PD: Heqje imunitetit dhe prangat Ballukut, mos pengoni drejtësinë! Rama po bën manovra politike për ta mbrojtur

Kryetari i Partisë së Lirisë, Ilir Meta, ka akuzuar kryeministrin Edi Rama se po përpiqet të marrë peng drejtësinë për të mos arrestuar Belinda Ballukun.

Komentet Meta i bëri përmes një postimi në rrjetet sociale, ku ka shkruar se Rama po kërkon të ndryshojë ligjet, pas dështimit të kontrollit mbi SPAK-un.

Meta po ashtu u ka bërë thirrje qytetarëve që të ngrihen, pasi sipas tij, kryeministri Rama është armiku më i madh i drejtësisë dhe integrimit europian të vendit.

Kujtojmë se Meta ndodhet në paraburgim prej tetorit të vitit 2024, pas arrestimit me urdhër të SPAK. Prokuroria e Posaçme ka ngritur ndaj Metës akuza për korrupsion dhe fshehje pasurie.

Reagimi i Metës:

??????????? ????̈???????? ???? ?????? ? ??????̈????̈

Kur turpi nuk ka më turp nga turpi çdo gjë mund të dëgjosh.

Sot rrëmbyesi i Reformës në Drejtësi, që nga zgjedhja antikushtetuese e Prokurorit të Përgjithshëm, Arta Marku në datë 18 dhjetor 2017 (me 69 vota nga 84 vota që sanksiononte Kushtetua e miratuar me 140 vota), që nga minimet që i bënte Këshillit të Emërimeve në Drejtësi duke e lënë Shqipërinë tre vite pa Gjykatë Kushtetuese, që nga shpikja e betimeve te Lana të anëtarëve të Gjykatës Kushtetuese, që e mori përgjigjen në mitingun historik të 2 Marsit, që nga kapja e vettingut që e kontrolloi bashkë me Agaçin duke përjashtuar prokurorët e "Dosjes 184" të Dibrës, sot vendosi të kapë prapë drejtësinë.

Por tani, përmes ndryshimit të ligjeve në mënyrë të njëanshme, pas dështimit të kontrollit punëtor-fshatar (parlamentar) të SPAK-ut.

Po ky nuk është recidivist vetëm për kapjen e drejtësisë, por edhe për bllokimin e integrimit europian.

E harruat si e injoroi apelin e Bundestagut në maj 2019 për të mos bërë zgjedhje njëpartiake në mënyrë që të mos hapeshin negociatat në tetor 2019?

Prapë të njëjtën gjë po bën. Atëherë i mashtronte shqiptarët edhe me McGonigalët dhe Mogerinët e tij, por edhe me larvat pseudo-opozitare.

Tani ka ardhur dita "O Sot, O Kurrë!" për ta vendosur recidivistin përballë llogaridhënies dhe për t'i dhënë fund pengmarrjes së drejtësisë dhe bllokimit te integrimit europian prej tij, që e nisi që me kushtin e Kryetarit të Qarkut të Fierit, që në vitin 2012.

Drejtësia dhe integrimi kanë armikun më të betuar Narko-recidivistin, që ka tmerr nga drejtësia dhe nga vota e popullit.

Çdo gjë që nuk e ble dot, e llahtaris recidivistin, ndaj popullin dhe zemërimin popullor ai e ka frikë pa fund.

Deputetja e PD, Ina Zhupa thotë se kryeministri Edi Rama po pengon punimet e Kuvendit për shqyrtimin e kërkesës së SPAK për arrestimin e Belinda Ballukut. Zhupa thotë se pas shprehjes së Gjykatës Kushtetuese, Këshilli i Mandateve duhet të ishte mbledhur pa asnjë vonesë. Deputetja thotë se kjo nuk ndodh pasi nëpërmjet Belindës, Rama mbron dhe veten e tij.

