Qeveria Berisha i jep 200 mijë $
kompanisë lobuese “Podesta Group"

TIRANE - Arka e shtetit është hapur dje për një shumë prej 200 mijë dollarësh amerikanë, që janë paguar përtej detit për kompaninë lobuese të Berishës, Podesta Group. Pikërisht tani, kur imazhi i qeverisë shqiptare ka rënë në minimumet historike në sytë e Uashingtonit dhe Brukselit, vihet re se, sa më shumë shtohen problemet për një qeverisje tashmë tetëvjeçare nga koalicioni i djathtë dhe vetë Berisha në krye të tij, aq më shumë ai po shton financimin për lobim jashtë vendit dhe për këtë nuk ka kursyer të verë dorë vazhdimisht në paratë e taksapaguesve shqiptarë, që në fakt nuk janë të qeverisë, por të shtetit.

MESAZHI

Lobistët e kryeministrit Sali Berisha në Uashington kanë vazhduar punën e tyre duke nxituar menjëherë të dërgojnë e-mail pas votimit për shkarkimin e anëtarit të Komisionit Qendror të Zgjedhjeve, Ilirian Muho.

John Anderson i Podesta Group ka dërguar menjëherë një e-mail, pikërisht në kohën kur Uashingtoni kërkonte të mësonte nga ambasada amerikane në Tiranë për situatën. Sa ma poshtë vijon teksti i dërguar prej tij në mediat amerikane dhe në kancelari të ndryshme.

“Përbërja e KQZ-së ka gjeneruar disa debate në Tiranë. Shkurtimisht u sqaroj se: Duket se një anëtar i KQZ, Ilirian Muho i Lëvizjes Socialiste për Integrim, duhej të ishte ndaluar që të ishte pjesë e KQZ, pasi më përpara është shkarkuar nga detyra e tij si prokuror. Shkarkimi u bë nga presidenti i Shqipërisë në vitin 2003, pasi Muho ishte përfshirë në lirimin e një vrasësi dhe trafikanti armësh, që ishte dënuar në mungesë nga një gjykatë në Itali.

Faktet janë të qarta: Kushdo që është shkarkuar nga detyra publike, nuk mund të jetë anëtar i KQZ-së. Sipas nenit 12, pika e), e Kodit Zgjedhor, çdo qytetar me të drejtë vote mund të jetë anëtar i KQZ, por ai duhet të mos jetë shkarkuar nga detyrat në administratën publike për ndonjë shkelje.

Në një raport të 27 shkurtit 2003, Prokurori i Përgjithshëm Theodhori Sollaku thotë se Muho duhej shkarkuar nga detyra pasi është provuar dhunimi i procedurave ligjore në rastin e vrasësit të dënuar, Aleksandër Kuqo.

Raporti sqaron se pasi Kuqo ishte dënuar në Itali dhe ishte arrestuar në Shqipëri, ishte përgjegjësia e Muhos që si prokuror të njihte vendimin për dënimin e Kuqos në Itali. Në vend të kësaj, ai urdhëroi lirimin e tij,” shkruhet në e-mail.

Bashkangjitur ai ka dërguar të përkthyer në anglisht nenin përkatës të Kodit Zgjedhor dhe letrën në anglisht të ish- Prokurorit të Përgjithshëm, Theodhori Sollaku

ANGAZHIMI

Pak ditë më parë, ka qenë i njëjti përfaqësues i kompanisë amerikane, që u ka dërguar mediave të ndryshme në botë një informacion, duke shprehur shqetësim që kalimi i LSI-së në krahun tjetër “kushtëzon e prek në mënyrë dramatike ekuilibrin politik të Komisionit Qendror të Zgjedhjeve dhe të 89 komisioneve zgjedhore rajonale, anëtarët e të cilave janë zgjedhur me logjikë partiake.

Është fjala për komisione që kanë një rol vendimtar për të luajtur kur të vijë puna për t’i bërë të vlefshme e legjitime rezultatet e zgjedhjeve parlamentare të 23 qershorit”.
Madje, ky përfaqësues arrin sa të paralajmërojë se “mjedisi politik shqiptar është i tillë, që më bën mua të dyshoj se kanë për të ndodhur të pabëra në Shqipëri”.

Shkrimi u botua sot në gazetën Shqiptarja.com (print) 17.04.2013

Redaksia Online
(b.m/shqiptarja.com)

TAG:
• kqz