/ATSH-Z.Tosku/- Ministrja e Arsimit dhe Sportit, Lindita Nikolla njoftoi sot për fillimin e aplikimit online për formularin A1 në portalin e Maturës Shtetërore 2015".
Nikolla komunikoi fillimin e aplikimit për formularin A1 nëpërmjet një postimi ne rrjetin social facebook.
Nga ana tjetër , në një deklaratë për shtyp zv/ministrja e Arsimit, Nora Malaj tha se ditën e sotme fillon aplikimi online i Formularit A1 për të gjithë nxënësit që mbarojnë këtë vit gjimnazin.

Ndërkaq, ajo u shpreh se "aplikimi për këtë formular mbaron në datën 24 mars 2015 dhe do të bëhet sipas kalendarit të publikuar në faqen zyrtare të Ministrisë së Arsimit dhe Sportit dhe Agjencisë Kombëtare të Provimeve". Sa i përket aplikimit online për formularin A1, sipas Malaj bëhet në në shkollën ku maturanti vazhdon mësimin dhe nën kujdesin e mbikëqyrësit.

Nga ana tjetër, Malaj shpjegoi se "gjatë aplikimit në formularin A1 maturantët duhet të kenë kujdes të përzgjedhin mirë lëndët me zgjedhje, duke parë koefiçientet që këto lëndë kanë në programin e studimit që ata preferojnë. Këta koeficiente janë të shpallur në faqen e AKP-së dhe MAS-it".

Ajo gjithashtu, ka shtuar se në datën 25 mars 2015 fillon aplikimi online për Formularin A1Z, që është për të gjithë kandidatët që e kanë mbaruar maturën para vitit 2015-të. Aplikimi për këtë formularë mbaron në 30 mars 2015-të. Edhe ky sipas një kalendari të publikuar.

Sipas zv/ministres së Arsimit dhe Sportit, Nora Malaj, formularin A1Z do të mund ta plotësojnë të gjithë personat që kanë mbaruar shkollën e mesme para vitit 2015-të si dhe ata ata që kanë mbaruar shkollën e mesme jashtë vendit, kanë bërë njehsimin e diplomës në MAS dhe duan të bëhen pjesë e garës për të ndjekur studimet në IAL-të, në vitin akademik 2015-2016.

Aplikimi online në Formularin A1Z bëhet në shkollën ku aplikanti ka mbaruar arsimin e mesëm ose në shkollën e vendbanimit që ka caktuar DAR/ZA, nën kujdesin e mbikëqyrësit. Të gjithë aplikantët në Formularin A1Z, në momentin e aplikimit, duhet të kenë me vete dokumentacionin e nevojshëm.
Ministria publikoi edhe kalendarin për plotësimin e formularit sipas DAR/ZA/