"Kështu e hanë të gjithë"! Me këtë batutë ish ministri i Brendshëm u fut në sallën e Apelit të Gjykatës së Posaçme, ku në shoqërinë e avokatit Maks Haxhiaj dhe prokurorëve, përballë kishin tre gjyqtarët Nertina Kosova, Albana Boksi dhe Dhimitër Lara. Ky i fundit edhe pse vetëm prej 4 ditësh gjyqtarë në këtë proces, gjatë seancës deklaroi se është njohur me dosjen dhe nuk i nevojitet shtyrje.

Pas 10 minutave seanca u ndërpre dhe tre gjyqtarët u tërhoqën në Dhomë Këshillimi për t’u shprehur për fatin e Saimir Tahirit. Unanimisht tre gjyqtarët vendosën të shtyjnë shpalljen e vendimit për më 26 qershor në orën 13:00.

Ish-ministri Saimir Tahiri nuk e komentoi këtë shtyrje, ndërsa avokati i tij Haxhiaj tha se u shty për t’u shpallur vendimi.

Në oborrin e gjykatës nuk mungoi dhe përkrahësja besnike e Tahirit e cila si slogan këtë herë kishte pafajësinë për ish-ministrin.

Në seancën e  datës 11 qershor  në Gjykatën e Posaçme të Apelit për Korrupsionin dhe Krimin e Organizuar u lexuan konkluzionet e Prokurorisë.

Prokuroria e përfaqësuar nga Vladimir Mara dhe Dritan Prenci nuk u tërhoqën nga akuzat dhe dënimi 12 vite që kërkuan në Shkallën e Parë. Saimir Tahiri dhe avokati i tij Maks Haxhia kishin përgatitur një mbrojtje prej 131 faqesh përballë trupës gjyqësore që përbëhej nga Albana Boksi, Nertina Kosova dhe Nure Dreni.

Ish-ministri i Brendshëm Saimir Tahiri u vu nën akuzë pas arrestimit të grupit “Habilaj” ndërsa që në fillim ai pretendoi pafajësi duke e quajtur një proces farsë me prova të montuara.

Në shtator të vitit të kaluar ish-Prokuroria e Krimeve kërkoi dënimin e tij me 12 vite, ndërsa për shkak të gjykimit të shkurtuar shkonte 8 vite, por  gjykata e dënoi Tahirin me 3 vite burg me shërbim prove. Të dy palët nuk u kënaqën duke e apeluar vendimin, prokuroria që nuk tërhiqet nga kërkesa për dënimin e tij me 12 vite, ndërsa ish-ministri kërkon pafajësi të plotë. Në seancë për herë të parë pas vetëdorëzimit ishte i pranishëm edhe Jaeld Çela.

Rendit zhvillimet sipas orarit:
Ora 10:46
Tersi në seancën e ish-ministrit? Tahiri: Edhe kjo na duhej (FOTO-VIDEO)

1592988429_saimirtahiri.jpg

Për ters apo jo, Saimir Tahiri sapo ka dalë nga gjykata është penguar në kabllot e televizioneve. Ai nuk ka pranuar të flasë për mediat, por në momentin e "incidentit" ka deklaruar "edhe kjo na duhej". Vendimi për Tahirin u shty për në datën 26 qershor në orën 13:00.

Ora 10:25
Mbështetësja e ish-ministrit: I pafajshëm Saimir Tahiri!

1592986888_tahiri.jpg

Në pritje të vendimit të ish-ministrit Saimir Tahiri janë edhe shumë qytetarë dhe mbështetës të tij. Pranë ambienteve të gjykatës një përkrahëse e tij mbante veshur një bluze me foton e ish-ministrit ku shkruan: "I pafajshëm Saimir Tahiri! Legjenda Saimir Tahiri"

Ora 10:23
Apeli shtyn vendimin për Saimir Tahirin

Shtyhet vendimi i gjykatës së Apelit për Saimir Tahirin. Gjykata vendosi që të shtynte vendimin për në datë 26 qershor ora 13:00. Trupa gjykuese ka kërkuar kohë për shpalljen e vendimit, pasi njëri nga anëtarët u zëvendësua për shkak të vettingut. 

Ora 09:44
Batuta e Tahirit përpara vendimit të Gjykatës: Kështu e hanë të gjithë! (VIDEO)

I qeshur dhe i qetë, ish-ministri i Brendshëm, Saimir Tahiri është paraqitur në Gjykatë për tu njohur me vendimin. Gjatë hyrjes në Gjykatë, Tahiri është dëgjuar të bëjë një batutë me gazetarët dhe operatoret: "Kështu e hanë të gjithë".