Në fshatin Karkavec të bashkisë Përrenjas takojmë Avni Kryemadhin, blegtorin e njohur që dimrin e kalon këtu bashkë me bashkëshorten në tokën që ka blerë për të ngritur fermën e tij.

Sot mbarështon 30 krerë lopë dhe 30 krerë viça si dhe ka 5 hektarë vreshta e rreth 1.5 hektarë qershi.

“Është e vështirë se ka lodhje fizike”, thotë Avni Kryemadhi.

Gjatë verës, ai kthehet në fshatin e lindjes, Stravaj bashkë me blegtorinë.

"Na pëlqen këtu, se gjithmonë jemi marrë me blegtori", shprehet ai.

Blegtori shprehet për Report Tv se rritja e çmimit të naftës është ndjerë menjeherë dhe po ia vështirëson punën. Frezimi i tokës nga 20 mijë ka shkuar në 30 mijë lek.

“Rritja e çmimit të naftës na ka vështirësuar shumë. Frezimi i tokës nga 20 mijë ka shkuar në 30 mijë lek", thotë ai.

Ka rreth 25 vite që merret me blegtori por ende vuan për gjetjen e tregut si për mishin ashtu dhe për qumështin.

"Djathin dhe gjizën e bëjmë sipas kërkesës",shprehet fermeri.

Avni Kryemadhi tregon se blegtoria për të nuk është vetëm aktivitet ekonomik por një mënyrë jetese, prej së cilës nuk do të heqë dorë pavarërisht sfidave.