Sondazhi i katërt i Piepolit në Report Tv/ PS merr mandatin e 3-të, opozita së bashku nuk arrin shumicën! Rritet PD me aleatët, LSI përgjysmohet nga 2017

Në rang kombëtar PS fiton 73 mandate, ndërsa PD 56 mandate. LSI fiton 10 mandate. Megjithatë edhe me koalicionin paszgjedhor PD-Aleanca për Ndryshim dhe LSI së bashku nuk arrijnë të bëjnë shumicën dhe të mposhtin PS.

Sipas sondazhit të Piepolit në bashkëpunim me Report Tv PS merr 47-51 % të votave e përkthyer në 69-73 mandate, ndërsa PD merr 37-41 % të votave ose 54-56 mandate duke pasur rritje nga 2017 që mori vetëm 43 mandate.

LSI ka tkurrje të votave ku merr 4-8 % të votave ose 8-10 mandate nga 19 mandate që ka marrë në 2017.

Luftë për 1 mandat ka edhe Partia e Tom Doshit, PSD, Nisma Thurje dhe Lëvizja për Ndryshim e Jozefina Topallit.

Në qarkun e Vlorë Partia Socialiste ka një mbështetje të madhe dhe sot do të votohej nga 57 deri në 61% e qytetarëve që përkthehen në 7 deri në 8 mandate duke ruajtur mandatet e 2017. Ndërsa PD me aleatët shënon rritje në Vlorë ku nëse do të votohej sot do të merrte 3 deri në 5 mandate. Edhe në këtë qark LSI ka tkurrje por lufton për 1 mandat ku nëse do të votohej sot do të merrte 4 deri në 8 %.

Nëse do të votohej sot në qarkun e Lezhës, sipas sondazhit të Piepolit PD-Aleanca për Ndryshim ka rritje të votave dhe mandateve krahasuar me 2017 ku pritet të marrë 50-54 % të votave e përkthyer në 3-5 mandate. Ndërsa PS ruan rezultatin e 2017 duke marrë 36-40 % e përkthyer në 1-3 mandate.

Nëse do të votohej sot ne qarkun e Kukësit, sipas sondazhit të Piepolit PD dhe Aleanca për Ndryshim ka rritje të votave dhe mandateve nga 2017 duke ruajtur bastionin e saj. Koalicioni i PD sipas sondazhit pritet të marrë 52-56 % të votave duke luftuar për 1-3 mandate. Edhe PS ka ulje në këtë qark nga 2017 ku pritet të marrë 35-39 % të votave duke luftuar për mandat.

Në qarkun e Korçës, PS ka një rritje në vota. Po të votohej sot sipas sondazhit të Piepolit, socialistët do të merrnin 49-53 % të votave ose 5-7 mandate. Ndërsa PD ka një rritje krahasuar më 2017 ku do të merrte 33-37 % të votave duke luftuar për 3.-5 mandatë. Edhe LSI lufton për një mandat edhe pse ka përgjysmim të votave ku do të merrte vetëm 4-8 % ose 0-2 mandate

PS dhe PD luftojnë fort në Gjirokastër. Nëse do të votohej sot në qarkun e Gjirokastër, sipas sondazhit të Piepolit PS do të merrte 41-45 % të votave ose 1-2 mandate, ndërsa PD-Aleanca për Ndryshim do të merrte 35-39 % të votave ose 0-2 mandate. Edhe LSI lufton për mandat, edhe pse ka humbje të votave nga 2017. Sipas sondazhit LSI merr 12-16 % të votave ose 0-2 mandate.

Në sondazhin e bërë nga Instituti Italian Piepoli në bashkëpunim me Report tv, PS arrin që të marrë 10 mandate në Fier, që është edhe objektivi maksimal që kryeministri Edi Rama ka vendosur, kjo u reflektuar edhe në renditjen e kandidatëve ku kreu i Kuvendit, Gramoz Ruçi është pozicionuar pikërisht në vendin e 10-të. Ndërkohë, krahasuar me zgjedhjet e 2017, edhe PD-ja ka pësuar një rritje të ndjeshme, ku nga 25.66% të votave të marra, në 25 prill, sipas sondazhin arrin të shkojë deri në 36%. E përkthyer në mandate ky numër, shkon nga 4-6.

