Me foton e Lulzim Bashës në kornizë... Bardhi takim me banorët në Fier

FIER - Sekretari i Përgjithshëm i Partisë Demokratike, Gazmend Bardhi ishte në një takim me banorët e qarkut të Fierit ku ishin të pranishëm edhe ish-deputetë të opozitës joparlamentare.

"Qarku i Fierit është sot parajsa e krimit të organizuar dhe hajdutërisë së klientëve të qeverisë, që zhvasin pasuritë natyrore, naftën dhe gazin, si dhe kanë eleminuar konkurencën e lirë në çdo fushë të biznesit. Gjatë takimeve në Fier, Divjakë, Roskovec dhe Patos, gjeta biznese pa konsumatorë, konsumatorë të frikësuar, qytetarë të zhgënjyer dhe të pasigurt për të ardhmen e tyre. Qytetarët e qarkut Fier ndjehen të tradhëtuar nga Partia Socialiste që ata kanë votuar në shumicë historikisht.  Për ne demokratët nuk ka detyrë më të madhe sesa t’u kthejmë qytetarëve shpresën dhe besimin se Fieri, Lushnja, Divjaka, Roskoveci, Mallakastra dhe Patos mund të zhvillohen, se Shqipëria mund të jetë një vend normal ku secili të vlerësohet në mënyrë të ndershme për punën e tij, pa qenë i detyruar të punojë për një bandë apo një pushtetar hajdut. Për këtë, qytetarët nuk duhet të braktisin vendin, por duhet të braktisin Edi Ramën, qeverisja e të cilës në këto 6 vjet ka sjell vetëm varfëri, hajdutëri dhe pasiguri", tha Bardhi.

Por ajo që bie në sy është ambienti i takimit të Bardhit me banorët e zonës. Veç flamujve që të japin përshtypjen sikur të jemi në fushatë zgjedhore, në të gjitha takimet në ambiente të ndryshmë që kanë bërë në këtë qark, evidentohet fotoja e kryetarit të Partisë Demokratike vendosur në një kornizë në mur...Duket se demokratët kanë nisur të zëvendësojnë imazhin e Ismail Qemalit, që mbajnë institucionet zyrtare, me atë të liderit demokrat Basha!

G.M.//Shqiptarja.com

TAG:
• lulzim basha
• gazmend bardhi