Polemika në kombëtaren e Italisë për shkak të 'basteve ruse', Andrea Pirlo del nga skena për rolin e trajnerit! Maldini jep dorëheqjen

Ka zgjatur vetëm 17 dite aventura e Paolo Maldinit si drejtor teknik i kombëtares së Italisë. Ish-futbollisti i Italisë dhe Milanit ka dhënë dorëheqjen bashkë me këshilltarin Leonardo pasi federata e futbollit me në krye Malago-n nuk e konfirmuan Pirlon si trajner të ri të axurrëve. Pas refuzumit të Guardiolës Pirlo ishte zgjedhja e Maldinit, por për shkak të lidhjes që ai kishte si ambasador i një kompanie bastesh ruse, por edhe presionit politik, ai dështoi të emërohej.

Kjo në një kohë kur pritej vetëm emerimi, pasi palët e përfshira kishin rënë dakord. Një situatë që ka krisur edhe besimin e Maldinit ndaj presidentit të federatës italiane të futbollit. Maldini ndërkohë njihet si një person që nuk pranon ndërhyrje në punën e tij dhe kjo si ka pëlquer aspak edhe pse i është kërkuar të mos largohet.

Për pasojë, me ikjen e Maldinit, i cili kishte një projekt 8-10 vite, pritet që trajneri i ri i italisë të emërohet roberto mancini ose antonio conte

Presidenti i Federatës Italiane të Futbollit (FIGC), Giovanni Malagò, do të zhvillojë sot një takim jozyrtar me të gjitha palët e përfshira, në prag të mbledhjes së Këshillit Federal që do të mbahet të martën. Në qendër të diskutimeve do të jetë edhe emërimi i trajnerit të ri të kombëtares italiane.

Harrojini buzëqeshjet e pak ditëve më parë në ambientet e Lega Serie A, ku u panë së bashku Giovanni Malagò, Paolo Maldini dhe Leonardo. Dështimi i emërimit të Andrea Pirlos si trajner i ri i Italisë, i konfirmuar nga vetë ish-mesfushori përmes rrjeteve sociale, ka tensionuar ndjeshëm situatën. Tashmë drejtori teknik Paolo Maldini, së bashku me bashkëpunëtorin e tij më të afërt, Leonardon, mund të largohen vërtet nga Federata.

Sipas shumë burimeve, për Maldinin çështja e lidhjeve të Pirlos me Rusinë është vetëm një pretekst për të kufizuar autonominë e tij në vendimmarrje. Pikërisht për këtë arsye ai po mendon seriozisht të japë dorëheqjen. Ndërkohë, emri i Giorgio Chiellinit përmendet gjithnjë e më shumë si pasuesi i mundshëm në postin e drejtorit teknik.

Malagò po fiton kohë - I ftuar në një aktivitet të organizuar nga Il Sole 24 Ore, ish-presidenti i Komitetit Olimpik Italian foli për situatën:

"Trajneri i ri? Që nga ky mëngjes kam marrë shumë mesazhe. Do të flas me të gjithë sa më shpejt që të jetë e mundur, ashtu siç është e drejtë.

Nëse duam të rikthejmë Italinë në nivelet më të larta të futbollit ndërkombëtar, duhet të punojmë me djemtë që sot janë 13 deri në 16 vjeç. Për këtë arsye duhet të ndryshojmë të gjithë sistemin e formimit, kulturës sportive dhe zhvillimit të lojtarëve. Kjo përfshin edhe trajnerin e kombëtares. Është një çështje mbjelljeje për të ardhmen. Idetë tona janë shumë të qarta.

Po punojmë për këtë, edhe pse përballemi me shumë vështirësi, sepse nevojitet një transformim i thellë. Duhet të kemi parasysh gjithashtu se Italia nuk është më një vend ku futbolli është sporti i vetëm që dominon, sot ka shumë sporte të tjera që tërheqin interesin e të rinjve."

Në orët e ardhshme priten zhvillime të rëndësishme

Presidenti i Federatës do të takohet në Romë me përfaqësuesit e ligave, si dhe me delegatët e futbollistëve dhe trajnerëve, në prag të mbledhjes së Këshillit Federal të së martës.

