermelin thekson se Irani është kërcënim direkt edhe për Europën, sepse sipas tij një marrëveshje paqeje mes Izraelit dhe Arabisë Saudite, do të pasohej edhe nga një tubacion që do të përçonte naftë drejt Europës. Ideologjia e sponsorizuar nga Irani është ajo naziste, shton Hermelin, duke shtuar se Izraelit do t’i duhen 20-30 vite për të denazifikuar shoqërinë palestineze.

Ish-këshilltari izraelit për sigurinë shpjegon edhe arsyet se pse sipas tij palestinezët nuk mund të kenë shtetin e tyre. Sa i takon asaj që po ndodh në Gaza, ku numri i viktimave civile besohet të jetë rreth 14 mijë, Hermelin thotë se Izraeli i ka njoftuar gjimonë në kohë palestinezët që të mbrohen. Sipas tij, sulmi izraelit në Gaza nuk është proporcional duke shtuar se krimet e Hamasit në tokën hebrenje janë më çnjerëzore.

Hermelin flet edhe për lidhjet mes Shqipërisë dhe Izraelit teksa sjell në vëmendje se hebrenjtë nuk e harrojnë Besën e shqiptarëve në Luftën e Dytë Botërore që i shpëtoi ata nga nazistët. “Ky është shteti i shteti i vetëm në botë që patëm më shumë hebrenj pas holokaustit”, tha ai.

Intervista e plotë

Arbër Hitaj: Zoti Davidi, faleminderit që jeni pjesë e Studio Live në Report Tv!
Davidi Hermelin: Faleminderit juve për ftesën, është nder dhe ndihem i privilegjuar që jam me ju.

Arbër Hitaj: Si është situata në Rripin e Gazës, por edhe në Izrael, si e shikoni ju nga prespektiva juaj?
Davidi Hermelin: Unë i shikoj gjërat me sytë e një shtetasi izraelit, nuk pretendoj se jam objektiv ose akademik, por si një patriot i vërtetë izraelit kam një këndvështrim timin ndoshta dhe subjektiv. Unë nuk flas në emër të qeverisë apo të partisë në rastin konkret, por si një qytetar izraelit dhe jam zëri i shumë qytetarëve të tjerë, që mjaft është mjaft. Kemi situata të njëjta që ngjajnë me rrethe vicioze. Ka disa zëra që thonë se po të linim administratën e Hamas të qetë në Gaza, do të kishim kohë më të qeta. Por qartazi ne nuk duhet të harrojmë se Hamasi ashtu si Hezbollahu në Liban, janë organizata terroriste të mbështetura nga Irani në brigjet e Mesdheut. Mos të harrojmë se Izraeli ishte shumë pranë arritjes së një marrëveshje me Arabianë Saudite, dhe e arriti edhe me shumë shtete të tjera arabe, me marrëveshjen “Abraham”. Iranianët nuk mund ta lejonin paqen në Lindjen e Mesme pasi humbasin shumë. E keni parë si i manipulojnë shoqëritë në Liban, në Gaza, në Jemen, e shumë vende të tjera. Qartazi regjimi iranian nuk dëshironte që të kishim një marrëveshje paqeje me Arabinë Saudite. Prandaj ata urdhëruan sulmin pikërisht tani. Por ky është edhe një kërcënim direkt ndaj Europës, sepse një paqe mes Izraelit dhe Arabisë Saudite, do të pasohej edhe nga një tubacion që do të përçonte naftë drejt Europës. Por, kjo do të dëmtonte interesin e Iranit dhe disa partnerëve të tij. Irani nuk donte që ne të kishim paqe, prandaj përdoren Hamasin dhe Hezbollahun në Libi. Nëse e shikojmë në një prespektivë më globale gjithë pjesën e bregdetit në Gaza dhe në Liban, po kontrollohet nga Irani, dhe në mes është vetëm një dritare, që është Izraeli. Pra, fortesa e perëndimit për demokraci, për siguri për NATO-n, Bashkimin Europian dhe vetë SHBA. Edhe regjimi në Iran nuk do që të kemi sukses, prandaj po shikojmë shumë foto të dhimbshme nga masakra në Izrael, por edhe në Rripin e Gazës, por ne kemi të drejtën të mbrojmë popullin tonë.

