'Sigal Iduna Park' fortesë e gjermanëve, 'vikingët' danez duan surprizën! Sonte përballja e 1/8

Organizatorët e Evropianit, Gjermania, luan sonte në orën 21:00 përballjen e saj në 1/8 kundër Danimarkës, një rival që shpesh ka bërë surprizën edhe pse nuk e nis si favorite. Një situatë për të cilën Gjermania mendon se ka marrë masat dhe sonte kërkon me doemos çerekfinalet, në një stadium si ‘Sigal Iduna Park’ që premton mbështetje të zjarrtë. Në 19 ndeshje në këtë stadium ‘panzerat’ kanë fituar 15. E fundit miqësorja 2-1 kundër Francës.

Gjermania ashtu si Spanja e ka fituar 3 herë Evropianin, por ka marrë më shumë pjesë se asnjë përfaqësuese tjetër. Në 2024 është prezenca e 14 për 'panzerat' e Julian Nagelsman, i cili është trajneri më i ri i Evropianit në të gjithë historinë. Gjermania gjithashtu ka humbur edhe 3 finale në kampionatin Evropian, e fundit në 2008 kundër Spanjës.

Për Danimarkën kjo është pjesmarrja e 10 në një kampionat Evropian, ndërsa në të fundit para 3 viteve shkoi deri në gjysmëfinale ku u mposht nga Anglia. 'Vikingët' në një rast, në vitin 1992, kanë arritur ta bëjnë të tyrin trofeun.

Ne.k./Shqiptarja.com

TAG:
• euro 2024
• gjermania
• Danimarke