Përplasja te FRD-ja/ Topalli: Meta që bën sot si i prekur na ka rrethuar me tanke te selia e PD-së kur ishte kryeministër (Intervista e plotë)

Jemi në këtë fushatë elektorale edhe pse nuk ka nisur zyrtarisht, por tashmë të gjitha partitë kanë nisur fushatën duke zbritur në terren, duke prezantuar programet e tyre. Lëvizja për Ndryshim vjen si një lëvizje e re, edhe pse ju vini me një stof të karrierës politike goxha të gjatë dhe u premtoni shqiptarëve ndryshimin e madh, të paktë kjo gjatë daljeve tuaja nëpër media. Çfarë do të sjellë Lëvizja për Ndryshim kryesisht për Shkodrën, por edhe në rangun kombëtar?

Lëvizja për Ndryshim ka filluar, siç jeni në dijeni, nga një grup të rinjsh brenda Shqipërisë dhe prej të rinjve shqiptarë që jetojnë jashtë Shqipërisë. Nxitja e parë ka qenë shqetësimi për boshatisjen e vendit, pra si një dramë e përjetuar nga secili prej shqiptarëve që jeton në qytet, në fshat, në rrethina, në qendër, s’ka rëndësi. Ata e ndiejnë që po të kthehen te fshati ku kanë qenë, te qyteti ku kanë qenë, aty nuk gjen më asnjë prej atyre që kanë qenë përpara ose gjen shumë pak prej tyre sepse vendi ynë po boshatiset, po tkurret, po plaket. Por kjo nuk është e vetmja. Lëvizja për Ndryshim vjen edhe si rrjedhojë e një delegjitimimi të forcave ekzistuese politike, të cilat janë kthyer në një lloj prone të kryetarëve të partive dhe që brenda përbrenda tyre ndihen shumë të sigurt kur rrethohen nga njerëz që nuk shquhen për një zë të fuqishëm, një autoritet të fortë apo një karakter të qëndrueshëm, e mbi të gjitha për një integritet të lartë. Në politikën shqiptare, tashmë prej kohësh, mungon përfaqësimi në kuptimin e një intelektuali të nderuar dhe të respektuar, si një histori suksesi në jetën e tij akademike, e kombinuar kjo me një integritet të lartë dhe me një nuhatje politike, sigurisht edhe me një influencë të madhe sepse politika kërkon që të kesh edhe influencë në zonën ku ti pretendon për ta përfaqësuar. Dhe unë një mijë herë mendoj, por jo vetëm sot, të jem e sinqertë e kam menduar edhe më përpara, sa herë kisha kriza parlamentit dhe shihja skena të papëlqyeshme, mendoja foton e parë të parlamentarëve të parë shqiptarë të vitit 1923. Por edhe sot, më shumë sesa 10 vite përpara.

Sot është shumë më e dhimbshme me këtë parlament që kemi aktualisht.

Është një dramë në fakt, që ka përgjegjës dhe përgjegjësit kanë emër dhe mbiemër. Dhe duam ta them këtë sepse e mendoj një mijë herë dhe prandaj po insistoj ta them. Imagjino Shkodrën që përfaqësohej nga pinjollë të familjes Roi, nga Luigj Gurakuqi, Ndre Mjeda apo Gjergj Fishta dhe nga kolosë të tjerë. Dhe imagjinoni se me kë përfaqësohet apo do të përfaqësohet sot qyteti ynë. Ka nevojë për një reflektim të madh. Unë nuk them dhe nuk pretendoj që të kemi një autoritet të tillë siç ështtë Gjergj Fishta, por që njerëz me integritet të lartë, të shkolluar, që kanë shkëlqyer në studimet e tyre dhe që kanë një reputacion të rëndësishëm në qytetin e tyre, është shumë e rëndësishme.

