Sot dhe nesër në Berlin të Gjermanisë do të mbahet Kongresi i radhës i Partive Europiane Socialiste. E ftuar në këtë kongres nga Shqipëria është Partia Socialiste, ndërkohë që nuk është ftuar Partia e Lirisë e Ilir Metës. Ndërkohë kryeministri Edi Rama ka lajmëruar se është nisur drejt Berlinit, pasi do të marrë pjesë në Kongresin që po mbahet nga Partitë Socialiste Evropiane. Sipas kreut të qeverisë do të diskutohet për përballimin e sfidave të përbashkëta, nga inflacioni tek kriza e imponuar e energjisë.

Edhe kryetari i Grupit Parlamentar të Partisë Socialiste Taulant Balla ka zbardhur çështjet e diskutimit të Kongresit të Partive Socialiste Europiane (PES). Balla shkruan se forcat politike progresiste nga mbarë Europa mblidhen sot sëbashku të diskutojnë sfidat me të cilat përballet Europa: degradimi i sigurisë ndërkombëtare, ndryshimet klimatike dhe sfidat sociale.

Kujtojmë se Aleanca me Sali Berishën, i ka mbyllur një derë Ilir Metës në arenën ndërkombëtare. Për shkak të koalicionit dhe partneritetit me Sali Berishën, një njeri i shpallur 'Non Grata' nga SHBA dhe Britania e Madhe, ai nuk është ftuar në Kongresi i Partive Europiane Socialiste. Report Tv ka siguruar e-malin që PES i ka dërguar Ilir Metës. Referuar përgjigjes, mund të kuptohet se ka qenë vetë Meta që ka kërkuar të jetë pjesë e këtij Kongresi, mirëpo, kjo nuk i është aprovuar. Atij i bëhet e qartë se pikërisht për këtë vendim të vështirë siç e kanë quajtur, është pikërisht aleanca politike, referuar këtu bashkëpunimit të tij me Berishën.

Partia e Socialistëve Evropianë (PES) bashkon Partitë Socialiste, Socialdemokrate dhe Partitë e Punës të BE-së, bashkë me vendet fqinje të Unionit, si Britania e Madhe apo Norvegjia por të ftuar janë edhe partitë e majta të Ballkanit. PES është platforma e përbashkët, ku anëtarët bashkohen: aktivistë, drejtues partish, sekretarë të përgjithshëm, liderë, organizata rinore, deputetë, eurodeputetë, komisionerë evropianë, ministra dhe kryeministra të partive socialiste, socialdemokrate, të punës dhe demokratike dhe organizata brenda Evropës. 

Rendit zhvillimet sipas orarit:
Ora 11:47
Rama merr pjesë në kongresin e Partive Socialiste Evropiane në Berlin: Do të diskutojmë për sfidat e përbashkëta

Kryeministri Edi Rama ka lajmëruar se është nisur drejt Berlinit, ku po merr pjesë në kongresin që po mbahet nga Partitë Socialiste Evropiane.

‘Në Berlin, ku forcat politike progresiste nga mbarë Europa, mblidhen sot në Kongresin e Partive Socialiste Europiane për të diskutuar si të përballemi me sfidat e përbashkëta të së sotmes, nga inflacioni i luftës tek kriza e imponuar e energjisë, e me radhë me sytë nga e ardhmja e Familjes Sonë Europian.’- shkruan Rama.

M.Q./Shqiptarja.com