Nëse do të votohej sot ne qarkun e Beratit, sipas sondazhit të Piepolit PS kryeson me 53-57 % e përkthyer në 3-5 mandate, ndërsa PD njeh rritje duke dyfishuar votat duke marrë 28-32 % duke luftuar për 1-3 mandate. Ndërsa LSI ka tkurrje të votave duke marrë vetëm 1/3 e votave të 2017 dhe lufton për një mandat.

Nëse do të votohej sot ne qarkun e Dibrës, sipas sondazhit të Piepolit PS dhe PD kanë një rezultat të ngushtë mes tyre. Megjithatë duket se në vota kryeson PD me 49-53 % të tyre e përkthyer në 2-4 mandate. Ndërsa PS do të merrte 35-39 % të votave ose 1-3 mandate. Krahasuar me zgjedhjet e 2017, LSI humbet dhe mandatin e marrë.

Nëse do të votohej sot në qarkun e Shkodrës, sipas sondazhit të Piepolit PD ruan bastionin e saj duke pasur dhe rritje të mandateve. PD pritet të marrë 46-50 % të votave e përkthyer në 4-6 mandate, ndërsa rritje njeh edhe PS e cila merr 36-40 % e të votave e përkthyer në 3-5 mandate. Për 1 mandat lufton edhe LSI e cila merr 4-8 % të votave dhe partia e Jozefina Topallit mund të marrë 1 mandat.

Nëse qytetarët do të votonin sot në qarkun e Elbasanit, sipas sondazhit të Piepolit PS do të merrte  49-53 % të votave e përkthyer në 6-8 mandate, ndërsa koalicioni PD-Aleanca për Ndryshim do të merrte 37-41 % të votave e përkthyer në 5-7 mandate.  Edhe LSI do të arrinte të merrte nga 0 deri në 2 mandate, aty ku kandidon edhe Monika Kryemadhi e para në listën e LSI-së për Elbasanin. Ajo që vihet re është se krahasuar me zgjedhjet e 2017, PS dhe PD kanë rritje të votave dhe rrjedhimisht të mandateve, ndërsa LSI tkurrje.  

Nëse sot do të votohej në Durrës, 43-47% e qytetarëve do të votonin për Partinë Socialiste, përkthyer kjo në mandate 6-8 mandate, duke pësuar një rënie të lehtë me vitin 2017, pasi në këtë vit kanë votuar për PS-në 45-49%, por pa ndikim në numrin e mandateve. Sipas sondazhit të Piepolit, për Partinë Demokratike bashkë me aleatët do të votonin 38-42% të qytetarëve, përkthyer kjo në 4-6 mandate, një rritje prej dy mandatesh krahasuar me vitin 2017. Sakaq për LSI-në do të votonin 6-10%, e cila është në garë deri në 2 mandate. Ndërkohë që në këtë qark në garë për të dërguar përfaqësues në Kuvend janë edhe Nisma Thurje dhe Lëvizja për Ndryshim, që mund të fitojnë nga 1 mandat në Durrës.

Nëse sot do të votohej në Qarkun e Tiranës, për Partinë Socialiste do të votonin 49-53%, shifër kjo e përkthyer në 18-20 mandate deputetësh. Në këtë mënyrë PS do të ruante rezultatin e vitit 2017, duke pretenduar një rritje me 2 deputetë. Për Partinë Demokratike dhe Aleancën për Ndryshim do të votonin 35-39% ose 12-14 mandate. Krahasuar me vitin 2017 Partia Demokratike ka një rritje të numrit të mandateve, pasi në vitin 2017 ka fituar 11 mandate në kryeqytet. Rënie në kryeqytet ka pësuar Levizja Socialiste për Integrim, ku nëse do të votohej sot, LSI do të emrrte 4-8% të votave, ose përkthyer kjo në mandate 1-3 mandate. Ndërkohë në zgjedhjet e vitit 2017 LSI ka fituar në 5 mandate.  Surprizë në këto zgjedhje në kryeqytet do të ishte Partia Social-Demokrate e Tom Doshit, e cila është në garë për 2 mandate në kryeqytet. Nëse do të votohej dot do të merret 1-3% të votave ose përkthyer në mandate 0-2 mandate. Nismën Thurje dhe Lëvizja për Ndryshim e Jozefina Topallit nëse do të votohej sot do të fitonin 0-1 mandate.