Arbër Hitaj: A besoni se Irani është pas sulmeve në Izrael, pa harruar faktin se Teherani zyrtar tha se ne e mbështesim Hamasin, por nuk kemi lidhje me sulmin?
Davidi Hermelin: Ata e mbështesin Hamasin, që ka një ideologji naziste, me hebrejtë. Ky është një element shumë i rëndësishëm që duhet të kihet parasysh edhe në të ardhmen, nëse duam ta krijojmë atë. E ardhmja nuk mund të jetë asnjëherë e qetë, nëse do të kemi një regjim në Iran që do të prodhojë bombën bërthamore dhe kujtojmë që është valvula e vetme e sigurisë për një regjim të çmendur si ai i Teheranit që të mbijetojë. Është i çmendur, por edhe shumë i zgjuar, sepse destabilizon edhe rajone të tjera në Lindjen e Mesme. Por shoqëria iraniane dhe e fqinjëve të vet duhet ta kuptojnë me mesazhe të forta se nuk do të jenë kurrë në gjendjen që të krijojnë kapacitete bërthamore. Do të ishte mirë që ky regjim të ikte, për të mirën e Europës dhe vetë rajonit. Dhe ne do të duhet të fokusoheshim te denazifikimi i këtyre shoqërive, procese që kanë ndodhur në Gjermani dhe Austri pas Luftës së Dytë Botërore.

Ju duhet të kuptoni, Gaza nuk ka qenë e pushtuar që nga viti 1993, ne ia kaluam autoritetin në Gaza palestinezëve, më pas në 2005 ne u larguam nga Gaza të gjithë, dhe ua lam atyre. Asnjë hebre nuk qëndroi në Gaza dhe kjo tregon se argumenti se janë të pushtuar nuk qëndron. Autoriteti Palestinez mori pushtetin, por më pas Irani urdhëroi revolucion kundër tyre dhe Hamas mori kontrollin dhe lëshon raketa ndaj Izraelit pa pushim. Raketat e vogla ata mund t’i prodhojnë vetë, por ato të mëdhatë, janë dora e Iranit. Duhet të jemi të qartë, Irani mbështet ekonomikisht, ideologjikisht, politikisht, Hamasin, Hezbollahun në Liban dhe Huthit në Yemen.

Nëse duam një Lindje të Mesme të qetë duhet të merremi me këtë regjim të çmëndur të Iranit dhe e dyta edukimi i shoqerisë palestineze. Sipas një sondazhi palestinez bërë në universitetin e Bregut Perëndimor, ka një mbështetje shumë të lartë për Hamasin në zonën e Bregut Perëndimor, jo në Gaza ku ata e kontrollojnë. Madje mbështetja është më e lartë se në Rripin e Gazës, sepse e kanë parë si është Hamasi. Që kur i kemi lënë të lirë në Bregun Perëndimor, kemi parë se në vend të paqes, ata thonë se të gjithë hebrejtë duhet të vriten. Në një mënyrë e njëjtë me regjimin nazist, atyre ju bëhet lavazh truri që në kopshte, në shkollat verore, në universitete, gjimnaze e kudo. Dhe narrative kryesore është t’i vrasim hebrenjtë. Le të themi të vërtetën sipas meje, nuk ka shtet palestinez si nocion apo komb, ata janë thjesht emigrantë të paligjshëm. Shumë nga ata erdhën në shekullin e 20 në tokën e Izraelit, që quhej Palestinë nga romakët e vjetër. Palestina nuk është emër shteti, por emërim administrative i Levantit nga perëndimi. Dhe u quajt kështu nga ish-perandori Adrian, për të emigruar hebrenjtë dhe u quajt sipas një termi shumë të vjetër bazuar në Filistinë, që do të thotë pushtues. Dhe kur themi duhet të krijohet një shtet palestinez, kemi të bejmë me një shtet “pushtues”. Këtë e thashë për të kuptuar kontekstin. Por nëse duan të njihen si shtet, e kanë të vështirë, nuk kanë asnjë aspekt kulturor, tradite apo historike. E vetmja gjë që i bashkon është dëshira për të zhdukur hebrejtë. Pra, ideja nuk është të kemi një shtet palestinez, por ekzistenca e vetëm shtetit të Izraelit. Të gjitha shtetet arabe duan paqe me ne, me përjashtim të Iranit, që e përdori për të krijuar tension dhe më pas manipuloi botën arabe.

