Qeveria kineze dëbon gazetaren franceze

Autoritetet në Kinë kanë dëbuar nga vendi gazetaren franceze Ursula Gauthier për shkak të një artikulli ku ishte shprehur kritike ndaj sjelljes së qeverisë kineze kundrejt myslimanëve ujgurë në provincën Xinjiang.

Pekini zyrtar gjithashtu deklaroi se nuk do ta rinovojë lejen e profesionit për gazetaren e revistës informative franceze “L’Obs”. 

Qeveria kineze pretendon se për shkak të këtij artikulli shkruar prej francezes janë nxitur trazirat në Xinjiang dhe aktet mizore që kanë marrë jetën e disa njerëzve. 

Nga ana e saj, zonja Gauthier i cilësoi deklaratat si “absurde” dhe tha se Pekini po përpiqet të dekurajojë qëndrimin e gazetarëve të huaj në vend. 

Nëse karta e gazetarit e zonjës Gauthier nuk rinovohet, atëherë ajo nuk mund të aplikojë për një vizë të re dhe do t’i duhet të lërë Kinën brenda 31 dhjetorit.