REAGIMET/ Rama: Protesta e atdhedashurisë ia ka lënë vendin filmit të vjetër të dhunës! Lamallari: Sulm ndaj shtetit! Berisha dënon policinë

Drejtori i Përgjithshëm i Policisë së Shtetit, Skënder Hita, vizitoi në Spitalin e Traumës punonjësit e tjerë të Policisë së Shtetit që mbetën të lënduar gjatë tubimit të zhvilluar sot para Parlamentit, në ushtrim të detyrës.

Si pasojë e sulmeve me gurë, sende të forta dhe mjete piroteknike ndaj forcave të rendit, 15 punonjës policie pësuan lëndime gjatë ushtrimit të detyrës.

Drejtori Hita i siguroi efektivët për mbështetjen e plotë të institucionit dhe për garantimin e të gjithë kujdesit të nevojshëm mjekësor deri në rikuperimin e plotë të tyre, duke vlerësuar sakrificën dhe angazhimin e çdo punonjësi që shërben në mbrojtje të rendit dhe sigurisë publike.

“Partia Demokratike ndoqi sot me shqetësimin më të madh skenat e dhunës shtazore të urdhëruar nga Edi Rama dhe Taulant Balla ndaj protestuesve paqësorë që kishin rrethuar parlament. Sot narko-policia përdori lëndë toksike, gaz lotsjellës të skaduar, spraj, lëndë piroteknike, topat e ujit, zvarritjen dhe përgjakjen e protestuesve paqësorë me një egërsi të papërmbajtur” Këto ishin fjalët që artikuloi sot Sali Berisha në mbrojtje të protestuesve që u mblodhën sot para kuvendit duke shënjestruar me gurë dhe vezë jo vetëm deputetët por edhe forcat e rendit duke lënë 9 prej tyre të plagosur.

Pas kësaj deklarate, kreu i Grupit Parlamentar të PS postoi një video tjetër në rrjete sociale për të përgënjeshtruar Berishën dhe treguar se protestuesit nuk ishin aspak paqësorë

Pamjet e shpërndara prej tij tregojnë momentin e frikshëm kur një i ri i vërsulet forcave të rendit me një gur të madh e të rëndë, ndërsa miq të tjerë të tij vazhdojnë sulmet me gurë. Në sfondin e kësaj videoje jehon zëri i Sali Berishës, të cilin Balla rëndom e quan Buf, ku akuzon policinë për dhunë.

Pamjet Balla ka preferuar t’i ndajë pa koment por duke lënë të kuptohet që dhuna në fakt është kolona zanore e PD-së dhe se egërsia e papërmbajtur për të cilin ai foli erdhi pikërisht nga rruga e jo nga policia.

Aktet e dhunës që u regjistruan të enjten para Kuvendit treguan për ministrin e brendshëm Besfort Lamallari se Partia Demokratike ka infektuar protestën qytetare që vazhdon prej një muaji në Tiranë.

Duke shpërndarë në rrjete sociale pamje nga këto akte dhune kundër forcave të policisë, Lamallari solli në kujtesë protestat me molotovë të PD-së duke nënvizuar se për hir të pushtetit, opozita dhe militantët e saj janë të gatshëm të djegin Shqipërinë për Sali Berishën, të cilin e quan ‘babain shpirtëror’ të partisë së molotovarëve.

Ai mori edhe shembullin e kreut të PD-së së Mamurrasit që ishte i pranishëm në protestën e dhunshme para Kuvendit duke vënë në pikëpyetje vërtetësinë e indinjatës së tij për flamingot e Zvërnecit.

“I indinjuar për flamingot e Zvërnecit dhe Kryetari i partisë së molotovarëve të Mamurrasit Patjetër dhe simbolet kombëtare nuk i kursejnë ata që janë të gatshëm të djegin Shqipërinë për babain e tyre shpirtëror!” shkroi Lamallari krahas fotove ku shfaqej kryedemokrati i Mamurrasit, si në protestë ashtu edhe në tubimet e PD, një provë e rradhës kjo për të mbështetur akuzat se pas akteve të dhunës fshihen eksponentë dhe mbështetës të PD-së.

Kreu i Grupit Parlamentar të Partisë Socialiste, Taulant Balla, iu bashkua reagimeve pas incidenteve në protestën para Kuvendit, ku mbetën të lënduar efektivë të Policisë së Shtetit.

Përmes një postimi në rrjetet sociale, Balla ndau rastin e efektivit Festim Kamberi, i cili u gjakos sot pas 32 vitesh në detyrë.

