Prishni muzeun e Mehmetit
në Çorrush, ndërtojmë një të ri

Tre dokumente të reja, sjellim sot, nga fillimi i vitit 1982 mbi fushatën masive që regjimit komunist kishte ndërmarrë për zhdukjen e çdo shenje të emrit të Mehmet Shehut nga literatura, kinemaja, muzetë, etj.
Në pjesën e parë të dokumenteve të publikuara në Shqiptarja.com, një ditë më parë, çështja e muzeut të fshatit Çorrush në Mallakastër përmendej në një prej shkresave, ku jepej urdhri për ta mbyllur si muze dhe objekti të hiqej nga lista e monumenteve. 

Çështja e këtij muzeu shfaqet edhe në një prej dokumenteve që po sjellim sot. Bëhet fjalë për një shkresë sekrete që ishte dërguar nga Fieri nga Komiteti Ekzekutiv i rrethit drejtuar ministrisë së Arsimit dhe Kulturës, ku kërkohej ngritja e një muzeu të ri të kësaj zone, pasi muzeu i vjetër që ishte ngritur në shtëpinë e lindjes së Mehmet Shehut ishte mbyllur menjëherë pas urdhrit të dalë nga Komiteti Qendror në fillim të janarit 1982.

“Mbi bazën e volumit të materialit që parashikohet të ekspozohet, lind nevoja për akordimin e një fondi investimesh rreth 600 000 lekë, veç problemit të ndërtimit të shpejtë të saj nga ndonjë ndërmarrje ndërtuese”, shkruhet në këtë dokument.
Më tej sjellim edhe dy dokumente nga Elbasani dhe Durrësi që dëshmojnë aksionin që po zhvillohej në ato rrethe për heqjen e emrit të ish-kryeministrit të vetëvrarë nga të gjithë muzetë dhe monumentet.