Sot nisi mësimi plotësues në shkolla, udhëzimi: Mësuesit të vaksinohen deri më 30 shtator! Kushi: Shfrytëzoni mundësinë për të nisur vitin me njohuri të rikuperuara

Me maska edhe të shoqëruar nga prindërit, nxënësit në qarkun e Elbasanit i janë rikthyer klasave për të marrë pjesë në mësimin plotësues.

Ata janë shprehur shumë të lumtur që i është dhënë mundësia të përsërisin me mësuesit njohurit e marra vitin e kaluar, një vit i ndikuar në çdo kuptim nga pandemia.

“Shkollat duhet të ishin hapur edhe më herët, pasi ky vit ishte shumë i ngarkuar për ne, sepse ishte edhe COVID-19.”, tha një vajzë për Report Tv.

Një tjetër tregoi se ka ardhur me shumë dëshirë në shkollë, pasi aty mëson gjera të reja dh se ky vendim i ri është marrë që nxënësit të përforcojnë njohurit e vitit të kaluar.

“Kam ardhur me dëshirë, pasi shkolla në fund të fundit është një vend që secili mund të mësojë njohuri të reja. Ky vendim ka ardhur që ne të mësojmë më mirë njohurit e vitit të kaluar”, tha ajo.

Këtë të hënë, klasat në Lezhë janë mbushur me të qeshurat e nxënësve që janë rikthyer sërish në shkollë, pas një kohe të gjatë për shkak të pandemisë.

Masat anti-COVID kanë qenë një prioritet për nxënës dhe mësues në një kohë kur edhe varianti delta është shndërruar në një shqetësim.

Disa prej nxënësve, duke folur për mikrofonin e Report Tv, treguar se janë shumë të lumtur që u kthyen në shkollë sërish dhe se kjo periudhë në të cilën do të përsërisin njohurit është shumë e nevojshme.

“Bëmë mësim, e kishim shumë të nevojshme këtë përsëritje.”, tha një nxënës.

“Sot ishte dita e parë e shkollës. Ja kaluam shumë bukur, bëmë të gjithë lëndët e rëndësishme, gjuhë, matematik dhe anglisht. Kishin të gjithë maskat.”, u shpreh një vajzë.

Ky vit i ri shkollor nuk ngjason me asnjë të mëparshëm. Ky do të jetë shtatori që do t’i dedikohet plotësisht përsëritjes së njohurive nga viti i kaluar, si pasojë që la mësimi online te nxënësit nga pandemia e COVID-19.

Si çdo rreth edhe në atë të Durrësit, mësimi plotësues për nxënësit ka nisur mëngjesin e sotëm.

Duke folur për Report Tv, një nga mësuesit e njërës prej shkollave në Durrës tregoi se kjo do të jetë një fazë ku nxënësit do të përforcojnë njohurit e marra përgjatë vitit të kaluar. Ai tha se mesësit janë trajnuar dhe janë gati për të nisur këtë vit shkollor.

“Ky 1 shtator ndryshe nga vitet e kaluar, pasi fillon me një përforcim të njohurive nga viti i kaluar për arsye të mungesave si pasojë e mësimit online nga pandemisë, Për fillimit e procesit mësimor, ministrja e Arsimit ka marrë të gjitha masat që mësuesit të kenë një program orientues për lëndët. Kanë ardhur të përgatitur me plane dhe programe. Si fillim ishte nga 1-10 shtator, por u pa e arsyeshme të shtyhej deri më 27 shtator. Kjo do të jetë faza përgatitore”, tha ai.

Në një vend ku “tërmeti” la pasojat më të rënda duke marrë edhe jetë njerëzish, Thumanën, sot ka “lindur jeta” dhe nxënësit po i rikthehen mësimit për të vazhduar përpara, në shkollën e re të rindërtuar në zonë.

Sot 400 nxënës të fshatit, do të rifillojnë mësimin për të rikuperuar njohurit e humbura gjatë vitit të kaluar kur pandemia e COVID-19 “goditi’ vendin.

Rrethi i Krujës, ishte ndër më të prekurit sa i përket tërmetit dhe pandemisë, 2 ngjarjet që ndikuan në jetën e të gjithë dhe në veçanti të nxënësve, të cilët janë detyruar të sakrifikojnë duke zhvilluar mësimin me 3 turne.

Pavarësisht sprovave sot Thumana ka një hije tjetër!

Duke folur për Report Tv, Drin Masha, përfaqësuese i zyrës së marrëdhënieve me publikun në Bashkinë e Krujës, tregoi se Thumana është shembulli më i bukur, se pas vështirësisë “lind jeta”.

Ai tregoi lidhur me investimet e kryera deri më tani në arsim si dhe ato që pritet të marrin jetë së shpejti brenda muajit shtator.

“Nga Thumana kemi mesazhin më të mirë dhe më të bukur për gjithë nxënësit që sot janë ulur në bankat shkollore. Sot nis mësimi përsëritës i mësimit dhe kurrikulës për shkak kushteve që pandemia imponoi në realizimin e orocesit arsimor. Kjo është edhe një fazë mirëpërgatitore, për të nxjerr të gjithë shënimet dhe për të përmirësuar cilësinë sidomos infrastrukturën. Kemi fatin e mirë që në Bashkinë tonë po rikonstruktohen 10 shkolla të eja, ndër të cilat 3 hapen brenda muajit shtator. Ato ofrojnë standarte shumë të mira, të ngjashme me ato të fëmijëve në vende të tjera. Shembull i bukur dhe i mirë është pikërisht Thumana, këtu ku ndodhemi sot ku kuptojmë që gati 1 vit e gjysmë më parë ndodhi tragjedia më e madhe ndërsa sot është një shembull i bukur i rivatalizimit, duke na treguar se jeta është ajo që vazhdon dhe që fiton gjithmonë.”, u shpreh ai.

