Shkodra në protestë për Vllazninë:
Afat 7 ditë për zgjidhjen e krizës

Tifozëve të ekipit të Vllaznisë së Shkodrës u sos durimi duke kërkuar zgjidhjen përmes protestës si mjetin e fundit për rrugëdaljen nga kriza që i ka përfshirë. Kuqeblutë pritën gjithë verën për zgjidhje me shpresën që pas zgjedhjeve lokale do të ndryshonte situata, por një gjë e tillë nuk ndodhi dhe me fillimin e kampionatit Vllaznia e nisi aty ku e la edicionin e kaluar në krizë totale.

Thirrjeve për takime dhe zgjidhje nga drejtuesit, bashkia u është përgjigjur me  heshtje duke bërë që mbi 150 tifozë të Vllaznisë të drejtoheshin para bashkisë për të protestuar me pankarta në duar, thirrje dhe një ultimatum në fund për kryebashkiaken Ademi.

Tifozët kuqeblu kërkojnë nga Voltana Ademi të shkarkojë bordin, të gjithë stafin drejtues duke mos u mjaftuar me largimin e stafit teknik dhe privatizimin e klubit sa më shpejt që të jetë e mundur, pasi rrezikohet rënia nga kategoria. Protesta ishte inicuar prej disa ditësh nga grupimi “Vllaznit Ultras” që i kanë lene afat kryebashkiakes 7 ditë kohë për të gjetur një zgjidhje për kërkesat e tyre.

Disa nga tifozët e ekipit kuqeblu teksa protestonin para bashkisë janë shprehur se “Ekipi ndodhet në gjendjen më të vështirë që nga themelimi duke rrezikuar rënien nga kategoria nëse vazhdon në këtë mënyrë.

Zgjidhja duhet të vijë nga bashkia, e cila të vendosë para përgjegjësisë të gjithë ata që kanë abuzuar me emrin e Vllaznisë në dy vitet e fundit. Kryebashkiakja e Shkodrës duhet të ndërhyrë me urgjencë për të ndryshuar të gjithë drejtuesit dhe të nisë procedurat e privatizimit, pasi koha nuk pret” shprehen ata.

Protestës i kanë bashkuar edhe shumë qytetarë, teksa shkodranët njihen për dashurinë e madhe për futbollin, jo vetëm kur është në momente të mira, por edhe të këqinja.

Protestës i parapriu dorëheqja e stafit teknik me në krye teknikun Zmijani, ndërsa për momentin komandën e ekipit e ka marrë shefi i klubit, Grima deri në momentin që do të emërohet tekniku i ri. Tashmë është vështirë që dikush të marrë ekipin në këtë gjendje aspak premtuese.


d.b/shqiptarja.com

TAG:
• voltana ademi