Mbajtja e maskës me detyrim edhe jashtë/ Veliu: Nga e enjtja policë kudo për të parë sa zbatohet kjo masë! Qëllim jo gjoba, por ruajtja e jetës së qytetarit

TIRANË- Nga e enjtja, në rrugë e qyteteve, hapësira publike do të jenë të pozicionuar patrulla të policisë që do të bëjnë kontrolle për zbatimin e mbajtjes së maskës si një masë parandaluese, anti-COVID.

Qëllimi nuk është ndëshkimi, tha Drejtori i Përgjithshëm i Policisë së Shtetit, Ardi Veliu, por ruajtja e jetës së qytetarëve. Në deklaratën për mediat, Veli theksoi se e gjitha kjo po bëhet me qëllim shkëputjen e zinxhirit të transmetimit të COVID-it si edhe shmangien e një karantine të dytë si në muajt e parë të pandemisë.

Ai ka ftuar qytetarët që të jenë bashkëpunues, të jenë në krah të policisë, për t’i minimizuar efektet e pandemisë.

"Rastet e shtetasve të infektuar me COVID-19 kanë shënuar një rritje të lehtë, sipas të dhënave nga Shëndetësia. Një rritje e tillë e të infektuarve po vërehet edhe në shumë vende të botës. Disa prej këtyre shteteve kanë nisur marrjen e masave të forta për parandalimin e infeksionit. Edhe në vendin tonë kanë nisur të merren disa masa në mënyrë që të pengohet përhapja masive e virusit. Duke filluar nga dita e enjte, çdo qytetar është i detyruar të mbajë maskën mbrojtëse që në momentin kur del prej shtëpisë së vet. Kjo masë është në përputhje me udhëzimet e dala nga autoritetet shëndetësore. Mbajtja e një maske në fytyrë ul në mënyrë të ndjeshme rrezikun e përhapjes së infektimit.

Qëllimi kryesor është të mbrojmë popullatën nga rreziqet që paraqet virusi. Së dyti, me marrjen e një mase të tillë, synojmë edhe të shmangim një mbyllje si ajo e pranverës së këtij viti. Për qytetarët është më e lehtë të mbajnë një maskë dhe të zbatojnë rregullat e distancimit social, sesa t’u nënshtrohen kushteve të rrepta të mbylljes.

Policia e Shtetit do të angazhohet me të gjitha kapacitetet e saj, në krah të strukturave të tjera, për të garantuar zbatimin e masave të caktuara nga autoritetet e Shëndetësisë. Patrullat policore do të monitorojnë në mënyrë rigoroze të gjithë ambientet dhe hapësirat publike ku nga e enjtja do të jetë detyrim mbajtja e maskës Duke përfituar nga rasti ftoj qytetarët që, siç kanë dëshmuar më herët në masë të madhe vullnetin për bashkëpunim, të respektojnë masat dhe të mbështesin autoritetet policore në zbatimin e këtij detyrimi.

Në çdo rast të konstatimit të shtetasve që u shmangen detyrimeve ligjore, Policia e Shtetit do të reagojë në përputhje me ligjin dhe detyrat e saj funksionale. Qëllimi ynë nuk është ndëshkimi i qytetarëve, por mbrojtja e jetës dhe shëndetit të tyre. Ndaj duke besuar se qytetarët do të jenë në krahun tonë, për t’i minimizuar efektet e pandemisë, bëj thirrje që të gjithë bashkë të tregojmë se vetëm duke respektuar rregullat mund të ndërpresim zinxhirin e transmetimit të këtij virusi të rrezikshëm", tha Veliu.

B.K./b.ha./Shqiptarja.com

TAG:
• ardi veliu