Deputeti socialsit, Alfred Peza, ka dëshmuar mesditën e kësaj të premte përpara Prokurorisë lidhur me pasurinë e tij. 

Në një prononcim të shkurtër për mediat pas daljes nga organi i akuzës, Peza u shpreh se pasuria e tij nuk ka asgjë të paligjshme dhe se është i hapur për hetime.
 
"Është një procedurë normale që zbatohet në të gjitha çështjet e tilla. Përsa i përket hetimit, s'dua të bëj asnjë koment, t'i lëmë të bëjnë detyrën. Sa më takon personalisht, rikonfirmoj se nuk ka asgjë të jashtëligjshme në pasurinë time dhe të familjarëve të mi", u shpreh Peza. 

Prokuroria e Përgjithshme njoftoi se ka nisur hetimet për tre akuza ndaj deputetit socialist. Organi i akuzës ka ngritur tre akuza për Pezën si falsifikimi, deklarimi i rremë i pasurisë dhe evazioni fiskal. 

Ndaj Alfred Pezës po zhvillohen dy hetime paralelisht, nga ILDKPI dhe hetimi penal që po kryehet nga Prokuroria e Përgjithshme. 

Heimet ndaj Pezës nisën pasi rezulton aksioner me 1.13 miliardë lekë në një bankë private, ndërsa rroga e deklaruar si drejtues në media deri në vitin 2013-ë, ka qenë 80 mijë lekë të reja, ndryshe nga sa është shprehur në media deputeti socialist se është paguar deri në 10 mijë euro. 

Redaksia Online
l.q/Shqiptarja.com