Politika 30-vjeçare na ka mësuar që kandidatë të jenë ata personat me muskuj, jo shtresa intelektuale. Do të arrijë Lëvizja për Ndryshim që ta thyejë këtë tabu sepse nëse marrim edhe Shkodrën në zgjedhjet e kaluara apo edhe ndër vite, ka pasur personazhe, të cilat jo vetëm të pjesës së lidhur me krimin, që shpresoj që listat kësaj radhe të mos kenë personazhe të lidhura me krimin, jo vetëm nga partia juaj por nga të gjitha subjektet politike. A do të arrijë intelektualizmi i këtyre personave që të dominojë mbi pjesën e muskujve të politikës së vjetër?

Do të fillojmë të ndryshojmë. Ekziston gjithmonë një herë e parë dhe një hap i fuqishëm. Vetë lista e Lëvizjes për Ndryshim është një mesazh që i jepet shoqërisë, pra nuk ekziston vetëm ajo Shqipëria e muskujve të fortë që ju thoni, apo e mediokritetit të palës tjetër, se këto dy palë janë, ose me të fortë ose me mediokër mendojnë se e mbajnë më mirë karrigen e tyre, por janë emra që s’kanë të bëjnë as me të parën as me të dytën, as me faktin e kërkimit të një karrigeje me çdo kusht sepse e jona është një sfidë, ndërsa ata kanë kërkuar karrigen. Si e kanë kërkuar dhe si e kanë marrë pastaj, ky është një diskutim tjetër, që nuk dua të merrem kësaj here, por shkodranët e dinë mirë. Vetë fjala Lëvizje për Ndryshim është

Një thirrje drejt kurajës për të reformuar ato forca politike që kanë qenë kolona të rëndësishme të jetës politike të vendit tonë. Dhe për të mos lejuar tre kryetarë që të mbajnë peng këto forca politike, si i mbajnë peng? I mbajnë peng duke u rrethuar nga njerëz që nuk e kundërshtojnë kryetarin.

Sa e vështirë është për Jozefina Topallin që të vijë sot në Shkodër dhe t’i kërkojë votëbesimin qytetarëve të saj, por tashmë me një forcë politike të re. Jemi mësuar t’ju shohim në Partinë Demokratike si nënkryetare e kësaj force politike, ish-kryetare e Kuvendit. Normalisht lidhja me demokratët ka qenë shumë e ngushtë për vite e vite me radhë. Ka ndonjë lloj distancimi të atyre personave që ju kanë qëndruar afër gjatë viteve kur ju keni qenë në pushtet dhe sot ndoshta, sjellja e tyre është ndryshe?

Po filloj nga e para dhe po vazhdoj me këtë të fundit. Unë e ndiej veten si Partia Demokratike origjinale. Edhe Lëvizja për Ndryshim është një lëvizje e së djathtës, e cila është zhdukur nga skena politike shqiptare, me qëllim. Dhe ky është një tjetër problem i madh i politikës shqiptare. Unë dua të rikthej të djathtën shqiptare në parlament, për t’u bërë faktor dhe për të qenë pjesë e vendimeve të rëndësishme në favor të saj. Në qoftë se ne lejojmë që këto tri forca që janë ekzistuese, për mua janë e njëjta parti me tre seksione. Asnjëra prej tyre për mua, nuk janë as të majta as të djathta. Ato janë parti klienteliste, që nuk kanë prioritar funksionin publik dhe janë larguar shumë prej qytetarëve, shumë prej halleve të tyre dhe dëshpërimit të tyre. Ata i shohin më shumë si vota, si një numër votash dhe asgjë më shumë, pavarësisht se gjatë fushatës elektorale mund të dëgjosh premtimet më boshe, më hipokritte, por që unë nuk besoj se ka më shqiptarë që u besojnë. Duke u kthyer te pyetja juaj e fundit, po sigurisht ka njerëz të cilët kanë frikë të më takojnë dhe mua më dhimbsen ata. Kjo nuk më ka ndodhur në kohën e Enver Hoxhës, kur unë isha shpallur armike, e deklasuar dhe, edhe kur isha në shkollë, pavarësisht nga biografia ime e keqe, mësuesit nuk ma kanë ngrënë kurrë notën, përkundrazi më kanë inkurajuar. Shoqet e mia mund të ishin bija të prindërve që mund të ishin anëtarë të Partisë së Punës, por nuk janë larguar prej meje. Ato më kanë respektuar, kanë pasur bindjet e tyre dhe unë bindjet e mia. Kurse sot ka njerëz që kanë frikë, kanë frikë nga kryetari dhe kanë frikë se mos humbin vendet e punës. S’ka gjë më të rëndësishme sesa të mendosh që të ndryshosh këtë situatë për jetën tënde. Gjatë këtyre ditëve, në mënyrë të veçantë gjatë javës së fundit dhe ka qenë kjo një ndër arsyet që unë kam qenë shumë e zënë, kam bërë takime të pafundme me diplomatë të huaj kryesorë në Tiranë. Dhe njëri prej tyre më tha: “Ju shqiptarët keni tri jetë, që njërën ia dedikoni kryetarit të partisë, jetën e dytë ia dedikoni partisë dhe pastaj mendoni për jetën tuaj? Si ka mundësi? Kam qenë në Shqipëri tri dekada më parë dhe të njëjtat probleme, njëlloj si tri dekada përpara, i gjej edhe sot. Pa folur për varfërinë. Politika në përgjithësi, nuk mendon që kjo varfëri, ky shkretim vlerash, kjo rënie e shtetit, kjo papërgjegjësi qeverisjeje në qeveri”. Ne jemi një vend i çudirave, ne s’kemi qeveri se këtu vetëm ka batuta, qeveris me batuta, ndërsa pjesa tjetër ka ikur nga opozitarizmi dhe nga misioni, i ka braktisur. Kemi qenë për tre vite pa Gjykatë Kushtetuese. Nuk ndodh në ndonjë vend tjetër të botës, pa qeveri, pa opozitë, pa Gjykatë Kushtetuese.