Sipas Corriere della Sera, bëhet fjalë për një samit jozyrtar, por me rëndësi të madhe, i planifikuar për në orën 18:00, i cili do të vazhdojë edhe gjatë një darke pune.

Është e qartë se një nga temat kryesore do të jetë zgjedhja e trajnerit të ri të kombëtares. Malagò synon të kuptojë qëndrimet e të gjitha palëve, të bëjë një tjetër bilanc të situatës dhe të gjejë një rrugëdalje në një moment shumë të vështirë për futbollin italian.

Gjithashtu pritet një takim i drejtpërdrejtë mes Malagò, Paolo Maldinit dhe Leonardos, pikërisht në ditën kur Andrea Pirlo duhej të zyrtarizohej si trajneri i ri i Italisë.

Në rast se Paolo Maldini jep dorëheqjen, shumë mbështesin kandidaturën e drejtuesit të Juventusit, Giorgio Chiellini, për postin e drejtorit teknik. Ndërsa për stolin e kombëtares së Italisë, favoriti do të bëhej Antonio Conte.

Në vendin me 60 milionë 'trajnerë të Kombëtares', paradoksalisht nuk po gjendet dot një trajner i ri. Historia e Andrea Pirlos duket si një roman i Franz Kafkës. Nuk ka futbollist të tridhjetë viteve të fundit që të ketë gëzuar një admirim kaq të madh e të pakontestueshëm. Ai ishte simboli i futbollit të bukur dhe respektohej edhe nga rivalët që kishin vuajtur talentin e tij në fushë.

Të gjithë yjet e tjerë të mëdhenj, Buffon, Totti, Del Piero, Cannavaro, Nesta apo Jorginho, kanë ndarë opinionin publik në periudha të ndryshme, por jo Pirlo.

Sot, megjithatë, ai është në qendër të kritikave. Vetë ish-mesfushori u distancua paraditen e sotme, përmes një postimi në rrjetet sociale, nga mundësia për të marrë drejtimin e kombëtares italiane.

Asnjë kandidaturë për trajner nuk kishte shkaktuar kaq shumë polemika. Çështja e sponsorizimit me kompaninë ruse të basteve i dha goditjen përfundimtare kandidaturës së tij. Pirlo u bë, në një farë mënyre, një pasojë indirekte e pushtimit rus të Ukrainës.

Çfarë ndodh tani? Nga të gjithë skenarët e mundshëm, më i besueshmi parashikon dorëheqjen edhe të drejtorit teknik Paolo Maldini, njeriut që e zgjodhi Pirlon.

Një vendim i tillë do të nënkuptonte refuzimin e plotë të projektit të tij. Kështu, Italia do të rrezikonte të mbetej papritur pa trajner dhe pa drejtor teknik, duke u kthyer praktikisht në pikën zero, një muaj pas zgjedhjes së Giovanni Malagòs në krye të Federatës.

Nëse presidenti kërkoi Maldinin dhe bëri shumë mirë, sepse kishte nevojë për një figurë të futbollit me vizion, përshtypja është se do të kërkojë menjëherë një pasues për të, përpara se të emërojë trajnerin e ri.

Sigurisht, ky nuk është një rregull i shkruar. Malagò mund të vendosë edhe vetë për trajnerin. Në atë rast, emri më i mundshëm do të ishte Roberto Mancini.

Megjithatë, edhe Mancini mbetet një figurë që ndan opinionin, për shkak të largimit të tij të papritur nga kombëtarja. Për më tepër, Serie A nuk e mbështet rikthimin e tij, çka do ta bënte të vështirë ndërtimin e një projekti të përbashkët.

Chiellini - Nëse Malagò vendos t'i qëndrojë besnik projektit afatgjatë që ka prezantuar, atëherë do të ketë nevojë urgjente për një "krah të djathtë", një drejtues me njohuri të thella të futbollit.

Nuk ka shumë kandidatë me këtë profil. Përshkrimi përputhet me një tjetër ish-futbollist shumë inteligjent, kapiten i Italisë kampione të Europës, me dy diploma universitare dhe aktualisht drejtues te Juventusi, Giorgio Chiellini.