“Kuvendi është kthyer me urdhër politik në kundërshtues të drejtësisë, në mburojë politike për anëtarët e qeverisë për të mos u hetuar, për të mos u arrestuar. Një Kuvend nuk mund të funksionojë normalisht kur bllokon proceset ligjore të detyruara nga rregullorja. E keni bllokuar me vetëdije të plotë. Thatë do presim Gjykatën Kushtetuese, tashmë gjykata e pezulloi, ju vazhdoni dhe nuk e keni futur në rend dite. Këshilli duhet të ishte mbledhur sot, pa asnjë vonesë. Kurse ju prisni urdhrin e Ramës dhe nuk shikoni as rregullore, as Kushtetutë. Ju bllokoni drejtësinë, atë drejtësi që jeni përbetuar se nuk do ta ndaloni. Bledi Çuçi, si kryetar grupi kur ka qenë, është përbetuar se çdo kërkesë për imunitet do të ketë miratimin e padiskutueshëm të PS. Po kësaj radhe nuk mundeni, sepse e dini që ndodh efekti domino: po ra Belinda, bie Edi. Po e tërhiqni zvarrë sepse e dini që është fundi i mazhorancës”, tha Zhupa.

Kreu i Grupit të PD, Gazment Bardhi

Kreu i Grupit të PD, Gazment Bardhi ka reaguar pas deklaratës së kryeministrit Edi Rama, për vendimin e Gjykatës Kushtetuese për zëvendëskryeministren Belinda Balluku.

Sipas Bardhit, ndërhyrja që Rama pretendon të bëjë në legjislacion, lidhur me pezullimin e Ballukut, tregon se ai po mbron pushtetin e korruptuar.

Bardhi deklaroi se rregullat nuk ndryshohen në mes të hetimit dhe shtoi se qeveria dhe Kuvendi janë bërë bashkë kundër drejtësisë.

Reagimi i Gazment Bardhit

3 të vërteta për ndërhyrjen e Ramës në një hetim aktiv:

1. Kur një Kryeministër ndryshon ligjin ndërkohë që po hetohet bashkëpunëtorja e tij më e afërt, ai nuk po mbron ndonjë parim kushtetues apo ligjor. Po mbron pushtetin e vet të korruptuar. Rregullat nuk ndryshohen në mes të hetimit për të shpëtuar veten.

2. Kur Qeveria dhe Kuvendi bashkohen për të goditur vendimin e dy gjykatave në lidhje me një hetim penal aktiv, kemi dy pushtete që përpiqen të ndikojnë të tretin. Kjo nuk është ndarje pushtetesh. Është presion i organizuar kundër drejtësisë.

3. Kur thuhet se “nuk ka urgjencë” për kërkesën e SPAK-ut për arrestimin e Belinda Ballukut, mesazhi është i qartë: Drejtësia duhet të presë. Pushteti ka nevojë për blerje kohe.

Pezullimi nga ushtrimi i funksionit publik nuk është shpikje e SPAK-ut. Është i shkruar në Kodin e Procedurës Penale. Ai vlen për çdo funksionar publik.

Për ministër. Për zëvendëskryeministër. Për kryeministër.

Kur ekzistojnë kushtet ligjore, mund të pezullohet kushdo, sepse pezullimi nuk paralizon shtetin. Paralizon vetëm personin nën hetim për të shmangur ndikimin përmes funksionit.

Arresti kërkohet kur rrezikohet hetimi përmes intimidimit të dëshmitarëve apo cenimit të provave. SPAK ka sjellë prova se këto rreziqe janë konkrete në rastin e Belinda Ballukut. Pra, janë dy masa paralele. Njëra mbron procesin penal, tjetra mbron institucionin.

T’i ngatërrosh ato, siç bën Edi Rama, është deformim i së vërtetës me qëllim pengimin e drejtësisë.

Ligji është i qartë. Nuk ndryshohet sepse prek pushtetin.

Këshilli i Mandateve duhet të mblidhet pa justifikime, pa shtyrje artificiale, pa manovra politike. Kryetari i Kuvendit duhet të zgjedhë: ose në anën e ligjit, ose në anën e pengimit të drejtësisë.