Mjaftojnë këto tre elementë që qeveria duhej të ishte rrëzuar faktikisht.

Në fakt, nuk duhej të vinte në mandatin e dytë. Ka emra përse kjo qeveri ishte në mandatin e parë dhe është gjysma e opozitës së sotme, ka emra të atyre që i dhanë mandatin e dytë dhe është përsëri gjysma tjetër e opozitës së sotme dhe ka përgjegjës për rrezikun që mund të ketë për të marrë mandatin e tretë, për shkak të dorëzimit të të gjithë pushtetit lokal te kundërshtari, përveç dorëzimit të pushtetit legjislativ. Prandaj ka nevojë për një analizë të thellë, jo në funksion të interesit të ngushtë personal të karriges apo të perspektivës së iksit apo të ypsilonit, por të jetës, të familjes së qytetarit. Ky qytet, dhe unë do ta përsëris prapë, duhej të ishte qyteti më i frekuentuar si qyteti më turistik në Shqipëri sepse asnjë si Shkodra nuk ka një kala aq të bukur si Shkodra, nuk ka një liqen ku arrin për 10 minuta me biçikletë, nuk ka detin kaq afër, malin kaq afër, një qendër që e trashëgojmë prej 100 vitesh, që as sot nuk e kemi bërë ne, por na e kanë dhënë dhuratë, të kemi një pjesë kulturore dhe trashëgimi kulturore sepse Marubi është bërë tërheqës dhe është tërheqës. Dhe pse është Korça dhe nuk është Shkodra? Korça nuk ka një liqen kaq afër, nuk ka një kala siç e kemi ne, nuk ka një Marub siç e kemi ne, nuk ka bukurinë e qytetit tonë që na e ka falur Zoti.

Iu dha vëmendje gjatë 8 viteve të qeverisjes së Partisë Demokratike, por ndryshoi kjo besoj me ndryshimin e qeverisë. Dhe një barrë të madhe e ka edhe mungesa e investimeve në Shkodër nga vetë qeveria sepse krahasimisht me kohën kur ju ishit zëri i Shkodrës në parlament dhe kishim investime të panumërta, nuk po hyj t’i analizoj investimet që kanë qenë gjatë qeverisë Berisha në Shkodër, por krahasimisht me këtë qeveri ka një disproporcion shumë të madh.

Jo, nuk ekzistojnë më investime në vitet e fundit. Nuk ekzistojnë.

