Marrëveshja Kosovë-Serbi/ Këshilli i Ambasadorëve Shqiptarë: Marrëdhëniet do të normalizohen vetëm me njohjen e pavarësisë

Këshilli i Ambasadorëve Shqiptarë ka përshëndetur firmosjen e marrëveshjes mes Kosovës e Serbisë me ndërmjetësimin e SHBA-së. Përmes një deklarate, Këshilli i Ambasadorëve thotë se është një hap i rëndësishëm drejt stabilitetit dhe prosperitetit të të gjithë rajonit, duke theksuar se procesi i normalizimit të marrëdhënieve mes Kosovës dhe Serbisë  do të jetë vetëm kur kjo e fundit do të njohë pavarësinë.

Gjithashtu thotë se populli shqiptar, kudo ku ai jeton është një komb me vokacion të fortë ndaj vlerave evropiane, një komb me diversitet besimesh, që jetojnë në harmoni të plotë ndërmjet tyre.

Deklarata e plotë:
Këshilli i Ambasadorëve Shqiptarë ka përcjellur me vëmendje zhvillimet rreth bisedimeve në Uashington, në mes të delegacioneve të Republikës së Kosovës dhe Republikës së Serbisë, me ndërmjetësimin e Shteteve të Bashkuara të Amerikës. Ne konsiderojmë se marrëveshjet e arritura në Uashington, që kanë për synim parësor normalizimin e marrëdhënieve ekonomike në mes të Republikës së Kosovës dhe Republikës së Serbisë, janë një hap i rëndësishëm drejt stabilitetit dhe prosperitetit të gjithmbarshëm të tërë rajonit. Procesi i normalizimit të marrëdhënieve në mes të Republikës së Kosovës dhe Republikës së Serbisë do përmbyllet vetëm kur Serbia të njohë pavarësinë e Kosovës dhe të heqë dorë nga çfarëdo ideje apo platforme që mëton të cenojë sovranitetin, integritetin territorial dhe funksionalitetin e Republikës së Kosovës. Këshilli i Ambasadorëve Shqiptarë konsideron se njohja e pavarësisë së Kosovës nga shteti i Izraelit dhe vendosja e marrëdhënieve diplomatike në mes të të dyja vendeve, është një moment historik, që fuqizon pozicionin ndërkombëtar të shtetit të Kosovës dhe konfirmon lidhjet historike në mes të popullit shqiptar dhe popullit hebre.

LEXO EDHE:
Lista me 12 kandidatë për ambasadorë, Këshilli i Ambasadorëve Shqiptarë: Vijnë nga jashtë shërbimit diplomatik, duken si qoka politike

Këshilli i Ambasadorëve Shqiptarë është i inkurajuar nga roli aktiv i Shteteve të Bashkuara të Amerikës, në procesin e normalizimit të marrëdhënieve në mes të Republikës së Kosovës dhe Republikës së Serbisë. Kjo konfirmon, edhe një herë, rolin e pazëvëndësueshëm që SHBA-të kanë luajtur në vazhdimësi për lirinë dhe pavarësinë e Kosovës, si dhe për paqen dhe demokracinë në Ballkan. Ombrella Euro-Atlantike është garancia më e fortë për paqen dhe sigurinë e rajonit tonë dhe shtylla kryesore e vlerave të demokracisë, sundimit të ligjit dhe drejtësisë sociale. Këshilli Ambasadorëve Shqiptarë beson fuqimisht se Shtetet e Bashkuara të Amerikës dhe shtetet europiane, që për vite kanë kontribuar në paqen dhe stabilitetin e Ballkanit Perëndimor, do e mbështesin përspektivën e Kosovës për anëtarësim në NATO dhe Bashkim Europian. Në kohën kur në rajonin tonë vazhdojnë të jenë të pranishme agjenda dhe tendenca politike që të adhmen e rajonit e shohin jashtë kursit Euro-Atlanik, ankorimi i fuqishëm i NATO-s dhe BE-së në rajon bëhet edhe më i domosdoshëm. Këshilli i Ambasadorëve Shqiptarë përfiton nga rasti të theksojë se populli shqiptar, kudo ku ai jeton, është një komb me vokacion të fortë ndaj vlerave evropiane, një komb me diversitet besimesh, që jetojnë në harmoni të plotë ndërmjet tyre.

Kujtojmë se ditën e djeshme u arrit nënshkrimi i marrëveshjes ekonomike mes Kosovës dhe Serbisë në Washington nën ndikimin e SHBA-së.

TAG:
• Këshilli i Ambasadorëve Shqiptarë
• njohja e pavarësisë së Kosovës
• arrihet marreveshja kosove-serbi

Sondazhi i ditës:

Si ka qene per ju viti 2024?

• I mire

  43.9%

• I keq

  22.8%

• As i mire as i keq

  33.3%

Vota total: 1516

Votat totale janë unike

• Sondazhi i ditës:

  Si ka qene per ju viti 2024?

  I mire I keq As i mire as i keq