Tryeza e fundvitit është jo vetëm kënaqësi, por shpesh herë kthehet edhe në një dilemë për të përshtatur gatimet tradicionale me ato moderne. Përzgjedhja e menusë për amvisat është shpesh herë e vështirë.

Të ftuarit në emisionin “Rreze Dielli” në Report TV , Gëzim Balashi, shef kuzhine; Entela Cenko, sommeliere dhe Laureta Saliaj, amvisë; dhanë disa ide për të kombinuar pjata të shijshme që mund t’i gatuani në këtë fundvit. Mesniku me kokë viçi dhe me petë të pjekura, tradita e gjysheve në labëri, e cila trashëgohet brez pas brezi. Amvisa Laureta Saliaj shpjegoi edhe mënyrën sesi gatuhet.

“Petët e pjekura me lëngun e kokës së viçit dhe me gjalpë të freskët, kjo është një traditë që e kam trashëguar e që unë e bëj çdo vit në familjen time. Ne gatuajmë shumë edhe gjelin e detit si dhe në tryezë gjithmonë hapim një shegë, e cila simbolizon mbarësinë”, u shpreh ajo. 

Sallata ruse, një nga pjatat që nuk mungon kurrë në tryezë mund të vijë edhe me ingredient shtesë. Shefi i kushinës Gëzim Balashi dha disa ide për amvisat.

“Sallata ruse veç asaj tradicionales ku nuk mungojnë perimet, turshia dhe majoneza, mund t’i vendosni dhe açuge, peshk ton, proshutë, vezë të zier apo dhe mish, pra janë kombinime shtesë që shkojnë shumë, dhe kushdo e bën sipas dëshirës së tij”, u shpreh ai.

Balashi dha edhe disa ide për gatimin e gjelit të detit, i cili tradicionalisht bëhet me përshesh.

“Gjithë sekreti është tek mbushja, një kombinim shumë i mirë është me gështenja, me qiqra ose me arra. Ndërsa për përsheshin këshilloj që të mos bëhet një ditë më parë, pasi sekreti i shijes qendron pikërisht këtu, në kombinimin dhe freskinë sa më të mirë të erëzave”.

Balashi dha dhe një këshillë. Nëse gjeli nuk konsumohet i gjithi në natën e ndërrimit të viteve dhe mbetet edhe në ditët që vijnë dhe ku mishi forcohet, ai këshilloi të përgatisni një byrek. 

“Kjo është një recetë që ma ka mësuar ime më, por unë e kam bërë edhe në restorant dhe më ka rezultuar një nder recetat më të suksesshme. Byrek më lëngun e gjelit të detit, fasule pllaqi, gjalpë i freskët, është një mrekulli për shijen”, nënvizoi ai.

Sommelierja Entela Cenko këshilloi verë të kuqe dhe të bardhë, por ka një sekret për të mos u trullosur - tha ajo.

“Fillojeni me një verë të lehtë që mund të ketë 11% alkool jo më shumë, dhe një këshillë: pini fillimisht verë të bardhë pastaj të kuqe, sepse vera e bardhë ka një përqindje alkooli më të ulët”.

Sommelierja Cenko sqaroi edhe një element tjetër shumë të rëndësishëm për ruajtjen e verës.

“Temperatura është shumë e rëndësishme, kur temperatura në shtëpi është 35 gradë, vera e kuqe e lënë në tavolinë pëson një goditje, sepse ajo është mësuar të qëndrojë në 15 gradë, ndaj mbajeni para konsumit në ambiente të freskëta”, përfundoi ajo.