Protesta te Unaza e Re/ Rama: S’ka asnjë shans që zaptuesit profesionistë të dëmshpërblehen

TIRANË-Kryeministri Edi Rama shprehet i vendosur duke deklaruar se nuk ka asnjë shans që objektet pa leje që preken nga ndërtimi i Unazës së Re të dëmshpërblehen. Përmes një postimi në Facebook, Rama thotë se mes atyre që e quajnë vetën në "proces legalizimi", janë shfaqur edhe një kategori e panjohur më parë e zaptuesve profesionistë.

“Ndër ata që e quajnë veten në "proces legalizimi", janë shfaqur edhe një kategori e panjohur më parë e zaptuesve profesionistë të trojeve publike a private, ju siguroj se s'ka asnjë shans që paligjshmëria të dëmshpërblehet me taksat tuaja” shprehet shefi i qeverisë.

Me zaptues profesionistë, Rama u referohet banorëve të Unazës së Re që janë ngritur në protestë në 18 ditët e fundit duke deklaruar se nuk kanë se ku të fusin kokën, por në fakt rezultojnë se kanë 2 deri në 8 objekte të tjera, (shtëpi, dyqane dhe vila) deri në disa kate, madje edhe vila në bregdet, të gjitha këto të ndërtuara pa leje (lexo këtu).

Ndërkohë që dje Autoriteti Rrugor Shqiptar njoftoi se ka ngritur një grup pune për vlerësimin e banesave, të cilat preken nga projekti për zgjerimin e Unazës së Madhe. Grupi do të bëjë vlerësimet për banesat me leje, të cilat do të shpronësohen dhe vetëm më pas do të nisë procesi i shembjes. Ndërkohë që banorët e Unazës së Re kanë paralajmëruar se do të protestojnë para Kuvendit të Shqipërisë ditën e sotme.

TAG:
• edi rama
• protesta e astirit