Juristi Kreshnik Spahiu është shprehur se Amnistia Penale në Shqipëri duhet të jetë më e gjerë dhe të përfshijë më shumë kategori të burgosurish.

Komentet Spahiu i bëri në emisionin ‘Studio Live’ me gazetarin Ermal Qori në Report TV, ku tha se burgjet shqiptare, ndryshe nga ajo që ndodh në vendet e BE-së, nuk kanë arritur të shndërrohen në institucione rehabilituese.

Spahiu tha gjithashtu se të burgosurit në Shqipëri, kur dalin nga burgu, kanë predispozita shumë të larta që të bëhen përsëritës të krimeve të kryera.

Ai shtoi gjithashtu se në Shqipëri duhet të aplikohen edhe masa të tjerë shtrënguese, veç burgut.

“Një nga hapat e rëndësishëm të një shteti është aministria penale. Sigurisht që aspekti njerëzor dhe financiar janë dy aspektet kryesore të një amnistie penale. Ka grupe të ndryshme shoqërore që janë të interesuara për çështjet e amnistisë, pa llogaritur këtu që edhe vetë shteti ka nevojë për të riorganizuar dhe strukturuar punën në burgje dhe paraburgim. Për ata që na ndjekin, duhet bërë e qartë që kemi të bëjmë me një amnisti jo masive, jo të madhe, kryesisht përfitojnë ata që kanë kryer kundravajtje penale. Përfitojnë ata që janë dënuar me 3 vite burg meshkujt, apo 4 vite burg femrat. Bëhet përjashtim për shumë vepra penale. Pothuajse për numrin më të madh të veprave penale bëhet përjashtim. Shteti ka nevojë për një amnisti penale më masive, edhe për një arsye tjetër, sepse Shqipëria ndryshe nga vendet e tjera të BE-së, burgjet nuk ka arritur t’i shndërrojë në institucione rehabilituese.

Kjo sepse pjesa më e madhe e të burgosurve pasi dalin nga burgu, bëhen përsëritës. Nuk e kryen qëllimin kryesor që ka burgimi. Burgimi nuk është thjeshtë një izolim për persekutim, për torturim apo diskriminim, por qëllimi është që kur i burgosuri të dalë nga ky institucion të dalë i rehabilituar. Burgjet shqiptare janë faqja e zezë. Të burgosurit në burgjet shqiptare duhet të shkojnë me dyshek, çarçafe e veshmbadhje me vete. Disa thonë ‘mirë t’ju bëhet’, po kjo nuk është logjike, sepse ne nuk duam t’i nxjerrim më kriminelë sesa kanë qenë ata. Mos të shkojmë te ajo historia që po hyre 6 muaj del 6 herë më negativë e kriminelë nga burgu”, tha mes të tjerash Spahiu.

Kujtojmë se Qeveria ka përgatitur një Amnisti Penale, që do të kalojë nga Këshilli i Ministrave në Kuvend, nga i cili pritet të përfitojnë mbi 10 mijë persona, me 380 të burgosur që pritet të lirohen menjëherë dhe 980 të tjerë që përfitojnë ulje dënimi.

Rendit zhvillimet sipas orarit:
Ora 18:56
Spahiu për Report TV: Pagat e gjyqtarëve duhet të rriten, por jo më shumë se dy pushtetet e tjera, Ekzekutiv dhe Legjislativ

 

Juristi Kreshnik Spahiu ka komentuar debatin e hapur mbi pagat e gjyqtarëve, nëse duhet të rriten ose jo.

Teksa ishte i ftuar në emisionin ‘Studio Live’ me gazetarin Ermal Qori në Report TV, Spahiu tha se rritja e pagave të gjyqtarëve është diçka pozitive sepse sipas tij ndihmon në frenimin e fenomenit të korrupsionit.

Por Spahiu shtoi se rritja e pagave të gjyqtarëve duhet të bëhet në bazë të mudësive që shteti ka dhe jo më tepër sesa rritja e pagave në dy pushtetet e tjera, atë legjislativ dhe ekzekutiv.

