Shkodër, mbetjet spitalore
kthehen në kërcënim për banorët

SHKODER- Qytetit të Shkodrës vetëm pak muaj më parë iu shtuan godinat e rikonstruktuara të spitalit rajonal, por kjo ndërhyrje për përmirësimin e shërbimit spitalor nuk e ndryshoi situatën jashtë ambienteve spitalore. “A1 Report” zbulon se mbetjet spitalore vazhdojnë të hidhen pa asnjë lloj përgjegjësie pranë koshave të mbeturinave jashtë spitalit, ndërsa qëndrojnë aty për ditë me radhë.

Edhe pse ekziston një ligj i posacëm për trajtimin e mbetjeve spitalore, pamjet tregojnë se pranë këtyre koshave, ngjitur me godinën e spitalit mund të gjesh që nga shiringat, aget, garzat dhe çdo gjë të konsideruar "mbetje spitalore" dhe si e tillë dhe e rrezikshme. 

Megjithatë paradoksi ka të bëjë me faktin se kontenierët e mbetjeve ndodhen pak metra nga vendi ku depozitohen mbetjet spitalore, ndërsa ato hidhen në lulishte dhe jo në koshat e vendosur për këtë qëllim.

Këto mbetje qëndrojnë për ditë të tëra në këtë shesh në pritje të djegies së tyre në autoklava. Në të tilla kushte mbeturinat spitalore favorizojnë terrenin për përhapjen e sëmundjeve infektive.

Ekspertët e shëndetit publik vënë në dukje se hedhja e tyre pranë kontenierëve të plehrave është e rrezikshme, pasi mbartin në vetvete infeksionet e rënda të sëmundjes që kanë kuruar, ose të helmeve që mund të jenë larguar nga trupi i pacientit që është kuruar me to.

Për shkak të kësaj situate qytetarët që lëvizin pranë kësaj zone, por edhe pacientët, janë më të rrezikuarit për t’u prekur nga sëmundjet infektive.

Redaksia Online
(e.s/shqiptarja.com)

TAG:
• mbetje spitalore