Ngërçi për KED, tërhiqet Nishani
s'do hedhë shortin për anëtarët 

Presidenti i Republikës Bujar Nishani tërhiqet nga hedhja e shortit për përzgjedhjen e anëtarëve të Këshillit të Emërimeve në Drejtësi, brenda datës 16 gusht, duke evituar kësisoj futjen e Reformës në Drejtësi në një hulli të rrezikshme. Pas një dyzimi të gjatë dhe konsultash me përfaqësuesit e partive kryesore politike, kreu i shtetit mësohet se është tërhequr nga skenari për të hapur procedurat për zgjedhjen e anëtarëve të KED, pa miratimin e projektligjeve prioritare. Presidenti do të presë miratimin e projektligjit për organet e qeverisjes së sistemit të drejtësisë, për të ushtruar kompetencat e parashikuara në Kushtetutën e re. Drafti në fjalë parashikon kriteret dhe kushtet që duhet të përmbushin kandidatët për anëtarë të Këshillit të Emërimeve në Drejtësi. Kështu, kreu i shtetit nuk do të hedhë shortin brenda datës 16 gusht, sikundër parashikohet në nenin 179 të Kushtetutës. Ky ka qenë edhe propozimi i kryetarit të grupit parlamentar social, Gramoz Ruçi, gjatë takimit në Presidencë për të adresuar ngërçin e krijuar. Në një linjë ka qenë edhe qëndrimi i Kuvendit të Shqipërisë, i cili i ka sugjeruar kreut të shtetit që të presë miratimin e projektligjeve prioritare për të ushtruar kompetencat kushtetuese. Ndërkaq, gjatë dyzimit të Presidentit, pati dyshime të forta se, ky i fundit, nën presionin e Partisë Demokratike mund të hidhte shortin për të zgjedhur pa kritere anëtarët e KED, me qëllim për të plotësuar me urgjencë vendet vakante në Gjykatën Kushtetuese, duke evituar procesin e Vetingut.

Ngërçi Kushtetues
Pika 11 e nenit 179 të Kushtetutës së re parashikon se Presidenti i Republikës, brenda pesë ditëve nga hyrja në fuqi e këtij ligji, zgjedh me short anëtarët e Këshillit të Emërimeve në Drejtësi, sipas nenit 149/d, pika 3, të Kushtetutës. Nëse Presidenti i Republikës nuk i përzgjedh anëtarët brenda pesë ditëve nga hyrja në fuqi e këtij ligji, kryetari i Kuvendit i zgjedh ata me short brenda dhjetë ditëve nga hyrja në fuqi e këtij ligji. Të zgjedhurit qëndrojnë në detyrë deri në datën 31 dhjetor të vitit kur hyn në fuqi ky ligj. Avokati i Popullit merr pjesë si vëzhgues në procedurën e shortit, si dhe në mbledhjet dhe veprimtarinë e Këshillit të Emërimeve në Drejtësi. Ndërkaq, anëtarët e Këshillit të Emërimeve në Drejtësi i nënshtrohen menjëherë procesit të rivlerësimit kalimtar të kualifikimit për gjyqtarë dhe prokurorë sipas nenit 179/b të këtij ligji.

Përplasja
Ndërsa neni 179 i Kushtetutës e detyron Presidentin të hedhë shortin brenda pesë ditëve, pra brenda datës 16 gusht, pika pesë e nenit 149 të Kushtetutës parashikon që kriteret për shkallën e kualifikimit të kandidatëve që marrin pjesë në short parashikohen me ligj. Por, Parlamenti Shqiptar nuk e ka miratuar ende projektligjin në fjalë. Drafti parashikon që, anëtarët e Këshillit të Emërimeve në Drejtësi duhet të mos kenë pasur masë disiplinore, të mos arrijnë moshën e pensionit gjatë vitit kalendarik vijues, të jenë vlerësuar me vlerësimin shumë mirë në të gjitha vlerësimet e punës profesionale, të kenë deklaruar gjithmonë dhe në kohë të gjitha pasuritë, të mos jenë anëtarë të organeve qeveritare, të jenë diplomuar në Shkollën e Magjistraturës etj.
 
  
Redaksia Online
l.q/Shqiptarja.com

TAG:
• gramoz ruçi