Kanadaja dhe 'pushtuesi' Covid 19! Gazetari Smaka: Fatmirësisht nuk ka shqiptar të prekur, vaksina mendohet për vitin e ardhshëm

Për Covid-19, nuk ka shtete të mëdha e shtete të vogla. Nuk ka shtete të varfra dhe shtete të pasura. E gjitha bota po vuan pasojat e virusit vdekjeprurës. Edhe Kanadaja, superfuqia botërorë, ka mijëra të prekur e dhjetëra të vdekur. 3358 persona janë infektuar, ndërsa 36 të tjerë kanë humbur jetën. Detajet i dha në një lidhje të drejtpërdrejtë nga Toronto në edicionin qendror të lajmeve, gazetari Emanuel Smaka. Ai dha lajmin e mirë se në komunitetin me rreth 5000 shqiptarë, deri tani nuk ka asnjë person të prekur me virusin e rrezikshëm.

Smaka, gjatë komunikimit me gazetarin Besard Jacaj, ka deklaruar se janë mbyllur deri tani të gjitha bizneset që nuk janë esenciale ose të domosdoshme, ndërsa transporti publik vijon të jetë i hapur, për shkak edhe të largësisë që kanë njerëzit atje me vendet e punës. Sa i takon ndërgjegjësimit, kanadezët duket se i kanë marrë edhe vetë masat duke mos dalë pa nevojë dhe duke respektuar distancat e sigurisë.

Kanadaja ka një sistem shëndetësor shumë të zhvilluar dhe për këtë duket se janë marrë të gjitha masat për përballimin e kësaj situate. Gazetari Smaka tha se edhe nëse do të ketë një zbulim të vaksinës ndaj Covid-19, ajo mund të hyjë në përdorim vitin e ardhshëm. Kanadaja do të paguajë të gjithë ata persona që janë detyruar të rrinë në shtëpi, ndërsa ka edhe disa paketa sociale me ndihma ekonomike që do të vihen në zbatim.

d.ba./r.k./Shqiptarja.com
  • Sondazhi i ditës:

    'Lufta' ndaj COVID-19/ A është momenti i duhur që të lirohen masat e karantinës?

Komento