Që nga korriku, Chiellini ka marrë një rol të ri në klubin bardhezi. Më parë ai ishte përgjegjës për marrëdhëniet institucionale, ndërsa tani mban postin e Drejtorit për Çështjet e Klubit, një detyrë më shumë menaxheriale dhe më pak e lidhur drejtpërdrejt me aspektin sportiv.

Mbledhja e Këshillit Federal (FIGC) - Nesër, në cilësinë e drejtuesit federal, Chiellini do të jetë në Romë. Nëse situata përshkallëzohet, ai mund të marrë një ofertë të papritur: "Kemi nevojë për ty."

Do të ishte një zhvillim i rëndësishëm, jo krejtësisht i papritur, që do ta detyronte të reflektonte seriozisht jo vetëm për të ardhmen e tij personale, por edhe për atë të kombëtares.

Chiellini ishte impresionuar nga prezantimi i Paolo Maldinit dhe Leonardos dhe këtë e kishte deklaruar menjëherë pas konferencës: "Ata janë njerëzit e duhur për ta rindërtuar kombëtaren. Duhet të bëhen disa ndryshime, por besoj se procesi tashmë ka nisur. Paolo e meriton besimin e plotë."

Këto fjalë u thanë në një kohë kur emërimi i Pirlos dukej vetëm çështje formalitetesh dhe askush nuk e imagjinonte se çështja e sponsorit rus të basteve do të ndryshonte gjithçka.

Conte rikthehet në garë - Nëse Chiellini do të bëhej drejtori i ri teknik, gjithmonë duke folur me rezervat e nevojshme, emri i Antonio Contes do të rikthehej fuqishëm në garë. Conte kishte mbetur jashtë fazës finale të negociatave. Emri i tij nuk hyri as në listën përfundimtare.

Ekziston edhe një arsye teknike. Sipas projektit të paraqitur nga Maldini, filozofia e lojës që kërkohej ishte e ndryshme nga ajo e Contes. Serie A ka kërkuar emërimin e Contes dhe është shprehur e gatshme të kontribuojë edhe financiarisht për pagën e tij, e cila, siç dihet, nuk do të ishte më e ulët se 5-6 milionë euro në sezon.

Chiellini ka punuar me Conten te Juventusi në periudhën 2011-2014 dhe mes tyre ekziston një marrëdhënie shumë e mirë, si në aspektin profesional, ashtu edhe në atë njerëzor. Vështirë se Conte do të pranonte të ishte alternativa e dytë pas Pirlos. Por nëse projekti do të niste nga e para, gjithçka do të ndryshonte.

Nuk është sekret se Paolo Maldini nuk i preferon as Mancinin dhe as Conten. Megjithatë, nëse Pirlo mbeti jashtë dhe Maldini largohet bashkë me të, atëherë gara do të rikthehej pikërisht te këta dy emra.

Miqësi të vjetra, mëri të kohëve të fundit. Andriy Shevchenko, disa muaj më parë, ishte i pakënaqur me turneun promovues të disa ish-futbollistëve italianë në Rusi dhe marrëdhënien e tyre me agjencinë ruse të basteve Fonbet.

Materazzi, Totti, Pirlo dhe të tjerë. Këta janë njerëz dhe kolegë për të cilët simboli i futbollit ukrainas, presidenti aktual i federatës, ka ushqyer marrëdhënie respekti dhe miqësie. Sidomos për Pirlon, shokun e tij të ekipit gjatë momenteve të paharrueshme me Milanin.

Marrëdhënia e ngushtë mes Andriy Shevchenkos dhe Andrea Pirlos është tronditur.

Presidenti i Federatës Ukrainase të Futbollit nuk e fshehu zhgënjimin: “Kam folur drejtpërdrejt me shumë prej tyre dhe kam shprehur qartë kundërshtimin tim dhe qëndrimin e Ukrainës. E dënoj atë që kanë bërë. Ata e kuptojnë situatën, por megjithatë e morën këtë vendim. Ua kam shprehur hapur pakënaqësinë time dhe ata e dinë. Do të duhet të jetojnë me këtë, është zgjedhja e tyre”.