Dhe ndoshta është edhe mungesa e parlamentarizmit që ka sjellë mungesën e investimeve, sepse s’kemi pasur deputetë që kanë kërkuar me të drejtë pranë çdo lloj qeverie, që këtu të vijnë investime qoftë edhe të huaja.

Nuk ka pasur një zë të fuqishëm për t’i dalë dhe nuk e kanë thjesht deputetët, e kanë të gjithë ata që kanë lidhje me atë forcë politike që ky qytet u ka dhënë prej tri dekadash, duke filluar nga kryetari i madh në Tiranë, duke vazhduar te deputetët dhe te të gjithë të tjerët. Është unike në botë që ta konsiderosh një qark, se nuk është vetëm qyteti por i gjithë qarku i braktisur, a thua se i takon Serbisë. Është e paimagjinueshme, prandaj bëj një ftesë, por edhe e pafalshme që kush nuk i doli zot qytetit tonë. Janë të dyja bashkë sepse në qoftë se ke një reagim të fortë për t’u dalë zot interesave të qytetit, sigurisht që e detyron kryeministrin për të sjellë diçka. Nuk sjell aq sa duhej t’i takonte qytetit tonë, por ai nga frika do të reagonte. Imagjino pak po ta rrethoje Kryeministrinë me të gjithë shkodranët dhe t’i thoshe: sill investime, për gjëra konkrete, jo për karrigen e dikujt.

Ne kemi bërë protesta edhe për kryetarin e partisë.

Ne nuk kemi bërë protesta për qytetin tonë, as për punësimin, as për investime, kemi bërë për karrigen e kryetarit të partisë sonë. Por jo për interesin tonë, për familjen tonë, për punësimin e fëmijëve të shkodranëve. Ndaj edhe unë i ftoj sot qytetarët e qytetit tim: mendoni për familjen tuaj, për fëmijët tuaj. Mendohuni dhe largohuni nga sigla dhe nga emri. Nuk e bëjnë dy germa atë parti, për të cilën ne jemi hedhur në zjarr, e bëjnë parimet, e bëjnë vlerat. Partia Demokratike është partia ku duhet të ketë debat, ku duhet të ketë votë, ku duhet të ketë vlerë familja, ku duhet të ketë patriotizëm, që duhet të sjellë shpresën e besimin dhe jo pazarin dhe interesin familjar. Ndaj edhe në njëfarë mënyre, Lëvizja për Ndryshim është një bijë e Partisë Demokratike dhe që synon përfaqësimin e së djathtës. E gjithë lista e Lëvizjes për Ndryshim vjen nga e djathta, nga përfaqësimi më dinjitoz i së djathtës shqiptare.

Besoj se i keni parë listat e deputetëve, edhe të partive, qoftë të PD-së, të PS-së. a keni një koment për listën e PD-së së Shkodrës, duke pasur parasysh që në këtë listë ka edhe emra të atyre personave me të cilët ju keni bashkëpunuar më përpara, pra ish-kolegët tuaj edhe në parlament. A përfaqëson demokratët e vërtetë ajo listë apo është lista e kryetarit?

Absolutisht që është lista e kryetarit. Çdo herë ka qenë lista e kryetarit. Herën e parë për ta përdorur për presion kundër Jozefinës, herën e dytë për ta përdorur për presion kundër Jozefinës. Është listë e kryetarit dhe kjo është një prej fakteve që e bëjnë jodemokratike atë që duhej të ishte Partia Demokratike. Ju e dini se çfarë procesi farsë u zhvillua gjatë vitit të kaluar dhe u përmbys çdo gjë për të shkuar te një listë sipas interesit të familjes së kryetarit.

Në atë proces, shumë demokratë kanë kërkuar që të ishit edhe ju pjesë, pavarësisht se ju e keni sqaruar këtë pikë, pjesën e procesit.

