Kryeministri Edi Rama zhvilloi një bisedë telefonike me sekretarin e Shtetit Antony Blinken në lidhje me sulmet kibernetike.

Objektin dhe përfundimet e bisedës i publikoi Ambasada Amerikane në vend, përmes një postimi në rrjetet sociale.

Ambasada shkruan se Blinken dënon sulmin e papërgjegjshëm kibernetik të Iranit ndaj sistemit TIMS, dhe theksoi rëndësinë e bashkëpunimit të mes dy vendeve për sigurinë rajonale, si aleate në NATO.

 “Sekretari i Shtetit Antony J. Blinken foli dje me kryeministrin shqiptar Edi Rama. Sekretari Blinken dënoi sulmin e papërgjegjshëm kibernetik të 9 shtatorit kundër sistemeve të kontrollit kufitar të Shqipërisë, i cili pason sulmin kibernetik të Iranit ndaj Shqipërisë më 15 korrik. Sekretari theksoi rëndësinë e bashkëpunimit SHBA-Shqipëri, si aleatë në NATO, për sigurinë rajonale”. – Zëdhënësi i Departamentit të Shtetit të SHBA, Ned Price”, thuhet në njoftimin e ambasadës.

Sistemi TIMS në vendin tonë u bë pre e një sulmi kibernetik nga qeveria e Iranit të premten në mbrëmje, duke shkaktuar radhë në të gjitha pikat kufitare në vend. Pas pak më shumë se 24 orësh ndërprerje sistemi TIMS u rikthye në normalitet në të gjitha pikat kufitare.

Ky është sulmi i dytë kibernetik që Irani bën ndaj Shqipërisë. Herën e parë, në korrik të këtij viti goditi shërbimet online, ku prej gati 4 javësh ato mbetën të bllokuara, Si rezultat i hetimeve u dol në përfundimin se ishte Irani që financoi sulmin. Nisur nga provat e pakundërshtueshme, Shqipëria mori vendimin për të prishur marrëdhëniet diplomatike.

Rendit zhvillimet sipas orarit:
Ora 14:22
Biseda me Ramën, Blinken në Twitter: Nuk do të tolerojmë asnjë sulm kibernetik ndaj aleatëve tanë

Pas ambasadës Amerikane, edhe sekretari i Shtetit Antony Blinden komentoi bisedën telefonike me kryeministrin Edi Rama për sulmet kibernetike, ku tha se SHBA-të nuk do të torelojnë asnjë sulm kibernetik ndaj aleatëve.

“Bisedova me kryeministrin shqiptar Edi Rama  për të shprehur solidaritetin dhe mbështetjen pas sulmit kibernetik të 9 shtatorit kundër Shqipërisë. Ne nuk do të tolerojmë sulme kibernetike që synojnë Shtetet e Bashkuara apo  Aleatët tanë të NATO-s”, shkroi në Tëiiter Blinken

D.GJ/Shqiptarja.com