Masakra e Gërdecit, ekspertët iu përgjigjen 113 pyetjeve të Mediut! Avokatët kërkojnë kohë, seanca shtyhet në shtator

Procesi gjyqësor ndaj Fatmir Mediut për Masakrën e Gërdecit do të vazhdojë tashmë në shtator, me seancën e parë në datë 11.

Në seancën e kësaj të mërkure në Gjykatën e Posaçme 5 ekspertët kanë dorëzuar përgjigjet e 113 pyetjeve të ish ministrit të Mbrojtjes në një material prej 35 faqesh. Avokati i Fatmir Mediut, Ligori por edhe prokurori e SPAK Klodian Braho kërkuan kohë që të njihen me përgjigjet.

Gjyqtarët pranuan kërkesën e palëve dhe vendosjen shtyrjen e seancës.

Çfarë ndodhi në 15 mars?
15 mars 2008, mesditë ora 12:05 një shpërthim i fuqishëm tronditi Tiranën, ndërsa krateri i tij u shënua pak kilometra më tutje në fshatin Gërdec në Vorë. Teksa minutat kalonin ajo çka kishte ndodhur ishte e paimagjinueshme, 26 të vdekur e mbi 300 të plagosur dhe me 100 shtëpi të rrafshuara. Këto ishin pasojat e shpërthimit në punishten e demontimit të municioneve shtetërore në pronësi të biznesmenit Mihal Delijorgji. Sot 15 vite më pas, ai shpërthim është ende i freskët në memorien e të gjithë.

Kjo ngjarje përfundoi dhe në dyert e gjykatave shqiptare, por sot për 26 të vdekur e 300 të plagosur nuk ka asnjë person pas hekurave. Pati persona që ndërruan jetë në mënyrë të pashpjegueshme, pati dëshmitarë që u arratisën, ushtarak që morën azil politik, por për familjarët asnjëherë nuk u vendos drejtësi.

SI.E./Shqiptarja.com

TAG:
• gerdeci
• fatmir mediu
• spak