Dua t’ju tregoj që e kisha të drejtë reagimin apo jo. Procesi më pas tregoi që unë kisha shumë të drejtë dhe kjo është vetëm njëra prej atyre që unë kam kritikuar dhe që koha ka treguar se kam pasur të drejtë. Unë do të doja shumë që të kisha gabuar në vlerësimet e mia. Për fat të keq, koha tregon se kam pasur të drejtë në qëndrimet e mia, siç kam pasur të drejtë më 1997 kur i kam dalë zot bashkë me demokratët e tjerë dhe kemi ngritur PD-në, siç kam pasur të drejtë më 2013 kur jam ngritur për të nisur dhe për të inicuar dekriminalizimin, për herë të tretë jam nisur fillimisht e vetme, por sot jam e rrethuar me njerëz, për të filluar procesin e demokratizimit dhe të betejës kundër tre kryetarëve që mbajnë peng jetën politike dhe ekonomike dhe janë përgjegjësit kryesorë jo vetëm të polarizimit politik, por edhe të polarizimit ekonomik të vendit tonë.

Drejtuesi politik i PD-së së Shkodrës, në një intervistë që unë kam pasur me të, ju ka cilësuar si një parti patericë e Edi Ramës.

M’i kanë çuar titrat dhe e kam gjetur veten duke buzëqeshur dhe duke e lexuar. Në fakt nuk është i vetmi, është një linjë partie që përcillet si propagandë në të gjithë strukturën e partisë. E kanë për detyrë që të thonë se Jozefina është kolaboracioniste, armike etj., etj. Unë e kam për herë të dytë, e kam provuar këtë në kohën e Enver Hoxhës dhe po e provoj në kohën e Lulzim Bashës. Mua nuk më impresionon fare dhe ai e di që mua nuk më impresionon. Ai e bën për të impresionuar njerëzit që më rrethojnë mua. Kjo është përdorur edhe si një provë besnikërie të atyre që kërkojnë vende të sigurta dhe karrige të sigurta nesër në parlament, ëndrra e kryetarit të partisë. E kupton se ku jemi? Jemi kthyer më keq se në kohën e Enver Hoxhës. Është enverizëm i gjallë dhe kjo është një arsye tjetër që unë jam për largimkin e Edi Ramës, të Lulzim Bashës dhe të Ilir Metës.

Të ndalemi te listat, se duke pasur parasysh që në kampin tjetër është zoti Beqaj, me të cilin edhe unë kam pasur një intervistë, ku cilësonte se Jozefina Topalli nuk i shqetëson sepse do të marrë vota të djathta. PD-në më shumë duket se e shqetëson kandidimi juaj sesa vetë PS-ja.

Unë jam armiku i këtyre zgjedhjeve për të tre këta, se këta të tre merren vesh mirë me njëri-tjetrin. Pavarësisht shantazheve që duket se i bëjnë në media, ata i kryejnë pazaret me njëri-tjetrin siç i kanë bërë gjatë 8 viteve dhe sigurisht që s’ka arsye pse të shqetësohet ai. Dhe unë e them që unë dua të kthej të djathtën reale në parlament, që të dy bashkë e kanë shkrirë. Përjashtimi i elitës politike të së djathtës është bërë me marrëveshjen e 2017-s, nga marrëveshja e Lulzim Bashës bashkë me Edi Ramën. Është bërë nga të dy bashkë dhe prandaj ka marrë mandatin e dytë. Unë nuk i marr vota askujt. Ato vota që do të shkojnë te Lulzim Basha për shkak të siglës, shkojnë aty. Ato që nuk shkojnë tek ai vijnë tek unë. Unë i bëj një premtim çdo të djathti: mandatet tona do t’i bashkohen së djathtës për të krijuar një qeveri të djathtë dhe për të pasur një kryeministër të pakorruptuar që të mendojë dhe ku do të kemi influencë bashkë me kolegët e tjerë për të influencuar dhe për të sjellë jetën ekonomike dhe jetën kulturore në qytetin tim. Unë nuk kam gjë më të shtrenjtë se qyteti ku kam lindur dhe ku jam rritur, ku më kanë votuar për 20 vite dhe ku më besojnë akoma. Dhe nëse unë do të kem një mandat, unë uroj dhe kam shpresë se do të kem shumë mandate, por edhe një votë sikur të kem, ajo votë së pari shkon për Shkodrën dhe sigurisht për të gjithë Shqipërinë, por mbi të gjitha për qytetin tim.

