Kreu i Kishës Ortodokse Serbe, patriarku Irinej ka ndërruar jetë mëngjesin e sotëm pas infektimit me Covid-19.

Lajmin e bëjnë të ditur mediat serbe. Ai u shtrua në Spital mbrëmjen e 4 nëntorit dhe kishte dhënë shënja përmirësimi.

 Kisha Ortodokse Serbe njoftoi më 17 nëntor se gjendja e patriarkut ishte e qëndrueshme, por më pas, më 19 nëntor ajo konfirmoi  se gjendja e tij ishte përkeqësuar.

Për vdekjen e tij ka reaguar edhe Presidenti i Serbisë, Aleksandër Vuçiç i cili e cilësoi vdekjen e tij si një humbje të madhe për vendin. Presidentit shkroi se ishte i nderuar që e njohu patriarkun. "Njerëz si ju kurrë nuk largohen".

Patriarku Irinej, u infektua me Covid-19 pasi udhëhoqi funeralin dhe liturgjinë para varrimit të Metropolitit Amfilohije të Malit të Zi, edhe ai i infektuar me Koronavirus në të cilën morën pjesë shumë besimtarë. 

Në varrim, ku ishte ekspozuar arkivoli i hapur me trupin e mitropolitit, priftërinjtë, shumica e besimtarëve, si dhe disa politikanë, nuk përdornin maska dhe nuk respektuan distancën fizike.

Irinej (90 vjeç) u zgjodh në postin më të lartë në Kishën Ortodokse Serbe, në janar të vitit 2010.

Patriarku ka pasur një rol tejet të madh në Serbi, ku 85 për qind e popullsisë deklaron se është ortodokse. Patriarku Irinej është deklaruar hapur kundër çështjes së Kosovës, ku vazhdimisht ka premtuar se do të përkrahë pretendimet territoriale të Serbisë për Kosovën.

"Pa Kosovën Serbia nuk ka zemër dhe shpirt", shprehej Patriarku në vitin 2010 kur mori detyrën.