"Punonjësi i Policisë së Shtetit Festim Kamberi prej 32 vitesh në detyrë. Sot e gjakosën. Protesta e bukur e qytetarisë, atdhedashurisë, pastërtisë, ia ka lënë vendin tanimë filmit të vjetër të konfliktit, sherrit, dhunës, ku thonjtë e politikës së dështimit dhe zemërimit po dalin në pah me pisllëkun e tyre karakteristik" tha Balla

Me aktet e sotme të dhunës, protesta para Kuvendit "hoqi maskën" dhe përfundoi në dhunë e kaos. Kështu u shpreh zëvendëskryeministrja Albana Koçiu, e cila komentoi incidentet e ndodhura gjatë tubimit, ku u sulmuan me vezë deputetë dhe me gurë efektivë të Policisë së Shtetit.

Në reagimin e saj, zëvendëskryeministrja shprehu gjithashtu mbështetje për Policinë e Shtetit në vendosjen e rendit dhe qetësisë publike, ndërsa theksoi se kushdo që ka tejkaluar kufijtë e ligjit do të mbajë përgjegjësi para drejtësisë.

" U desh shumë pak që kjo protestë të hiqte maskën. Nga pankartat me meme, te vezët, e më pas te dhuna dhe kaosi, pikërisht aty ku dukej se ishte planifikuar të mbërrinte që në fillim. Kjo nuk është më një protestë qytetare me kauza të drejta. Është i njëjti skenar i vjetër, i njëjti refren i konsumuar i një grupi vandalësh që i kanë mbetur peshqesh Shqipërisë, për t’u kujtuar shqiptarëve çdo ditë pse nuk duhet të kthehemi më pas te këto shembuj të shëmtuar. Mbështetje e plotë për Policinë e Shtetit në vendosjen e rendit dhe qetësisë publike. Kushdo që tejkalon kufijtë ligjorë do të mbajë përgjegjësi përpara drejtësisë" u shpreh ajo. 

Pasi mungoi në seancë plenare bashkë me të tijtë, kreu i PD-së, Sali Berisha zgjodhi t’i komentojë nga rrjetet sociale aktet e dhunës të ndodhura në protestën para Kuvendit.

Kreydemokrati publikoi një video të një protestuesi të dëmtuar, për të cilin shkruajti se ‘pasi e përgjakën, narkopolicët lanë duart si Pilati’.

“Dënoj me ashpërsinë më të madhe gjakosjen e protestuesit paqësor”, shkrujti Berisha në rrjetet sociale.

Duke kërkuar lirimin e menjëhershëm të protestuesve, Berisha thotë se PD solidarizohet me protestuesit, ndërsa qeveria sipas tij tregoi se është e gatshme për çfarë do lloj akti në mënyrë që të mbrojë pushtetin.

“Edhe një herë, kërkojmë lirimin e menjëhershëm, të të gjithë të ndaluarve, protestues paqësorë që po protestonin në përputhje me të drejtën e tyre kushtetuese dhe Konventën Europiane të të Drejtave të Njeriut”, tha mes të tjerash Berisha.

Kreu i Kuvendit Niko Peleshi dënoi aktet e dhunës gjatë protestës para Kuvendit, duke i cilësuar të papranueshme sulmet ndaj punonjësve të Policisë së Shtetit, deputetëve dhe institucioneve publike.

Përmes një postimi publik, Peleshi theksoi se e drejta për të protestuar është themelore, por duhet të ushtrohet në mënyrë paqësore, ndërsa shtoi se dhuna cenon sigurinë e njerëzve dhe vlerat mbi të cilat ndërtohet demokracia.

"Asgjë nuk mund të justifikojë dhunën ndaj punonjësve të Policisë së Shtetit, deputetëve të Kuvendit apo institucioneve publike. Shqipëria ndërtohet mbi dialogun, respektin për ligjin dhe institucionet, jo mbi përplasjen. E drejta për të protestuar është një e drejtë themelore dhe duhet të ushtrohet në mënyrë paqësore. Kur protesta shndërrohet në dhunë ndaj njerëzve, cenon jo vetëm sigurinë e tyre, por edhe vetë vlerat mbi të cilat ndërtohet demokracia. Solidaritet i plotë me efektivët e Policisë së Shtetit, të plagosur gjatë kryerjes së detyrës dhe shërim sa më të shpejtë. Të papranueshme sulmet ndaj deputetëve të Kuvendit të Shqipërisë. Asgjë e mirë nuk ndërtohet prej dhunës dhe kaosit" shkroi ai

 

Ministri i Drejtësisë, Toni Gogu ka reaguar në lidhje me dhunën e ushtruar ndaj efektivëve nga protestuesit.

Përmes një postimi në rrjetet sociale Gogu shprehet se dhuna është e pajustifikueshme dhe nuk ka vend në një shoqëri demokratike.

"Dhuna nuk ka vend në një shoqëri demokratike.

