Mineralet, nafta dhe energjia rrisin me 21% eksportet krahasuar me Tetorin e 2017 (Shifrat e plota)

Instituti i Statistikave ka publikuar raportin e muajit Tetor për eksportet e mallrave. Sipas INSTAT, në Tetor eksportet e mallrave arritën vlerën 30 mld lekë, duke u rritur me 21,2 %, në krahasim me të njëjtën periudhë të një viti më parë dhe me 14,8%, në krahasim me shtatorin e këtij viti.

Ndërsa importet e mallrave arritën vlerën 58 mld lekë, duke u rritur me 1,0%, në krahasim me një vit më parë dhe me 14,0 %, në krahasim me shtatorin 2018. Deficiti tregtar i këtij muaji është 28 mld lekë, duke u ulur me 14,2 %, krahasuar me Tetorin e 2017 dhe rritur me 13,1 %, në krahasim me Shtatorin e 2018.

Përsa i përket dhjetëmujorit të vitit 2018 eksportet e mallrave arritën vlerën 262 mld lekë, duke u rritur me 16,0 %, krahasuar me një vit më parë dhe importet e mallrave arritën vlerën 525 mld lekë, duke u rritur me 2,8 %, krahasuar me një vit më parë. Deficiti tregtar arriti vlerën 264 mld lekë, duke u ulur me 7,6 %, krahasuar me 2017.

Kontributi i grupeve kryesore:
Rritja vjetore e eksporteve prej 21,2 %, këtë muaj është ndikuar kryesisht nga grupet: “Minerale, lëndë djegëse, energji elektrike” me +8,8 pikë përqindje, “Makineri, pajisje dhe pjesë këmbimi” me +4,0 pikë përqindje“, “Materiale ndërtimi dhe metale” me +3,1 pikë përqindje.

Në ndryshimin vjetor të eksporteve ka ndikuar negativisht grupi: “Lëkurë dhe artikujt prej tyre” me -0,2 pikë përqindje. Eksportet, gjatë këtij dhjetëmujori janë rritur me 16,0 %, krahasuar me një vit më parë. Grupet që kanë ndikuar pozitivisht në rritjen vjetore të eksporteve, janë: “Minerale, lëndë djegëse, energji elektrike” me +5,9 pikë përqindje, “Materiale ndërtimi dhe metale” me +4,0 pikë përqindje, “Tekstile dhe këpucë” me +2,7 pikë përqindje.

Në ndryshimin vjetor të eksporteve ka ndikuar negativisht grupi: “Lëkurë dhe artikujt prej tyre” me -0,1 pikë përqindje. Kontributi i grupeve kryesore në ndryshimin vjetor të importeve: Rritje vjetore e importeve prej 1,0 %, këtë muaj është ndikuar kryesisht nga grupet: “Makineri, pajisje, pjesë

këmbimi” me +1,2 pikë përqindje, “Prodhime druri dhe letre” me +0,8 pikë përqindje, “Materiale ndërtimi dhe metale” dhe “Produkte kimike dhe plastike” me +0,4 pikë përqindje. Në ndryshimin vjetor të importeve ka ndikuar negativisht grupi: “Minerale, lëndë djegëse, energji elektrike” me -2,1 pikë përqindje.

Si dhjetëmujor, importet janë rritur me 2,8%, krahasuar me dhjetëmujorin 2017. Grupet që kanë ndikuar pozitivisht në rritjen vjetore të importeve, janë: “Makineri, pajisje, pjesë këmbimi” me +1,3 pikë përqindje, “Tekstile dhe këpucë”, “Minerale, lëndë djegëse, energji elektrike” dhe “Prodhime druri dhe letre” me +0,3 pikë përqindje. Në ndryshimin vjetor të importeve nuk ka ndikuar negativisht asnjë grup

Ecuria e tregtisë së mallrave sipas vendeve partnere
Në muajin Tetor 2018, vendet me të cilët Shqipëria ka pasur rritje më të madhe të eksporteve, në krahasim me Tetor 2017 janë: Italia (3,5 %), Spanja (91,7 %) dhe Kosova (46,8 %). Ndërsa vendet me të cilat eksportet kanë pasur uljen më të madhe janë: Kina (-4,6 %), dhe Ukraina (-36,0 %).

Gjatë këtij dhjetëmujori, vendet me të cilët Shqipëria ka pasur rritje më të madhe të eksporteve, në krahasim me një vit më parë, janë: Italia (3,9 %), Kosova (27,5 %) dhe Spanja (66,7 %). Ndërsa vendet me të cilat eksportet kanë pasur uljen më të madhe, janë: Kina (-35,6 %), Ukraina (-51,6 %) dhe Rusia (-57,6 %).

Në muajin Tetor 2018, vendet me të cilët Shqipëria ka pasur rritje më të madhe të importeve, në krahasim me Tetor 2017 janë: Turqia (1,7 %), Kina (17,9 %) dhe Gjermania (3,4 %). Ndërsa vendet me të cilat importet kanë pasur uljen më të madhe janë: Italia (-4,3 %), Rusia (-28,1 %) dhe Zvicra (-53,0 %).

Gjatë këtij dhjetëmujori, vendet me të cilët Shqipëria ka pasur rritje më të madhe të importeve, në krahasim me një vit më parë, janë: Turqia (4,7 %), Greqia (3,2 %) dhe Kina (9,7 %). Ndërsa vendet me të cilat importet kanë pasur uljen më të madhe, janë: Italia (-0,5 %), Gjermania (-3,7 %) dhe Zvicra (-27,7 %). Shkëmbimet tregtare me vendet e BE zënë 66,5 %, të gjithë tregtisë. Në Tetor 2018, eksportet drejt vendeve të BE-së zënë 76,1 % të eksporteve gjithsej dhe importet nga vendet e BE-së zënë 61,5 % të importeve gjithsej.

Partnerët kryesorë tregtarë janë: Italia (33,5 %), Kina (6,4 %), Turqia (6,3 %) dhe Greqia (6,2%). Shkëmbimet tregtare, për dhjetëmujorin 2018, me vendet e BE zënë 66,5 % të gjithë tregtisë. Në periudhën Janar – Tetor 2018, eksportet drejt vendeve të BE-së zënë 76,3 % të eksporteve gjithsej dhe importet nga vendet e BE-së zënë 61,6 % të importeve gjithsej. Partnerët kryesorë tregtarë janë: Italia (34,5 %), Greqia (6,9 %), Gjermania (6,6 %) dhe Kina (6,1 %).

(kliko këtu për të lexuar raportin e Instat)

/r.k./Shqiptarja.com

TAG:
• import
• eksport
• Instituti i Statistikave