Roli i Pirlos si ambasador i 'Fonbet' ka shkaktuar reagime të forta në Ukrainë. Sportisti Vladyslav Heraskevych deklaroi: “Është e trishtueshme të shohësh legjendat e fëmijërisë të shndërrohen në dështime morale, për të cilët asgjë nuk është më e çmuar se rubla ruse. Turp!”

Mbrëmjen e djeshme, Andrea Pirlo publikoi në Instagram një postim të gjatë, të mbushur me zhgënjim. Në të ai shpjegon natyrën e marrëdhënies së tij me kompaninë ruse Fonbet dhe rithekson dashurinë e tij për Italinë dhe fanellën "azzurre". Sot ai konfirmoi se kishte mësuar se nuk është më në listën e kandidatëve për postin e trajnerit, kjo pasi ishte i përzgjedhuri kryesor i Maldinit.

Ish-mesfushori, i cili ishte shumë pranë emërimit si trajner i ri i kombëtares italiane të futbollit, e nis mesazhin me këto fjalë:

"Mbrëmë mësova se nuk jam më kandidat për stolin e kombëtares italiane. Ditët e fundit kam ndjekur me shumë zhgënjim debatin që është zhvilluar rreth emrit tim dhe mundësisë për të marrë rolin e trajnerit të kombëtares italiane."

Fjala kyçe e mesazhit është pikërisht "zhgënjimi", që pasqyron qartë gjendjen e tij shpirtërore.

"Nga respekti për institucionet, Federatën dhe të gjithë personat e përfshirë, deri tani kam zgjedhur të ruaj heshtjen. Megjithatë, e konsideroj të domosdoshme të sqaroj disa aspekte. Gjatë gjithë karrierës sime, fillimisht si futbollist dhe sot si trajner, kam ushtruar gjithmonë profesionin tim duke respektuar plotësisht ligjet e vendeve ku kam punuar dhe kontratat që kam nënshkruar.

Bashkëpunimi profesional që është bërë objekt i polemikave të fundit ka lindur në kuadër të aktivitetit tim profesional në Emiratet e Bashkuara Arabe dhe është ekskluzivisht i natyrës tregtare dhe sportive. T'i japësh këtij bashkëpunimi një kuptim politik do të thotë të më atribuosh bindje që nuk i kam shprehur kurrë dhe që nuk më përkasin."

Më pas Pirlo falenderon Paolo Maldinin dhe Leonardon.

"Dëshiroj të falenderoj Maldinin dhe Leonardon për vlerësimin dhe besimin që kanë treguar ndaj meje. E njoh profesionalizmin, seriozitetin dhe dashurinë që ata i kanë kushtuar gjithmonë futbollit italian.

Më vjen keq që një zgjedhje me karakter sportiv u shndërrua kaq shpejt në një debat publik, duke i atribuar personit tim domethënie dhe qëllime që nuk më përkasin. Dashuria ime për Italinë nuk varet nga një detyrë apo post. Ajo është pjesë e historisë sime, e identitetit tim dhe do të më shoqërojë gjithmonë", shkruan Pirlo.

Dy kontratat

Keqardhja e Pirlos është e kuptueshme, ashtu si edhe fakti që Giovanni Malagò kërkoi një verifikim të plotë të çdo aspekti të kësaj situate të ndërlikuar.

Çfarë rezultoi nga analizat? Pika e parë. Në kontratën e Pirlos me United FC Dubai nuk ka asnjë referencë për kompaninë Fonbet. Këtë e konfirmoi edhe pronari i klubit, Sergey Lomakin, i cili deklaroi: "Nuk ekziston asnjë lidhje mes meje, United FC dhe Fonbet."

Pika e dytë. Ekziston një kontratë e dytë, e lidhur me sponsorizimet dhe të drejtat e imazhit, të cilën Pirlo e ka nënshkruar në emrin e tij personal. Bëhet fjalë për një marrëveshje të ndërlikuar që e lidh ish-mesfushorin me Fonbet, edhe pse nuk është ende e qartë nëse kjo lidhje është e drejtpërdrejtë apo realizohet përmes një kompanie të tretë. Pikërisht ky element konsiderohet nga Malagò si veçanërisht i papërshtatshëm dhe problematik.