Arbër Hitaj: Ne ndoshta biem dakord në shumë gjëra, siç mund të kem dhe unë mendime të ndryshme, por ka shumë civilë të vrarë dhe fëmijë në Gaza, a besoni se duhet të ndryshojë diçka në operacionin ushtarak në Gaza?
Davidi Hermelin: Ne flasim për reagim proporcional. Çfarë do të thotë kjo? Më ler ta sqaroj, nëse do të ishim proporcional në reagim do të duhej të përdhunonim gra në Gaza! Do të duhej të digjnim fëmijë, siç bënë ata. Do të duhej të nxirrnim embrionin nga barku i një nëne dhe ta gjuanim me plumb në kokë, siç bënë ata. Apo do të duhej të zienim të gjallë në tenxhere një fëmijë, t’i përdhunonim të ëmën dhe ta detyronim babain ta shikonte, siç bënë ata! Ata detyruan babain që ta shikonte si zihej në ujë fëmija i tij, a e kuptoni çfarë masakrash janë këto? Ne nuk jemi as fare fare në proporcion, madje nuk duam të jemi. Ne në Izrael mendojmë se njerëzit në Gaza janë viktima të Hamasit, jo të Izraelit. Mos të harrojmë, ata e votuan Hamasin e mbështetën atë dhe shumë ende e mbështesin. Ata gjithë ditën e masakrës festuan, asnjë nuk mendoi si të largohej sepse Izraeli do të reagonte.

Të marrim një shembull tjetër, nëse organizata kriminale në Tujuana në Meksikë, të më falin miqtë e mi meksikanë, por e kuptojnë për çfarë e kam fjalën, do të sulmonin dhe masakronin mijëra amerikanë në Orange Country në Kalifroni, a do të ekzistonin më? Unë besoj që jo. Izraeli priti 7 ditë duke ju dhënë mundësi qytetarëve, civilëve në Gaza që të mbrohen ose të largohen. Si asnjë ushtri tjetër në botë, ne i marrim në telefon banorët e çdo pallati, çdo shtëpie dhe ju themi të largohen sepse do të ketë sulme dhe bombardime, ikni. Shumë janë larguar meqë ra fjala. Por, mos harroni një rrjet të gjerë me tunele nën Gaza që përdoren nga terroristët. Këtu kanë shkuar shumica e parave të perëndimit. Liderët politikë i morën lekët për ndihma dhe i përdorën. Ne duhet t’i shkatërrojmë këto tunele. Por duhet të bombardojmë godinat nga lart, prandaj i kemi lënë të largohen. Por, duhet të jem i ndershëm me ju, nëse dikush nuk ikën kjo nuk duhet të na ndalojë ne nga bombardimi. Sepse detyrimi im është të mbroj fëmijët e mi dhe nëse dikush nuk ikën edhe pas thirrjeve që ju kemi bërë ne, si asnjë shtet tjetër në botë, unë kam të drejtë të bombardoj.

Arbër Hitaj: Në lidhje me sulmin e Hamasit, a besoni se ka patur një dështim në aspektin e sigurisë, por edhe dështim politik nga ana e zotit Netanjahu?
Davidi Hermelin: Çdo njeri në majën e piramidës është përgjegjës për atë që ka ndodhur, pa përjashtim. Sepse ka përgjegjësi, por jo faj në mënyrë direkte. Patëm një dështim ushtarak fillimisht, pa asnjë dyshim, por jo në aspektin politik. Unë jam dakord me politikat e zotit Netanjahu sepse besoj, ishte më mirë që e lamë Hamasin të ekzistonte, sepse opsioni i dytë do të ishte shteti Palestinez që do ishte i drejtuar nga Hamasi, do të ishte më agresiv dhe do të bënte dëm shumë më të madh ndaj nesh. Imagjinojeni pak në Bregun Perëndimor të kishim një shtet palestinez që me ndihmën e Iranit do të bënte masakra të shumta ndaj civilëve. Mund të kishim mijëra fëmijë të vrarë në Izrael. Nëse doni mendimin tim, nuk duhet të ketë kurrë shtet palestinez, por edhe nëse do të diskutohej, për të cilën unë nuk jam kundër asnjë lloj diskutimi. Një gjë duhet të jetë e qartë, duhen 20 ose 30 vjet për të bërë denazifikimin e shoqërisë palestineze, jo vetëm në Gaza, por edhe në Bregun Perëndimor, ne nuk mund të duan një shtet të tillë si fqinj. Sepse janë shumë agresivë kundrejt nesh, janë për të vrarë ne. Prandaj, unë mendoj ata as kanë të drejtë të kthehen, ata kanë kartën e refugjatit nga OKB, kështu që, le të shkojnë ku të duan.

