POP 5

Lajmet më të lexuara të 5 minutave të fundit

KE: Progres i rëndësishëm! Në maj rekomandojmë hapjen e negociatave me Shqipërinë

Në muajin maj, Komisioni Europian do të rekomadojë hapjen e negociatave të anëtarësimit me Shqipërinë dhe Maqedoninë e Veriut.

Deklarata u bë ditën e sotme, nga Komisioneri për Zgjerimin, Johanes Hahn, gjatë punimeve të Komitetit Parlamentar të PE për Punët e Jashtme.

Takimi i sotëm ishte i një rëndësie të veçantë, pasi është i fundit përpara zgjedhjeve të Parlamentit Europian dhe si i tillë shërbeu për t’u dakordësuar mbi disa pika kyçe të politikës së jashtme të BE-së, përfshi zgjerimin, marrëdhënien me Kinën e Rusinë, krizën e refugjatëve nga Lindja e Mesme, etj.

Në pjesën e zgjerimin, i ftuar ishte Komisioneri Hahn, i cili në minutën 11:48:02 të videos së bashkangjitur shprehet:

“Bashkimi Europian duhet të fokusohet në perspektivën afatgjatë të vendeve kandidate. Në Komision, në fund të majit do të prezantojmë progresraportet për vendet e rajonit (Ballkani Perëndimor), plus Turqinë. Pres, që mbi bazat e asaj që kemi parë, të bëjmë një rekomandim pozitiv për hapjen e negociatave të anëtarësimit me Maqedoninë dhe Shqipërinë”.

Pavarësisht situatës politike në Shqipëri, Komisioni Europian vlerëson se progresi i realizuar nga vendi ynë është i qëndrueshëm. “Në Ballkanin Perëndimor është bërë një progres shumë i rëndësishëm. Në afatgjatë, kur shohim arritjet, është e vërtetë që ka edhe hapa pas, por në afatgjatë vërejmë progres shumë të rëndësishëm në ekonomi, në sundimin e ligjit apo në procesin e ripajtimit”.

Duke folur për rëndësinë strategjike të rajonit tonë, Hahn pranoi se: “Në Ballkan, eksportojmë apo importojmë destabilitet. Arsyeja përse kjo ndodh është sepse niveli ekonomik i rajonit është ndjeshëm më i ulët se ai i Bashkimit Europian. Rritja e nivelit ekonomik, për të reduktuar këto disbalanca, është shumë i rëndësishëm për të ardhmen e Unionit. Shembujt pozitiv në fushën e ligjzbatimit duhet të na inkurajojnë, që të nxisim sa më shumë biznesmenë që të investojnë në këto vende, të kemi më shumë tregëti me ta, më shumë kompani apo filiale në Ballkan”.

Më tej, Hahn theksoi shembullin pozitiv të bashkëpunimit Ukrainë-Poloni, si bazë për vijimin e marrëdhënieve me Ballkanin. Sot, Polonia është shndërruar në një tutor të rëndësishëm, që udhëheq Ukrainën drejt sferën perëndimore, duke u shndërruar në kundërpeshë të ndikimit rus në vend.

Megjithatë, “pas rënies së komunizmit, Polonia dhe Ukraina kishin një nivel të ngjashëm ekonomik, por sot Polonia është një vend 5-6 herë më i pasur se Ukraina dhe ky gabim nuk duhet të ndodhë në rajon”.

Hahn u ndal edhe tek dialogu Prishtinë-Beograd, “I cili së fundmi ka pasur disa ngërçe”, por pavarësisht kësaj, Komisioneri theksoi se “më në fund është krijuar një kulturë për zgjidhjen e problemeve përmes dialogut. Sa herë ka një ngërç, homologët përkatës bisedojnë mes tyre, diçka që ishte plotësisht e pamendueshme deri disa vite më parë”.

Përmes pyetjeve nga publiku, Komisioni për Punët e Jashtme në PE theksoi se në mënyrë që vendet e Ballkanit të mos distancohen nga perspektiva e tyre europiane, Bashkimi Europian duhet të përmbushë angazhimet e tij dhe të dalë përtej ndasive të brendshme, duke shpërblyer përpjekjet e vendeve përkatëse.

Në këtë takim, një rol të rëndësishëm iu kushtuan edhe marrëdhënieve të Bashkimit Europian me Turqinë, Rusinë apo Kinën.

Përsa i përket influencës së padëshiruar të forcave të treta në Ballkan, Komisioni u dakordësua në pikëpamjen se avancimi i rrugës europiane është mekanizmi më i mirë për të kundështuar këto influenca.

Komisioni për Punët e Jashtme të Parlamentit Europian drejtohet nga David McAllister, deputet i CDU në Gjermani dhe nga anëtarët Dubravka Suica (EPP), Andi Kristea (S&D), Anders Vistisen (ECR) dhe Javier Permuy (GUE/NGL)

G.M./r.k./Shqiptarja.com
Komento

Komente

  • Edi Rama: 03/04/2019 03:16

    Europa ka hallin e saj se po nuk e pranoi Shqiperne do te perballet me Rusine.

    Përgjigju
  • Era: 02/04/2019 17:22

    Po i njëjti muhabet, çdo vit na rekomandohet hapja, dhe pastaj... Ku të pashë.

    Përgjigju
  • Osp: 02/04/2019 16:11

    Rama dhe ju BE e Soros na that qe u hapen nje here ? Apo jeni duke luajtur hapa dollapa Soros rrin nga mbrapa

    Përgjigju
    • Tirona: 02/04/2019 16:54

      Ju morren ne qafe me Kette Sorosin ne Shqiperi, edhe kjo vjen sepse aty nuk dichte se ceshte e majte apo e djathte ne politike Shembulli me i mire eshte Sala qe mbahet si i djathte dhe Ramen e quan te majte.Po nejse ky eshte muhabet brenda kufijve te Shqiperise se sa per sqarim edhe i majti me i flakte ne perendim eshte shume here me i djathte se cdo i vetequajtur i djathte ne Shqiperi