Dhe kundër Edi Ramës.

Atëherë, e para kundër Edi Ramës. Vota ime që shkon djathtas eliminon Edi Ramën të parin, por në të njëjtën kohë eliminon edhe Lulzim Bashën. Unë e di që ka pasur skeptikë gjatë diskutimeve kur është krijuar Lëvizja. Po si e ke të mundur që të largosh të tre përnjëherë? Ja, është e mundur, me një grusht mandatesh që i bashkohen së djathtës, dhe gjen një kryeministër të pakorruptuar, ke larguar si kryeministër Edi Ramën, ke larguar Lulzim Bashën që mban peng dhe bën pazare me Edi Ramën, dhe krijon një qeveri të djathtë që më shumë do të jetë një qeveri e dhembshur njëherë, që të mendojë për të hapur vende pune, për të luftuar korrupsionin dhe për të sjellë investime për të ndërtuar jetën ekonomike.

Tensioni i fushatës elektorale duket sikur do të shkojë gjithnjë në rritje. Pamë rastin në Elbasan, po ashtu gjatë ditës së sotme janë sulmuar dy seli të forcave politike në Fier, shitblerja e votës një tjetër fenomen që shpresoj të mos e karakterizojë këtë fushatë elektorale, por a janë këto fenomene që ju shqetësojnë në këtë betejë të 25 prillit?

Po vijëzohet një linjë konflikti në këto zgjedhje, e filluar nga provokimet e qeverisë dhe nga sjelljet e Presidentit të Republikës, e vazhduar në Elbasan që është vendi më delikat për shkak të bandave të forta kriminale që kanë dalë në vijën e parë. Unë nuk e dija këtë që ka ndodhur me selitë.

Po, ka ndodhur, është sulmuar me gurë selia e PS-së dhe selia e PDIU-së në Fier.

Ky pastaj është alarm serioz. Por në fakt ka ndodhur në Shkodër në fillim. Dhe nëse ka pasur dy momente që unë kam qenë shumë e trishtuar bashkë me të tjerët, por ju si gazetarë e keni ndjekur, që në tri dekada nuk ka ndodhur kurrë që të sulmohet një seli e majtë apo e djathtë qoftë, ajo nuk mund të preket sepse në qoftë se prek të majtën, prite se të vjen tek e djathta. Dhe pastaj fillon një proces që nuk merr fund, nuk përfundon kurrë dhe përfundon vetëm me djegien e Shqipërisë. Dhe në qoftë se dikujt i shkon mendja për një rikrijim të 1997-s, ata janë kriminelë. Dhe unë nuk hezitoj për ta thënë, se ata janë kriminelë në një shoqëri dhe në një Shqipëri, ku përgjegjës janë ata vetë, ku varfëria është 40%, ekstreme, dhe ku papunësia është në shifra që nuk ekzistojnë në asnjë vend të botës.

Është kjo edhe arsyeja pse presidenti ka dalë jashtë kontureve të institucionit që ai drejton sepse kërkon me çdo kusht që të mbajë karrigen?

Të gjithë Presidencës, të pushtetit. Këta kërkojnë, këta njerëzit i shohin si numra votash. Këta nuk i shohin si qenie njerëzore, këta i shohin vetëm si vota, qoftë Edi Rama, qoftë Ilir Meta, qoftë Lulzim Basha.

Sepse sjellja e tij edhe gjatë përplasjes në selinë e FRD-së në Tiranë, duket se nuk i shkon për shtat një presidenti, pavarësisht se bëhet nën kauzën për të mbrojtur partitë politike dhe pluralizmin në Shqipëri.