Arbër Hitaj: Unë e kuptoj irritimin tuaj, ndoshta edhe unë në vendin tuaj do të kisha të njëjtën qasje, por a ju duket kjo qasja e duhur për paqe përfundimtare në Lindjen e Mesme?
Davidi Hermelin: Unë nuk jap fare sugjerime për proceset e paqes, por ky është një diskutim që duhet bërë. Por duhet të biem dakord që nuk është një diskutim që nuk mund të bëhet fare në këtë moment. Për sa kohë regjimi i Iranit ekziston ende. Dhe ka edhe potencial për armë bërthamore dhe sa kohë shoqëria palestineze nuk denazifikohet dhe që hebrenjtë nuk janë për t’u vrarë, ata duhet të edukohen që hebrenjtë nuk janë fëmijë derrash, si i kanë në tekstet shkollore. Meqë ra fjala, këto tekste janë sponsorizuar nga agjencia e refugjatëve në Gaza, UNRAH. Pra, bota ka sponsorizuar një ideologji naziste. Prandaj, fillimisht le të presim një brez ose dy të denazifikuar dhe më pas flasim për fqinjësi të mirë.

Arbër Hitaj: Por çfarë ndodh më pas, cilët janë skenarët e të ardhmes së afërt?
Davidi Hermelin: Nëse duam stabilitet në Lindjen e Mesme, Izraeli duhet të ketë mbështetjen e Botës, Europës dhe NATO-s. Sepse Sauditët janë duke parë, nëse izraelitët janë të dobët, atëherë do të bëjnë marrëveshje me Iranin, nëse shikojnë që në Lindje e Mesme flitet vetëm arabisht, dhe jo hebraisht apo shqip. Dhe do ta harrojnë gazjellësin nga Arabia që do të sillte stabilitet në Europë. Por nëse Izraeli do të kishte mbështetjen e Europës dhe do ta mbështesin deri në shkatërrimin total të Hamasit, atëherë Arabia Saudite do të ulej me ne të negocionte dhe bashkëpunonte për paqen kundër regjimit të Iranit.

Arbër Hitaj: Dua një koment edhe në lidhje me pozicionin e qeverisë shqiptare pro Izraelit?
Davidi Hermelin: Dua ta them se me këto që jam takuar, kam ndjerë se ka shumë mirëkuptim për atë që po ndodh në Gaza. Ndoshta është sepse ju keni vuajtur në të kaluarën. Ne kemi një histori që na bashkon në periudhën e Luftës së Dytë Botërore. Kemi raporte unike, nuk e harrojmë kurrë Besën, atë që keni bërë në Luftën e Dytë Botërore. Dhe ju them se shumë nga njerëzit e edukuar në Izrael ndoshta jo të gjithë e dinë, për mua duhen më shumë ta njohin. Ky është shteti i shteti i vetëm në botë që patëm më shumë hebrenj pas holokaustit. Kemi gjithashtu marrëdhënie shumë të mira, bazuar në vlera të forta. Dua ta përdor këtë mundësi për të falenderuar popullin shqiptar, qeverinë tuaj, të gjithë anetarët e Parlamentit, të gjitha partitë. Unë isha këtu pak muaj më parë, në ditën përkujtimore për holokaustin, pashë mbështetje të madhe për shtetin tonë. Dhe dua t’ju falenderoj realisht të gjithëve ju dhe shpresoj që këto kohë të vështira do ta forcojnë miqësinë tonë dhe së bashku të ecim përpara drejt të ardhmes.

Arbër Hitaj: Zoti Helevin, faleminderit që ishit në “Studio Live”.
Davidi Hermelin: Kënaqësia e imja.

Rendit zhvillimet sipas orarit:

Të Fundit Të Parat

B.K/Shqiptarja.com

TAG:
• studio live
• Davidi Hermelin
• lufta ne rripin e gazes
• Izrael
• sulmohet izraeli
• Hamas
• iran