Zgjerimi i Bashkimit Evropian është rikthyer në qendër të agjendës evropiane dhe Shqipëria thotë se është gati për këtë moment,tha ministri për Evropën dhe Punët e Jashtme, Ferit Hoxha, gjatë një paneli për zgjerimin e BE i mbajtur gjatë vizitës së tij në Bruksel

Diskutimi i mbajtur në Konferencën e Ambasadorëve të BE-së u fokusua te forcimi i Bashkimit Evropian nëpërmjet procesit të zgjerimit. Në panel morën pjesë edhe komisionerja për Zgjerimin Marta Kos dhe zëvendëskryeministri njëherazi ministër i Jashtëm i Moldavisë, Mihai Popșoi.

Hoxha deklaroi se zgjerimi ka treguar ndër vite se është një nga instrumentet më të suksesshme të BE për të konsoliduar paqen, stabilitetin dhe prosperitetin në Evropë. Ai shtoi se është pozitiv fakti që ky proces është rikthyer qartë në qendër të agjendës evropiane.

Sipas tij, procesi duhet të vazhdojë të bazohet te parimi i meritës dhe te zbatimi i reformave që afrojnë vendet kandidate me standardet e Bashkimit Evropian.

"E mirëpresim faktin që ky proces është rikthyer sërish, në mënyrë të qartë dhe të vendosur, në qendër të agjendës evropiane. Ne i qëndrojmë bindjes se procesi duhet të vijojë të mbështetet fuqimisht në parimin e meritës dhe në zbatimin e reformave të thella që e afrojnë çdo ditë e më shumë vendin tonë me BE dhe BE me aspiratat dhe nevojat legjitime të qytetarëve tanë", tha ai. 

Ministri theksoi gjithashtu se Shqipëria është përgatitur për këtë moment me reforma të thella institucionale, me përafrim të plotë me politikën e jashtme dhe të sigurisë të BE dhe me mbështetjen e fortë të shoqërisë për integrimin evropian.

Postimi i Ministrit Hoxha:

I nderuar që mora pjesë, së bashku me Komisioneren për Zgjerimin, Marta Kos dhe Zëvendëskryeministrin e njëherazi, Ministrin e Jashtëm të Moldavisë, Mihai Popșoi, në Konferencën e Ambasadorëve të Bashkimit Evropian në Bruksel, në një panel shumë domethënës mbi temën: “Forcimi i Bashkimit Evropian përmes Zgjerimit.”

Zgjerimi ka dëshmuar ndër vite se është një nga instrumentet më të suksesshme të Bashkimit Evropian për konsolidimin e paqes, stabilitetit dhe prosperitetit në kontinentin tonë. E mirëpresim faktin që ai është rikthyer sërish, në mënyrë të qartë dhe të vendosur, në qendër të agjendës evropiane.

Ne i qëndrojmë bindjes se procesi duhet të vijojë të mbështetet fuqimisht në parimin e meritës dhe në zbatimin e reformave të thella që e afrojnë çdo ditë e më shumë vendin tonë me BE dhe BE me aspiratat dhe nevojat legjitime të qytetarëve tanë.

Shqipëria është përgatitur për këtë moment përmes reformave të thella dhe transformuese institucionale, përmes përafrimit të plotë me Politikën e Përbashkët të Jashtme dhe të Sigurisë të Bashkimit Evropian, si dhe përmes një shoqërie, përkushtimi i së cilës ndaj projektit evropian mbetet i palëkundur.

Tashmë është koha që të gjithë të dëshmojnë mençuri, vendosmëri dhe guxim, si dhe një ndjenjë të qartë realizmi strategjik, për të matur, mbështetur dhe shpërblyer progresin e arritur, si dhe për të përmbushur premtimin e Selanikut, të dhënë 23 vjet më parë, për një #Evropë vërtet të ribashkuar.

 

 

Rendit zhvillimet sipas orarit:
Ora 12:58
Komisionerja Marta Kos: Shqipëria në krye të procesit të anëtarësimit në BE

“Shqipëria është aktualisht një nga vendet kryesuese në procesin e anëtarësimit në Bashkimin Evropian. Kjo vjen me pritshmëri të larta.” Me këtë mesazh reagoi në rrjete sociale komisionerja për Zgjerimin e BE, Marta Kos, një ditë pas takimit me ministrin për Evropën dhe Punët e Jashtme, Ferit Hoxha.

Kos theksoi  se zbatimi i besueshëm i objektivave që lidhen me sundimin e ligjit është i rëndësishëm për të ruajtur ritmin e negociatave të Shqipërisë me Bashkimin Evropian.

Komisionerja shtoi se ky është një hap i domosdoshëm për të arritur standardet e BE në sundimin e ligjit, luftën kundër korrupsionit dhe funksionimin e demokracisë.

“Shqipëria është aktualisht një nga vendet kryesuese në procesin e anëtarësimit në BE. Kjo vjen me pritshmëri të larta. Tani po vazhdojmë me diskutimet mbi objektivat e përkohshme për sundimin e ligjit. Së bashku me Ministrin e Jashtëm, Ferit Hoxha, theksova nevojën për një zbatim të besueshëm të këtyre objektivave për Shqipërinë, për të ruajtur ritmin në negociatat për anëtarësim. Ky është një hap i rëndësishëm për të arritur standardet e BE-së në sundimin e ligjit, luftën kundër korrupsionit dhe demokracinë”, tha Kos.

 

U.D/Shqiptarja.com