Nëse zgjedhjet do të zhvilloheshin sot në kutitë e votimit do të shkonin 56-58% e shqiptarëve. Pjesëmarrja e mundshme në zgjedhjet e 25 prillit ka ardhur në rënie. Duhet thënë që në sondazhin e zhvilluar nga Piepoli në muajin nëntor pjesëmarrja ka qenë 59-63%, pra një rënie me 5%. Ndërkohë që matjen e opinionit në janar të vitit 2021 është regjistruar shifra më e lartë e mundshme 60-64%, e predispozitës së qytetarëve për të marrë pjesë në zgjedhje. Në sondazhin e publikuar në shkurt pati një rënie të shqiptarëve qe thoshin 'po, do të shkoj në të votoj', pasi ka qenë 58-62%.

Shumica e qytetarëve mendojnë se thirrja e SHBA-së për kandidatë të pastër në lista shkon për të gjitha partitë politike në Shqipëri. Në sondazhin e bërë nga Instituti Italian i Piepolit në bashkëpunim me Report Tv, 76% e të pyeturve shprehen se kjo thirrje është për të gjithë partitë, 13% mendojnë se i drejtohet PS-së, 8% thonë se është apel për PD-në.

Sjelljet e fundit të Presidentit Ilir Meta, i cili sulmon thuajse në çdo dalje të tij mazhorancën është gjykuar nga shqiptarët si e gabuar. Qytetarët e kanë cilësuar si një tregues që po bën fushatë për opozitën. 47% e të pyeturve nga Piepoli thonë se Meta po bën fushatë për opozitën, 9% thonë se po përgatitet për të marrë drejtimin e opozitës dhe 5% thonë se akuzon pa menduar. Ndërsa 26% i japin plotësisht të drejtë në reagimet e tij.

60% e shqiptarëve nuk janë dakord me marrëveshjen e nënshkruar nga PD-LSI për një koalicion qeveritar pas zgjedhjeve nës dalin fituese.  Në sondazhin e bërë të Piepolit në bashkëpunim me Report Tv, te bërë publik ditën e sotme në emisionin “Repolitx”, 37% e të pyeturve e kanë cilësuar si “negative” këtë marrëveshje, ndërkohë që 23% të tjerë “shumë negative”. Thënë në një plan më të gjerë 60% nuk janë dakord, e ndërsa 36% e vlerëson pozitivisht. 4% kanë zgjedhur që të mos përgjigjen.

Shqiptarët mendojnë se Qeveria Edi Rama e ka menaxhuar mjaft pozitivisht pandeminë e COVID-19. Në sondazhin e bërë nga Piepoli në bashkëpunim me Report Tv, 30% e të anketuarve mendojnë se kjo pandemi është menaxhuar mjaft pozitivisht, 19% shumë pozitiv. Ka edhe nga ata që janë të pavendosur, të cilët nuk kanë dhënë një përgjigje konkrete dhe nuk kanë anuar as pozitivisht dhe as negativisht. Bëhet fjalë për 100% të të anketuarve.

Livio Gigliuto, zëvendës presidenti i institutit Piepoli tha se në sondazhin e sotëm ka pasur një kampion më përfaqësues.

"Ky është sondazhi i parë kur kemi një bazë, një kampion dhe një dimension aq të madh që mund ta na bëjë të mundur të kemi vlerësimin për ndarjen e mandateve. Kemi më shumë se 1000 shqiptarë që janë pyetur , të ndarë në qarqe. Dhe jemi në kushtet kur mund të japim shpërndarjen e mandateve.  Ne sondazhin e kemi kryer me intervista telefonike. Kemi ruajtur të njëjtën metodë si në javët e kaluara. Kemi një kampion më përfaqësues, në bazë të moshës, gjinisë. Një tjetër risi në krahasim me rezultatet e mëparshme kësaj here kemi matur koalicion e PD-së së bashku me 12 forcat e tjera politike", tha ai në Repolitix.