Tani unë kam një histori me atë godinë. Unë jetën time politike e kam në atë godinë. Ajo ka qenë Partia Demokratike. Ajo ka qenë beteja për demokratizimin e vendit. Ka qenë kryeministër ai që sot është president dhe na ka rrethuar neve me tanke. Ky që bën sikur preket. Pjesa tjetër e ka provokuar dhe ata janë më të zinj, se provokojnë, se nganjëherë është më i keq provokuesi sesa goditësi. Por mund t’ia hedhin disa shqiptarëve, por jo mua. Kam qenë në atë godinë kur na ka rrethuar me tanke, me ushtri, me polici me armë dhe na ka marrë dhe na ka çuar në polici, partinë. Kam qenë nënkryetare partie dhe nënkryetare parlamenti. Kështu që prandaj them që kam shumë frikë në një linjë konflikti. Dhe një gjë tjetër do ta them për shqiptarët, për shkak të eksperiencës, jo se di më shumë se të tjerët. Sikur çdonjëri prej jush ta dinit se sa frikë ju kanë politikanët, ju do të bëheshit të gjithë bashkë për t’i larguar të tre këta bashkë. Por secili prej jush, unë e di që mendon se nuk ndryshon asgjë, mendon se të gjithë janë njëlloj, mendon të rrijë në shtëpi se nuk ndryshon gjë. Në qoftë se rrini në shtëpi dhe nuk shkoni për të votuar, njerëzit më të kënaqur prej kësaj janë Edi Rama, Ilir Meta dhe Lulzim Basha me Monika Kryemadhin. Dilni dhe votoni kundër të treve.

Keni frikë se do të dëmtohet ky proces zgjedhor nga shitblerja e votës, një fenomen që dënohet në çdo deklaratë të ndërkombëtarëve.

Që të gjithë janë duke blerë vota dhe ka filluar një garë e madhe e çmimit të votës. Por shqiptarët janë bërë aq të mençur sa edhe lekun mund ta marrin, edhe votën e kanë të fshehtë. S’kanë çfarë t’u bëjnë. Votën e kanë të fshehtë, s’ua kontrollon dot askush. Dhe unë i ftoj që të votojnë për perspektivën e familjes së tyre, jo për partinë, jo për kryetarin, për veten e tyre.

Kam një pyetje për sa i takon marrëdhënies suaj me ish-kryeministrin Berisha. Keni komunikime së fundmi, ndoshta edhe gjatë këtyre ditëve të fushatës elektorale?

Ditët e fundit jo, por komunikimi im ka qenë i vazhdueshëm me zotin Berisha dhe me të gjithë kolegët e mi të punës përgjatë 20 viteve, me të gjithë ish-deputetët e 20 viteve, ish-zyrtarë të 20 viteve, demokratë të thjeshtë në të gjithë Shqipërinë, kryesisht me ata, me të cilët kam bërë betejat më të vështira në opozitën e parë dhe të dytë sepse jeta ime kryesisht ka qenë në opozitë. Kam 12 vite në opozitë, 8 vite Kryetare e Parlamentit dhe unë me ata identifikohem.

Ju ka përgëzuar për Lëvizjen për Ndryshim apo gjithçka ka kaluar në heshtje, jo vetëm në aspektin politik por flas edhe në aspektin miqësor.

Jo, nuk mund të ndodhë një gjë e tillë. Ai është treguar korrekt duke thënë që liria i jep mundësi gjithkujt, se po ta bënte ndryshe nuk do të ishte ai që është sepse ai ka qenë i pari që u ka thënë shqiptarëve që me PD-në po themelojmë pluralizmin, apo jo? Dhe prandaj po them që ata që sulmojnë një lëvizje të re, së pari janë enveristë dhe nuk kanë kuptuar që pluralizmi i jep mundësi jetës politike, jetës publike që të rinovohet, që të riformohet, që të sjellë një klasë të re politike, një elitë të re politike. Është koha për të bërë një lëvizje tjetër të madhe, për të pasur kurajë, për të qenë i vërtetë me veten dhe për të hedhur një votë kundër këtyre të treve se të tre bashkë e kanë lënë Shkodrën kështu dhe të tre janë përgjegjës për këtë situatë të Shqipërisë në përgjithësi dhe të Shkodrës në veçanti.

B.K./Shqiptarja.com

TAG:
• PD
• jozefina topalli
• Fushate elektorale
• zgjedhjet parlamentare 2021
• levizja per ndryshim