4 të plagosur nga sherri mes 2 familjeve në Levan! Një person i merr armën policit e qëllon një tjetër në urgjencën e spitalit

Policia e Fieri ka zbardhur ngjarjen e ndodhur mbrëmjen e sotme ku kanë mbetur të plagosur 5 persona. Sipas policisë konflikti ka nisur mes dy familjeve ku janë dëmtuar me sende të forta Gentian Zhapa dhe D.Zh, ndërsa K.L. dhe E.M. janë lënduar me mjet prerës. 

Pas këtij konflikti të plagosurit janë transportuar për në Spitalin Rajonal të Fierit , për të marrë ndihmë mjekësore por në urgjencën e spitalit një prej shoqërueseve të të dëmtuarve i ka marrë armën e zjarrit nga brezi punonjësit të policisë, i cili po ndihmonte për të futur të plagosurit në Urgjencë dhe ka plagosur me armë zjarri një prej familjarëve të palës tjetër,  A.Zhapa baba i Gentian Zhapës.

Në ndihmë të punonjësve të Policisë kanë shkuar forca të shumta policie duke bërë të mundur bllokimin dhe shoqërimin e dy personave E.B. e D.B. Sipas policisë E.B dyshohet edhe të këtë kryer plagosjen me armë zjarri.

Në vendin e ngjarjes kanë shkuar edhe FNSH dhe shërbimet e  Drejtorisë Vendore të Policisë po krehin zonën për të bërë të mundur kapjen  edhe të një personi tjetër të përfshirë në këtë ngjarje.

Ndërkohë policia njofton se po vijon puna për zbardhjen e plotë të rrethanave të ngjarjes, motivit të konfliktit si dhe vënien para përgjegjësisë ligjore të personave përgjegjës.

Report Tv mëson se detaje të reja nga ngjarja e ndodhur në urgjencën e spitalit të Fierit. Një prej personave të plagosur nga sherri i ndodhur në Levan të Fierit është Gentjan Zhapa 33 vjeç. Ndërsa babai i tij është plagosur me armë zjarri në ambientet e spitalit. Ai ka shkuar në spital për të parë të birin por është qëlluar nga personi i cili ka hapur zjarr në ambientet e spitalit.

Drejtoresha e spitalit të Fierit Nevila Shuke ka deklaruar se i gjithë stafi ndodhet në gatishmëri për të shpëtuar personat që kanë mbetur të lënduar.

"I gjithë spitali është në gatishmëri për të shpëtuar personat që janë në spital. Stafi po punon. Nuk ka vend për panik", u shpreh Shuke.

Drejtori i policisë së Fierit Andon Marku ka sqaruar ngjarjen e ndodhur në urgjencën e spitalit të Fierit. Ai deklaron se personat që kanë qenë pjesë e sherrit janë identifikuar, ndërsa thotë se atentatori i cili ka qenë pjesë e një sherri i ka marrë armën policit duke qëlluar me armë mbi personat e tjerë.

"Personat që kanë qenë pjesë e sherrit janë identifikuar. I ka marrë armën policit dhe ka qëlluar ndaj dy personave që kanë pasur konflikt më parë. Janë shoqëruar në polici dy persona dhe po punohet për kapjen e dy të tjerëve. Kjo ngjarje po hetohet.", ka deklaruar drejtori i policisë së Fierit.

Një person është dërguar me urgjencë në spitalin e Fierit më plagë të rënda në trup. Nga pamjet e siguruara nga Report Tv duket se është mbuluar nga gjaku. Ai duket se ka mbetur i lënduar nga sherri i ndodhur në Levan.