Shkodra është tronditur mesditën e kësaj të enjteje nga një krim në familje. 62-vjeçari Shqefen Ziçi ka vrarë me çifte bashkëshorten e tij, Bardhe Ziçi, 55 vjeçe, në derën e shtëpisë.

Motivet e ngjarjes nuk dihen ende, ndërsa autori është vënë në pranga. Mësohet se kur blutë e Shkodrës kanë shkuar për ta arrestuar, nuk ka bërë rezistencë. Arma e krimit është sekuestruar.

Në momentin e ngjarjes, nuk ka pasur persona të tjerë në rrugë. Banorët kanë dëgjuar të shtëna, por nuk i kanë dhënë rëndësi. Sipas tyre, nuk kanë shfaqur asnjëherë probleme apo debate.

Njoftimi i policisë:

Rreth orës 13:30, në lagjen “Mark Lula”, dyshohet se për motive të dobëta, shtetasi Sh. Z., 62 vjeç, ka vrarë me armë zjarri, bashkëshorten e tij, shtetasen B. Z., rreth 55 vjeçe.   

Shërbimet e Policisë kanë shkuar menjëherë në vendngjarje dhe kanë kapur autorin e dyshuar, shtetasin Sh. Z., i cili u shoqërua në Komisariat, për kryerjen e veprimeve procedurale. 
Gjithashtu, shërbimet e Policisë kanë sekuestruar armën e zjarrit me të cilën dyshohet se është kryer krimi.  

Grupi hetimor, në drejtimin e Prokurorisë, vijon veprimet për zbardhjen dhe dokumentimin e plotë të rrethanave të ngjarjes.

Lajm në përditësim...

Rendit zhvillimet sipas orarit:
Ora 16:24
Vrasja në Shkodër, E afërmja e autorit: Nuk kishin konflikte, ishin njerëz të mirë (VIDEO)

 

Një nga të afërmet e familjes në Shkodër ka folur për krimin e rëndë që tronditi qytetin pak pas mesdite. Burri qëlloi me armë gjahu bashkëshorten e tij duke e lënë të vdekur.

Zoj Nika tha se mes çiftit s’ka pasur konflikte të mëparshme dhe ishin njerëz të mirë pa probleme.

“Ka qenë i mirë i ndershëm, edhe gruaja. Nuk ua di askush një fjalë të keqe. Na vjen shumë keq për këtë familje, fati i zi. E kam kushëri. Të shkretët fëmijët. Kam qenë shpesh te ta dhe nuk kanë pasur debate”, tha ajo.

K.B/Shqiptarja.com