Të gëzuar për vitin e ri shkollor, nxënës të shkollës së re treguan se si pritën mësimin plotësues.

“Ne jemi shumë të gëzuar që filloi shkolla dhe që jemi në këtë shkollë të re. Po përsërisim mësimet e klasës 5, do të hymë në të gjashtën.”, thanë dy vajza.  

“Më pëlqen shumë kjo shkolla e re, jam i lumtur që jam këtu. Urojë të gjithë shokët e mi edhe veten”, u shpreh një tjetër.

Shkollat parauniversitare kanë hapur dyert sot edhe në Bashkinë Shkodër.

Me maska të vëmë dhe me matjen e temperaturës ka qenë pamja që është ofruar në dyert e shkollave në nisje të këtij viti.

Drejtoresha e DAR Shkodër Sindis Sulja, në një interviste për mediat është shprehur se ka nisur procesi plotësues në shkollat e Shkodres nderkohe qe ky vit vjen me risi me mësimin plotësues, regjistrimin ne e-albania për klasat e para, por edhe me shpërndarjen e librave falas.

“Duke inspektuar shkollën e parë kemi konstatuar se të gjitha masat janë marrë. Shkolla e dytë është shkolla Xheladin Fishta në të cilën po bëjmë startin e hapjes së vitit të ri shkollor me programin udhëzues që ka ardhur ministria. Në 2 risitë themelore të arsimit këtë vit janë mësimi plotësues dhe shpërndarja e librave falas në të cilën do vazhdojmë rekrutimin në ditët në vazhdim, dhe pjesa tjetër është regjistrimi i fëmijëve të klasave të para në e Albania dhe klasave të 10 në bazë të vendbanimeve që kanë fëmijët. Unë u uroj suksese ka pasur pjesëmarrje të madhe jo të pritshme. Shpresojmë që me 27 të fillojmë një proces të mbarë pas një viti që lamë pas nga pandemia”, tha ajo.

Për mësuesit dita e parë e mësimit plotësues ka qene surprizues dhe janë te bindur se këto 3 jave do të shërbejnë për marrjen e dijeve dhe nisjen me sukses të vitit te ri shkollore me 27 Shtator.

Sot, më 1 shtator si të gjithë nxënësit e Shqipërisë edhe ata të Fierit i janë rikthyer bankave të shkollës për të plotësimin e mangësive nga viti i kaluar i cili u zhvillua online për shkak të COVID-19.

Mësimi plotësues është pritur shumë mirë nga nxënësit e shkollave në Fier, të cilët u shprehen të kënaqur, duke shpjeguar se një vendim i tillë ishte i duhuri.

“Që nga viti i kaluar e kemi bërë mësimin online dhe ky vendim është shumë i pozitiv pasi kemi shumë mungesa në mësime.”, tha një prej nxënësve.

Një tjetër e cila foli për mikrofonin e Report Tv, tregoi se kjo ishte një domosdoshmëri për të marrë njohurit e nevojshme.

“Jemi shumë gëzuar që iu rikthyen shkollës, kjo është shumë e domosdoshme për në, për të marrë njohuri për të ardhmen tonë.”, tha ajo.

Me rastin e fillimit të  mësimit plotësues Ministrja e Arsimit, Sportit dhe Rinisë Evis Kushi u është drejtuar nxënësve, mësuesve dhe prindërve me anë të një mesazhi të publikuar në rrjete sociale.

Duke iu drejtuar nxënësve ajo thekson se të gjitha shkollat janë gati për mësimin plotësues, i cili u vlerësua nga ekspertët, mësuesit dhe prindërit si një nevojë, sidomos për nxënësit në zonat e riskut në kohën e kulmit të pandemisë, ku mësimi online zgjati më shumë se në zonat e tjera të vendit.

"Për këtë periudhë shkollat tuaja kanë përgatitur një program gjithëpërfshirës, që përveç përsëritjes apo përforcimit të njohurive, përmban edhe aktivitete argëtuese dhe sportive. Prandaj shfrytëzojeni këtë mundësi sepse kjo do t’ju ndihmojë që të jeni sa më të përgatitur dhe ta nisni vitin e ri shkollor me njohuri të rikuperuara, e mbi të gjitha, me dëshirë e pasion për të mësuar akoma më shumë," shton Ministrja Kushi.

Në rreshtat e shkruar për këtë ditë, Kushi shprehet se puna, bashkëpunimi dhe solidariteti që kanë treguar, ka ndihmuar shumë në punën e përbashkët përgjatë vitit të vështirë që kaloi.

"Do të kërkoja nga ju që të tregonit të njëjtin përkushtim edhe në këtë periudhë të mësimit plotësues, që së bashku të bëjmë më të mirën për fëmijët tanë", shkruan ajo.

Në përfundim të mesazhit Ministrja Kushi u ka rikujtuar të gjithëve që të mos harrojnë kujdesin dhe vëmendjen ndaj rregullave anti-COVID, për të ruajtur shëndetin dhe të afërmit.