Aktet e dhunës, përfshirë hedhjen e gurëve ndaj punonjësve të Policisë së Shtetit gjatë protestës së sotme, janë të papranueshme dhe të pajustifikueshme. E drejta për të protestuar është një e drejtë themelore dhe duhet të ushtrohet në respekt të ligjit dhe të institucioneve.

Askush nuk ka të drejtë të cenojë sigurinë e efektivëve të Policisë, të cilët janë në krye të detyrës për të garantuar rendin publik dhe sigurinë e çdo qytetari.

Shteti i së drejtës ndërtohet mbi respektimin e ligjit, të institucioneve dhe të njëri-tjetrit. Dhuna nuk është dhe nuk mund të jetë kurrë një mjet i pranueshëm për të shprehur bindjet apo pakënaqësitë politike", shkruan Gogu në rrjete sociale.

Autorët që goditën me gurë efektivët e Policisë së Shtetit gjatë protestës para Kuvendit janë identifikuar dhe do të përballen me drejtësinë. Kështu deklaroi ministri i Brendshëm, Besfort Lamallari, pasi vizitoi në Spitalin e Traumës dy punonjësit e policisë që mbetën të plagosur në kokë gjatë përplasjes me protestuesit.

Sipas Lamallarit, gjendja e dy efektivëve është e stabilizuar, ndërsa ai paralajmëroi se personat përgjegjës për këtë sulm ndaj shtetit "do të marrin përgjigjen më shembullore që parashikon ligji".

“Kam një mesazh për të gjithë ata vandalë që guxuan të hedhin gurë ndaj punonjësve të Policisë së Shtetit. Janë identifikuar dhe do të vihen para drejtësisë menjëherë. Do të marrin përgjigjen më shembullore që parashikon ligji. Ky është një akt kriminal”, tha Lamallari.

Më herët, ministri reagoi edhe në rrjetet sociale, ku dënoi sulmet ndaj efektivëve të policisë dhe tha se tre punonjës mbetën të plagosur gjatë protestës. Ai e cilësoi sulmin ndaj tyre si sulm ndaj shtetit dhe rendit kushtetues, ndërsa uroi shërim të shpejtë për efektivët e lënduar.

“Dënoj me forcën më të madhe sulmet vandale dhe sjelljen kriminale ndaj punonjësve të Policisë së Shtetit, ku mbetën të plagosur tre efektivë, të cilët ishin në krye të detyrës. Efektivët e Policisë janë punonjës të shtetit, qytetarë të Republikës dhe familjarë si çdokush tjetër. Ata janë në shërbim të ligjit, të rendit publik dhe të sigurisë së çdo qytetari, pa dallim. Sulmi ndaj tyre është sulm ndaj shtetit dhe rendit kushtetues. Askush nuk ka të drejtë të abuzojë në emër të së drejtës kushtetuese për tubim dhe manifestim paqësor dhe ta shndërrojë atë në dhunë flagrante me gurë të hedhur ndaj punonjësve të Policisë. Secili prej tyre që sot ngriti dorën ndaj punonjësve të ligjit do të ketë të njëjtin fat si frymëzuesit e tyre me molotovë dje dhe që sot fshehën duart duke mos ardhur në parlament. Shoqërimi i tyre nga Policia e Shtetit është vetëm hapi i parë në rrugën pa kthim që ata kanë zgjedhur në përballjen me drejtësinë dhe forcën shembullore të ligjit" shkruajti ai.

Taulant Balla ka ndarë në rrjetet sociale një foto të policit të lënduar nga një gur që u qëllua prej protestuesve para parlamentit. Guri e kapi në kokë policin dhe nga fotoja e shpërndarë prej kryetarit të grupit parlamentar të PS, është momenti kur ai shoqërohet nga një koleg për të marrë ndihmë, pasi është gjakosur.

“Kush ngre dorë kundër punonjësit të policisë, ka ngritur dorë kundër shtetit”, shprehet Balla.

“Ky punonjës policie i gjakosur nga gurët dhe dhuna e këtyre mbetjeve sociale dhe politike është apeli ulëritës për çdo shqiptar t’i dënojë dhe distancohet nga dhuna. Gjaku i policisë është gjaku i shtetit. Kush ngre dorë kundër punonjësit të policisë, ka ngritur dorë kundër shtetit. Rëndësia e detyrës që mbart uniforma e Policisë së Shtetit, duhet ta bëjnë shoqërinë të reflektojë në marrëdhënien, sjelljen dhe respektin ndaj punonjësve të policisë. Policia i ka shërbyer dhe i shërben me devotshmëri atdheut dhe qytetarëve, përplaset çdo ditë me kriminelë e keqbërës. Policia ka derdhur gjak, në emër të misionit dhe betimit të saj”, shkruan ai.