SPAK kërkon arrestimin, Berisha pas mbledhjes së grupit: Mosbindja civile vazhdon! Bardhi kushtëzon votën me plotësimin e 3 kërkesave të opozitës

Prokuroria e Posaçme dërgoi sot në Kuvend kërkesën për dhënien e autorizimit për arrestimin/ heqjen e lirisë së deputetit Sali Berisha. Kërkesa pasi të shqyrtohet nga këshilli i Rregullores dhe i Mandateve do të kalojë për votim në seancë parlamentare. Autorizimi në Kuvend votohet me shumicë të thjeshtë dhe maxhoranca i ka votat por a do ta votojë vetë Sali Berisha deputetët mbështetës të tij dhe deputetët e grupit Bardhi?

Qëndrimi i Berishës që mbajti në konferencë për median ku dhe mësoi dorëzimi i kërkesës (Ora 13:00) - nga e cila deklaroi se do ta votonte - u modifikua pas më shumë se 2 orëve mbledhje me grupin e deputetëve mbështetës të tij dhe të Bardhit në kryesinë e Kuvendit.

Ish-kryeministri pavarësisht se u shpreh se do ta respektojë vendimin e Kuvendit, bëri të qartë se mosbindja civile e deputetëve dhe kaosi në seancë do të vazhdojë, duke nënkuptuar se ligjvënësit e Rithemelimit dhe grupit të Bardhit nuk do e votojnë kërkesën e SPAK-ut.

“Janë të gjithë në unison se ky vendim, bazohet në një vendim antikushtetues, anti-ligjor të mëparshëm të SKAP-it dhe gjykatëses së shkarkuar nga unë me 8 shkurt 1996. Duke thënë këtë, siç theksova para 2 orësh, vitin 2012 jam angazhuar në një nismë së bashku me qeverinë e kohës për abrogimin e nenit të kushtetutës që i jep imunitet deputetëve ndaj  veprimeve të gjyqësorit. Nuk kam ndryshuar mendim se ajo përpjekje e imja ka qenë e drejtë. Vendimi i parlamentit do të respektohet nga unë. Kushtetutshmëria kërkon që parlamenti të ndryshojë kushtetutën dhe të vendosë që mos të ketë mbrojtje për deputetët. Cilido të jetë vendimi i parlamentit do ta respektoj. Nuk ka asnjë ndryshim të mosbindjes civile në parlament. Grupi është plotësisht dakord me ato që mendoj unë. Ju e keni parë se prej javësh opozita nuk voton më në Kuvend”- tha Berisha.

Nga ana e tij deputeti Gazment Bardhi ishte më i qartë në deklaratën e tij ku kushtëzoi kartonin jeshil me plotësimin e tre kërkesave të opozitës. Madje e quajti autorizimin e SPAK si çështje dytësore.

“Ne jemi njohur përmes medias me kërkesën e paraqitur nga SPAK. Është lajm i mirë që e dinte adresën e kuvendit që do të duhej të marrë dhe njeh detyrimin kushtetues që për çdo masë që i heq lirinë një deputeti duhet ti drejtohet kësaj godine që Kushtetuta i ka njohur autorizimin. Qëndrimi jonë por dhe i Berishës është votë pro çdo kërkesë që vjen nga SPAK në përputhje me Kushtetutën e Republikës së Shqipërisë.

Por i bëj thirrje Ramës të plotësojë kërkesat që ka opozita që ne të jemi në seancë pa diskutim që do të marrim pjesë. Në rast të kundër asnjë çështje dytësore nuk devijon opozitën nga aksioni që ka nisur në parlament. Asnjë çështje nuk mund ti mbivendoset këtij aksioni i opozitës nuk ka lidhje me çështje konkrete dhe nuk mund të ndërvaret.

Edhe pjesëmarrjen në Këshillin e Rregullores dhe Mandateve Bardhi e vendosi në pikëpyetje. 

"Përpara se ë pyesësh a do jem pjesë në këshillin e Mandateve do të duhet të pyesni Lindita Nikollën pse nuk na informoi për mbledhjen e sotme të Këshillit  të Mandatave"

Këshilli për Rregulloren, Mandatet dhe Imunitetin përbëhet nga 10 deputetë, me përfaqësim të barabartë mes shumicës dhe pakicës parlamentare. Nga opozita, përfaqësues janë Gazmend Bardhi dhe 3 deputetë mbështetës të tij e të Berishës, Ervin Salianji, Greta Bardeli, e Saimir Korreshi, ndërsa i pesti është nga grupi i PD-së zyrtare, Enkelejd Alibeajt.

S.G/KT/Shqiptarja.com

TAG:
• spak heton partizanin
• sali berisha