Koronavirusi/ Mbyllen fluturimet edhe me Britaninë e Madhe! Rama: Kjo luftë është e gjatë, mos luajmë 'kukamfshehti'

TIRANË- Nga sot në orën 23:59 do të pezullohen fluturimet edhe me Britaninë e Madhe, si një masë parandaluese në betejën kundër koronavirusit. Një vendim i tillë është marrë ditën e sotme nga Ministria e Infrastrukturës dhe Energjisë, duke qenë se Britania e Madhe ka marrë masat shumë vonë, vetëm pasi janë konfirmuar 1372 të infektuar dhe 35 viktima, dhe mbi të gjitha jetojnë shumë shqiptarë. Ka qenë kryeministri Edi Rama që ka bërë me dije këtë masë drastike, siç edhe ai e quan.

I pari me të cilët mbyllën kufijtë ishte Italia, për shkak të numrit të lartë të të infektuarve dhe viktimave, ndërkohë që më pas u pasua edhe me vendet e rajonit, Kosovën, Maqedoninë e Veriut, Malin e Zi dhe Greqinë.

Kryeministri Edi Rama ka kërkuar durim për në një luftë për të cilën ka paralajmëruar se nuk do të jetë e shkurtër, teksa ka njoftuar se ka pasur një bisedë telefonike me presidenten e Komisionit Europian, Ursula von der Leyen, përmbajtjen e së cilës do e zbulojë pasdite. Një falenderim ka pasur kreu i qeverisë për të gjithë qytetarët që janë ndërgjegjësuar, duke u shprehur i bindur se " me këtë unitet të fortë do e përballojmë me patjetër".

"Sot pasdite bisedë telefonike me presidenten e Komisionit Europian, Ursula von der Leyen. Më pas, në orën 18.30, do t’ju komunikoj mesazhin tim të drejtpërdrejtë! Faleminderit të gjithëve për mirëkuptimin fantastik dhe zbatimin mbresëlënës të rregullave të luftës, që me këtë unitet të fortë do ta përballojmë me patjetër! Besim se gjithçka po bëjmë është gjëja e duhur, në çdo hap e çdo ditë dhe durim, durim, durim, sepse kjo luftë nuk do të jetë e shkurtër dhe s’është gjëkundi një lojë kukamçefthi, ku po u “fshehëm” një javë i’a hodhëm! Ju siguroj të gjithëve se po punojmë ditë-natë për të mos lënë vetëm asnjë shqiptar dhe për të bërë gjithçka për shëndetin e për ekonominë familjare dhe kombëtare po ashtu! Durim, durim, durim! Frikë aspak, kujdes po! Do t’ia dalim edhe kësaj lufte medoemos", shkruan Rama.

Postimi i kryeministrit Edi Rama

Mbyllen kufijtë me këto shtete 
-Itali
-Greqi
-Maqedonine Veriut
-Kosovë
-Malin e Zi

B.K./Shqiptarja.com

TAG:
• Koronavirus
• koronavirusi ne shqiperi