“Nëse gjyqtarëve u takon një rritje page apo jo, kërkon një analizë shumë të thellë financiare, ekonomike, politike dhe juridike. E them këtë sepse parimisht do të ishte e udhës që gjyqtarët të kenë rritje rroge dhe të kenë një rritje rroge për t’ju garantuar maksimalisht një pavarësi në punën e tyre, për të mos qenë të intimiduar nga ofertat vetëm për shkak të problemeve financiare.

Çështja është që gjyqtarët në Shqipëri nuk është se kanë paga të vogla, domethënë në raport me institucionet e tjera, gjyqtarët kanë një pagë të lartë. Duhet thënë që një nga arsyet që prokurorët e SPAK kanë rezultate pozitive në luftën kundër korrupsionit dhe krimit të organizuar, një nga aspektet është edhe garancia dhe pavarësia financiare. Sepse janë të njëjtët prokurorë, kur punonin para 20 vitesh punonin me 500-600 euro pagë, ndërsa sot punojnë me 6 mijë euro pagë. Do thoni ju që nuk është vetëm paga, por është edhe paga.

Tani a duhet që edhe gjyqtarët të kenë një garanci? Parimisht po. Por këtu lind një debat politiko-juridik, që do të thotë, a janë pushteti gjyqësor një pushtet mbi pushtetet e tjera? Sepse mund të cënohen pastaj parimet e balancave të pushteteve të tjera, legjislativit dhe ekzekutivit. Domethenë në nivele të ndryshme të administratës vazhdojnë paga shumë të ulta në raport me gjyqtarët që kërkojnë rritje. Pra unë do të thoja që parimisht duhet të kemi rritje pagash për gjyqtarët, por nga ana tjetër, pushteti gjyqësor nuk mund të jetë mbi pushtetet e tjera. Duhet zgjidhur brenda mundësive që ka shteti”, tha mes të tjerash Spahiu.

R.Xh/Shqiptarja.com

Ora 18:40
Spahiu për Report TV: Shqipëria ka rekord të paraburgosurish sepse gjykimet penale stërzgjasin me vite

Juristi Kreshnik Spahiu tha për Report TV se sistemi penal në Shqipëri po prodhon një numër të lartë paraburgosurish jo për shkak të rrezikshmërisë së tyre, por për shkak të proceseve gjyqësore që zvarriten me vite dhe përdorimit të tepruar të arrestit me burg.

“Amnistia nuk zgjidh çështjet e paraburgimit. Duhen masa alternative. Shqipëria duhet të aplikojë edhe masa të tjera shtrënguese. Jo gjithmonë arresti me burg është zgjidhja. Vetë shteti duhet të gjejë mekanizma që masat shtrënguese të jenë funksionale dhe i pandehuri të përfundojë në burg kur të ketë vendim të formës së prerë. Nuk zgjidhet çdo gjë me arrest burgu sepse ka dhe një parim që ‘më mirë 100 të fajshëm jashtë se 1 i pafajshëm në burg”. Ne duhet të jemi në shtet me parime që nuk paragjykon të burgosurit. Kemi edhe gjykata që zgjasin proceset gjyqësore me vite, pra një proces penal i thjeshtë ku hetimi duhet të përfundojë brenda një muaji zgjat deri në 2 vjet. Si mundet ta mbash në paraburgim dikë 2 vjet dhe ta shpallësh të pafajshëm? Mendoj që është fatkeqësi që Shqipëria nuk i kushton shumë rëndësi këtyre çështjeve. Dyndja dhe mbipopullimi i burgjeve ka pasoja të tjera siç është arratisja. Është mirë që të kemi një paketë të përkushtuar për çështjet e paraburgimit dhe burgjeve, përfshirë edhe amnistinë. Nuk duhet bërë amnistia vetëm për uljen e kostove” tha Spahiu.

U.D/Shqiptarja.com